一直以來都好想行一次馬鞍山山頂，因為住馬鞍山，由細到大都望住座山，但又因為吊手岩呢個名好恐怖，所以一直都冇上過去。
琴日就嘗試挑戰馬鞍山，我地由馬鞍山郊野公園的家樂徑出發，一直向上行，沿途比較多樹，難度唔係好大，但就冇咩景睇，方向係背向馬鞍山市區，天氣都唔錯。之後上一段泥路會到家樂徑盡頭，會見到一塊牌，寫住「前面小路附近曾發生致命或嚴重意外，請勿前往」，就係吊手岩的入口。
開始上山，依然係泥路，上到半路回頭望會見到馬鞍山村的平原，之後我地冇揀雁谷迷陣的方向去，而係繼續直行，上到大約400米左右，都係泥路，唔算難行，幾好行。
望上山上面會見到一大舊石頭，我都唔知係咩石。遠處會見到馬鞍山。之後會上到一塊小平地，望出去可以見到成個馬鞍山市區，排得好整齊的樓，遠處仲有船灣淡水湖同埋八仙嶺，仲有中文大學同埋後面大帽山，好開揚的吐露港景色，絕對係值得為呢個景色走一次。
行多陣仲可以見到銀湖天峰迎海方向的建築物，右手面就有一座山頂，唔知叫咩名。我估計可能係靈猿守谷都未定，都幾特別。
之後就繼續上泥路，依然唔算太難，話口未完，就開始黎料，接下來係一段好多沙石的路，而且斜度都唔小，就係我youtube睇片見到的泥石路，不過比我想像中有d唔同，現實條路好似闊少少，冇睇片咁危險，我手腳並用，都可以繼續爬上去。
但係之後就愈上愈斜，向下一望發覺極斜，於是當堂腳仔軟，我就坐在斜石山路上休息一陣，食番個包，感受下山路的高度，之後慢慢轉身挑選石頭爬上幾級，問題係突出的石頭都比較細粒，我好驚隻腳會滑左落去，所以唔係好敢去踩，之後又轉身坐低，如是者試左幾次。
記得第一次行呢種路的時候，我曾經有種想放棄的感覺，想慢慢落返去，但我發現落去難度都唔細，可以話係背水一戰，還不如努力爬上去上面平地休息，事實上呢條斜路又真係唔算好長，捱多幾次就發覺可以踩上去的石頭愈黎愈大舊。
後來終於見到有繩，條繩又唔整長d或者早少少放，曬氣，而家都上到冇咁斜的石路，唔洗用繩了。上到去又望返落去下面，發現都唔係好睇到自己由邊度爬上黎。。
之後行的路都冇呢段咁陡峭，由於經歷完呢段咁險要的山路，我就好輕快咁跑左上山，見到吊手岩的石頭標記，終於都完成左呢段路，以往成日都覺得吊手岩唔係一條比行山人士行既路，亦都睇過好多意外新聞，加上個名都幾恐怖，以為吊首，上去會身首異處。今次行完覺得其實都可以應付，但真係要非常非常小心，我唔知下次去會唔會跌鬼左落去，有手套就可能比較就手。
行上吊手岩令我明白到，原來我係一個好怕死的人，成日話自己咩都唔怕，但係當處於生死一線之間，平日你好在意好在乎的事都忽然之間都變得不太重要了，點解自己會為咁多無謂野而困擾呢？要珍惜生命！睇返新聞，2020年4月一名67歲男子與朋友在馬鞍山行山期間，在牛押山近吊手岩附近失足，由6米高位置墮下，跌落大石上，背部受傷。今個月一名行山人士行到近馬鞍山吊手岩附近時突感到不適，陷入半昏迷狀態。消防總隊目邱少明在馬鞍山吊手岩拯救一名休班機場特警與其女友時，失足墮崖殉職。睇完呢d新聞，實在要量力而為。
上到589米的吊手岩之後，我地冇停就繼續落少少山谷再上埋677米的牛押山，距離都好近，基本上牛押山難度不大，一口氣上去就可以。上到牛押山就可以遠望到702米的馬鞍山山頂了。
但係由牛押山行去馬鞍山山頂要經過一條好窄的山脊，左面會見到十四鄉的所有村落，我地行緊過程中都聽到新地十四鄉地盤的打椿聲音，相比起大刀屻，我覺得過馬鞍山山頂呢條山脊其實仲危險，因為好多碎石，好易滑倒，所以我都慢慢行，馬鞍山風景好正，冇諗原來個景大部份竟然係望十四鄉，以為望返沙田方向，原來馬鞍山市區係比幾座山擋住睇唔到。
到達馬鞍山山頂，係一個270的海景山景，遠望赤門海峽及一眾十四鄉樓房，坐左一陣之後就日落了，我望完日落，趕快落山，途中見到飛行服務隊救左一個人走，然後我落到麥理浩徑之後已經入黑，所以冇上大金鐘，而係繞過大金鐘去昂坪睇下露營客之後就往西貢北港方向行落山，結束今日的旅程。
總結，呢段路係幾有意思，最難的地方是吊手岩，可惜冇上到大金鐘，唔知我可唔可以忍受到大金鐘的高度呢，記得以前好害怕大金鐘，覺得極斜，所以至今都未曾登頂，希望下次有機會可以圓夢。呢次路程行左8.42公里，行左4小時左右，由下午3點半行到7點半落山。
