難得有好天氣，即刻搭高速巴士去此行最重要的一個景點，上高地。先在大正池落車，一落車已見到一個好美的湖泊跟眼前的高山燒岳。
好多遊客都馬上影相。
果然同明信片一模一樣，而且天氣微涼，空氣清新，行得好舒服。
燒岳位於長野縣和岐阜縣之間，是北阿爾卑斯唯一的活火山（海拔2455米)。
之後沿著林中小路繼續前往，景色都好有韻味。
到達一片碎石平地，遠看燒岳泥石流形成的一道裂痕。
再繼續前行就係上高地的小河流，河流的水流不強，可以望到河底的石頭，碧綠湖水與藍天白雲，奇怪點解水流可以形成這樣一道奇觀，好靚。
再行會見到一些小湖泊，顏色各異，配合楓葉灑落一池金黃。
上高地天空冇任何污染物，所以即使企到好遠都可以清楚睇到山勢及樹木，有時候香港行山即使好近座山，能見度不及外國清楚，景色大打折扣。
好有美感的山水畫。
部份樹木出現楓葉，火紅楓葉，佇足細看。
雪山脈脈，仰面延頸，決眥蕩胸。
買了一塊河童燒來吃，其實是普通雞扒，比豪大大好味。
聞名的河童橋，人流不算太多，可能大家都以為今天會下雨所以沒有前往上高地吧。
再往前行會見到其他生態奇觀，但我時間不足，要趕去下一個地方，之後都會抽空再來繼續探索。
趕巴士前往乘鞍高原，到達乘鞍高原巴士站後買了一杯安曇野牛乳雪糕，好味的牛奶雪糕。
在乘鞍高原遊客中心門口閒逛，見到有架巴士就開出，就問下司機，可惜我唔識日文，我指手畫腳問佢係咪上山，仲比張周遊劵佢睇，佢點頭叫我上車。其實上車後我都唔知架車去邊，只係知道架車不停轉圈向上行，行極都仲有車路，而且愈來愈高，後來同雲層一樣高度，見到雲海，好誇張，我估應該至少轉了二十個圈上山。
全架車只有我同司機仲有一個職員，三個人，佢地兩個傾計，我就自己一個坐車頭睇風景，靜靜地享受一下包車之旅。
愈來愈高，山勢陡峭，已經望唔到地面，只係望到下面有雲海。
大約一個小時終於上到山頂，原來係乘鞍岳山頂疊平，但係我一落車就見到成個平地係空無一人，而且太陽快要下山，而且天氣非常寒冷，我馬上去廁所小解，然後跑來跑去睇下四周景物，當時係下午4點15分。
前面就係山頂，都幾似瑞士高山，冇咩樹木，可能地勢太高，天氣極凍，我只係著了兩件薄衣。
回頭一看見到有巴士開，我一睇，原來最後一班落山巴士係4時半開，於是我行去望望。
原來呢度有2702米咁高，痴線。我見架車好似仲有位，於是我就比張周遊劵司機，佢就准我上車，於是我只係於乘鞍山頂逗留了十五分鐘就走了，看的景色很少，而且沒有預備足夠衣物，也好，下次可以再來，今次旅行只是探路之旅。
旅遊巴士落山又見到壯觀的雲海，到了乘鞍遊客中心時，發現中心已經關門，可是我剛好買了一點手信，放在遊客中心內的儲物櫃之中還沒有拿出來，門口只有幾個登山客在等待巴士去平湯溫泉，我等了差不多一個小時才有落山巴士，可是已經天黑，最後一班巴士成功上到，十分幸運。巴士司機載我們去新島島站，我再轉鐵路回到松本站，有趣，另一種回到酒店的方法。這架火車比較特別，只來回新島島與松本之間，只有幾個站，像一條小馬鐵。
回到酒店，由於我一開始預約的酒店是車站前酒店，及後才發現另一間更好，所以要今晚要轉去車站前酒店留宿，這個酒店沒有早餐，比較像美式旅館，舊一點，但距離原來酒店不遠，幸運是有自家浴場，我也有上去浸浴，浴池很小，但沒有人，幾舒服，自己一個享受浸浴，舒緩趕路的疲勞，辛苦過後的浸浴好舒服，滿足的一天。
