7點出門去門司港，好快就到門司港，大約15分鐘，好靚好空曠，琴晚打完風，天色好好，晨早天氣清涼，行到超舒服，呢度建築物西洋風比較重。
異國風情的門司港。
呢度就係搭去下關的碼頭。
之後行去搭船去唐戶市場，我發現唐戶市場頂樓有一大片草地，影出黎的相片好靚，而且完全冇人上黎，好空曠。
有幾條支柱，幾宏偉。
遠望就係關門海峽，連接本州同九州，日本海同瀨戶內海的一道海峽，呢度舊稱馬關，中日甲午戰爭就係響呢度簽馬關條約。
天色晴朗。即使晴朗天，日本天色都比香港要藍。
下面就係唐戶市場，類近於東京的築地市場，但9點幾到好多店都已經賣完海鮮了。
乘船出發大約15分鐘就到對面，海峽距離大約同天星小輪差唔多，船上面得我一個行上去睇風景，好爽。
由唐戶市場可以行幾個字到赤間神宮同日清講和紀念館。
呢條係李鴻章道，相傳佢響呢度行黎行去諗緊簽唔簽馬關條約，其實而家已經變成人地住宅民居一部份了。
當年傾和約的會議室場地。日本人保存文物真係好勁。
李鴻章書法。
之後再搭船返去門司港，見到條橋升起左，分左兩半。
響門司港車站等列車返去小倉。去到小倉大約10:50，因為我等左大約半個小時先有車，但都幾快，因為今次我冇跟google map，有車就先上，11:05上左開去博多特急，用pass真係省左好多錢，因為呢幾日響九州搭黎搭去，之後就會搭特急去長崎，最後一日旅程，唔計琴日打風，其實旅行程都好順利，冇咩浪費錢，不過去唔到由布院係幾可惜，下次阿蘇火山開返，我就一於去熊本，阿蘇，由布院，仲有南九州宮崎都未去！
返到長崎之後就將行李放在長崎駅，之後就搭地面列車去長崎原爆遺址，去到原爆公園，而家已經變左一個安靜的公園，有小溪流，幾個學生在拍照，好靜。
原爆雕像。
小溪旁邊有少量廢墟遺物，可見當時災難之嚴重。
原爆博物館仲展現出浦上教堂的損毀情況，好多生活用具都壓成廢鐵，非常恐怖。
希望世界和平。
出左黎再行左一陣公園就搭車返去長崎駅，其實都係幾個地鐵站路程，短過我去沙田。
於長崎駅的商場叫左個定食，成個商場都冇咩人，九州人口唔算好多，好多餐廳都冇人，可能唔係食飯時間，相比香港無時無刻都咁多人，原來正常生活應當如此，唔洗排半個鐘先食到一餐壽司。
今次旅程又完結左，長崎機場離境去香港個閘口原來要夠鐘先開，而且得一班機可以等候，個機場真係細到無倫，下次可能去福岡熊本會比較方便。
