好了，終於到巴塞，已經是深夜11點了，飛機望出去的夜景金光閃閃。
去到Airbnb，位置響Girona站，行2分鐘就到，屋主係一個男人，自己一個人住，其實佢都幾好人，下面個間就係我的房間。
巴塞係一個好正的城市，正在終於有7仔，樓下有兩間7仔之類的店舖都開到深夜，所以我可以買水，自從經歷左巴黎斷水經歷以後，我就覺得香港真係一個好正的地方。
而家巴塞都有得夜晚晚落去買野，先係一個先進的城市。
屋主都幾有心，房間都佈置得唔錯，不過呢，我覺得外國Airbnb普遍而言個枕頭都係好軟，軟到令人訓得好辛苦，通常我都係兩個枕頭疊埋一齊訓。
少少怕屋主，因為我覺得一個男人40歲住咁大間屋，冇兒冇女冇老婆，多數都係有少少問題，如果係老人家就冇咩所謂，不過好彩呢幾日都冇咩問題，佢的確係幾友善。
仲有桌子，可以比我寫我的日記，我始終係鍾意手寫字多D。上網速度都好快，順暢。
由於今日已經行左好多路，經歷左好多野，所以好快就訓著。
第二日第一件事要做，就係醫好個肚，師兄同網上都推介一間食tapas的餐廳，其實我未去旅行之前根本唔知咩係tapas，而家先知係講緊西班牙點心，呢間叫catalana的餐廳好多人，排左陣先去到。
一條友食野，旁邊都有幾個大陸人，鬼佬冇咩點理我，我心諗有錢咩都食到，理得佢，但平時的我，上面係第一道菜，西班牙火腿，好薄，口感好正，晶瑩剔透。
西班牙奄列，再加多舊查左D紅色醬的麵包，份量夠飽，但係奄列就冇咩味，下次可以省去，想試特色食物都可以叫下。
呢味蝦好辣，隻隻蝦都好大隻，個醬辣都我係咁飲水，幾惹味的。
呢個其實又係西班牙火腿，不過夾左Cream同埋麵包，爽口D。
我覺得，成間餐廳如果話必試不可，一定係呢味，用支牙簽將鵝肝、牛柳同埋麵包串埋一齊，鵝肝世界級，第一次食，原來咁好味，不過一定好高膽固醇，牛柳有返D口感，加埋一齊，無敵。
嘩，太好味啦，燒得剛剛好，於是第二日又再去食多次，不過呢，我覺得都係第一次食的感覺最難忘，好似發現世界上竟然有種你未食過的美味。
臨走發覺門口排滿人，頭先早少少去等左好短時間就入得，自己一個人係會快D。
好多人話西班牙海鮮飯好好味，我第二日又真係點左個海鮮飯，不過呢就覺得麻麻地，因為有蝦，我唔識食，食左好耐都唔覺有好多肉，飯份量又好少，同我想像中的海鮮飯，有蝦仁、墨魚冇殼的海鮮飯差好遠。
餐廳叫catalana。位置在市中心，好易去到。
今餐一個人食左23.75歐元，即刻港幣$206左右，一個午餐，幾款點心就$200，的確係好貴，不過一生人都冇幾可會食到咁，就算啦。
同埋食第二餐已經覺得譚仔或者會更加好味……