《國立台灣美術館．大慨這算是迷戀 這路程得幾分鐘真是太短》

由審計368新創聚落繼續行，見到一大片綠色草地，就係國立台灣美術館。
草地好靚，空曠，見到有人野餐，心曠神怡。

原來呢個係台灣唯一國家級美術館，仲要係免費，連買飛都唔洗，而且可以自由拍照。

參觀人士睇展覽都好靜，有油畫、碗碟、字畫、水墨畫，來自中國、日本同埋西方。
睇左好耐，好多展品都好精彩，重點係我睇得明個D中文解釋，正!
當中有個展覽係台中街道模型，好壯觀。

日落前入去參觀，出返黎已經天黑，心滿意足，一個人行美術館真係一種享受。
本身背包很重，都有點累，但呢個美術館好行到令我唔覺得太辛苦。

3日2夜的旅程來到尾聲，是時候趕去機場了。
行返去文創區，發覺D攤位都執走左了，都係白天熱鬧好看點。
繼續行去忠明國小搭機場巴士，行到累累地，是但上左架巴士。
點解比佢愈車愈遠，馬上落車。
之後望地圖行去忠明國小的巴士站，好快就有巴士了。
搭左半個鐘巴士去機場，巴士乖客不多，好舒服。比起一開始迫巴士去酒店真係差天共地。
到左機場，check in，可以免費升級第4排座位，開心!
飛機比預期早左勁多起飛，本身20:45，但20:20已經渣緊去跑道。
最後提早左降落，結果要在機艙內罰企等落，早知寧願遲少少更好。
反正明天還有一天假期。

台中好玩，比台北文青味道更重，兩個文創並排，遇上週末真係人山人海，好有氣氛。
台中城市不大，不用太多交通工具轉乘，基本上我都冇搭過捷運。
唯一美中不足可能係見唔到文具店，多數係生活用品。
完成左Bucket list其中一項: 到清境農場一次! 今次旅行冇咩點plan，但有意外驚喜! 滿足。

《清境後．未洞悉小巷大街遍地華麗》

返到酒店之後，就訓到成夜晚9點先起身，起身之後又好精神。
於是搭公車去左逢甲夜市食野，我覺得逢甲夜市真係好大，正當我買左幾條腸仔同炸蟹食完，以為自己行完之際，先發覺自己行到去夜市起點，裡面仲多野食同埋玩，有個商場係專門有夾公仔，而且路邊好多店舖賣野食同衫褲，開到好夜，行左好耐先勉強行完，但反而冇咩收獲，因為唔知自己到底想買D咩。

但係望住五光十色的夜市都覺得好有氣氛，比起泰國夜市係多野行，可能多野食的關係，上次去西門町反而冇呢種行極都行唔完的感覺。

之後搭的士返去酒店，其實有諗過揀間近少少的酒店，但係新驛呢間都幾好住同埋又近清境巴士站。第二日訓到好遲先起身，錯過左早餐，今日的行程係亂行!
其實冇咩計劃自己路線，總之就行行下希望去到想去的地方，首先去宮原眼科買左手信先，之後去洪瑞珍買幾個三文治上路，後來搭巴士去市民廣場。

市民廣場都幾大，有好多人野餐都同玩，少少Hyde Park的感覺，舒服。

之後我就繼續行啦，見地圖以為草悟道個花園好大，原來好細，而且冇咩草地，所以比較冷清，跟住行左去綠光計畫范特喜文創聚落，呢個住宅群好文青feel，裡面可以好輕易就行到上天台，而且建築被植物纏繞，每個地方都值得影下相，當然店舖的東西比較貴我冇興趣買，但呢種大街小巷好有台灣本土的感覺，跟我在電影看的差不多。加上天氣涼爽，少少夕陽的關係，所以更加舒服，茶飲店、手工藝店，有種巴黎小資格調。

之後我就繼續行去審計368新創聚落，睇網上話假日先開的市集，今日星期六果然有開放，超多人啦。有幾個位置可以居高臨下望到市集的人群，非常熱鬧，好多人影相，木製樓梯同層板好好行，地道情懷的建築，加上綠化做得好好，我都忍唔住買左少少文青製品，店員仲即場幫我印左個袋，方便我帶飯用。

一個人在假日行一個陌生的城市，融入在人群裡，但又唔洗理會其他人，寫意的。

台中學生都會黎呢度影畢業相。

呢兩個文創區都好值得黎，而且距離極近，唔洗搭一大輪車去另一個地方，由於有市集，加上假日，氣氛比起台北松山同華山更加好，而且座落民居顯得更加生活化，冇咩商業味道，一家大小的盡興而歸，同埋佢地小店的植物真係種得好靚，呢種散策充滿生活氣息，令時間都變得慢左，冇左香港個種高談闊論、步履急促的感覺，也沒有首都那種遊客擠擁的感覺。

雖然我唔係咩文青，但呢種風和日麗、簡單的藝術美學，成為左台中的一道文化風景。

《青青草原．當時無知 傻孩子 無疑心 有夢兒》

天空步道豁然開朗，風景會令你有種震撼的感覺。

加上風和日麗，可以望到遠處的高山，又有少少雲，加上由於海拔較高的關係，所以涼涼地，冇咩熱的感覺。

全條天空步道大約行30分鐘左右，當中好多位置都好值得停低細心欣賞。

不過我發現一件事，就係條天橋某D位置會搖得好厲害，一開始我仲以為係地震。
拍攝都搖搖下，咁我就嘗試將部手機倚著欄杆啦，點知震動仲強勁。
嚇到我半死，都係企返去條橋中間，但係其他人行過又好似冇人有咩反應，我試左幾次，的確係晃動得好厲害。
好彩最後唔係地震，但第一次感覺到地動山搖的感覺。
今年年初也有地震，南投縣仁愛鄉發生4.8級地震，地震深度僅5.2公里，中、彰、投、雲居民明顯感受到地震，所以其實都有一定程度危險。

行行下見到前方草地有羊群，好正，遠望只係一小點，之後到達清境農場了。

一行入公園就見到好大片綠草地，仲見到有羊群響度食草，相比起奈良的鹿仔，羊群完全冇任何攻擊性，我摸佢佢都冇咩反應，反而佢好似好想飲水咁，經常流連飲水機附近，一見到有人扭開飲水機就伸個頭去飲下水，個樣都幾可憐，漫山遍地都有幾隻羊悠閒的吃草，加上原野風光，的確非常治癒。

繼續向上行會見到有間綿羊館，有幾塊展板同埋有手信買，我買左枝羊奶黎飲，比起牛奶好飲，味道好像濃一點。之後再周圍行，有些風景位可以比人拍攝。

沿路人流不多，我由十一點半行到1點，都差唔多行曬成個公園，於是就決定從另一邊的山路落山，返去國民賓館，途中會經過一個小型牧場，見到幾隻馬，如果春天呢D仲會有櫻花，不過而家入冬之際所以植物都冇咩開花。

再一路走，沿路都有少量遊人，雖然冇左遠處山景，變左好似行山咁，但係都幾好山，響香港偶爾有行山的我覺得係毫無難度的，最後有一段樓梯就到返國民賓館啦，我都覺得今日清境一遊可算無撼，風光極美，的確有種瑞士山區的感覺。

比起上年去少女峰，我會覺得清境人流少好多，可能因為得幾班車的關係，如果唔係自駕遊基本上係上唔到山，反而瑞士人流會多好多，因為有登山纜車。高度方面，少女峰4,158公尺，清境的海拔約1,700至2,000公尺，但係都望到雲層了，一路搭車上去會覺得好高了。我在香港行過最高的山只有934公尺的鳳凰山。高山如果唔係嚴寒天氣往往都有烏繩，清境都唔例外，但感覺細隻D，同埋冇瑞士山區那麼煩擾，所以感覺上清境會舒服好多，但係論安全，好似比較少聽到瑞士山區地震。相比兩者的草地，我會覺得清境好似靚D，而且有得親近綿羊都係一大亮點，瑞士雖然見到有草原動物，但距離都比較遠，至於奈良的鹿仔攻擊性太大，始終不及綿羊溫馴，若草山面積都未必有清境咁大，見到有好多人直情係訓左響草地，因為又大又乾淨，呢種天氣的確難得。

落返山之後我就去左食Mos Burger，本身都想參觀埋小瑞士花園，但係見個天D雲多左，iphone影相最重要就係光源，加上行左咁耐都有少少累，下一班車兩點就開了，所以都係唔睇，就等巴士走人，落山巴士終於有位，於是訓到返去台北車站，又要2.5小時，等於我由CK小鎮搭返去布拉格，唔知下次再黎風景是否依舊？