上一篇提到馬賽機場疑雲，最後都順利起飛，飛去羅馬先，中間有大約兩個多小時的等候時間，黃昏才飛往巴塞。
當時計劃過如果在機場等幾個小時又未免可惜，想去市區看看，反正之後都唔會再返去羅馬，但又怕交通問題會令我miss左班機，畢竟橫跨法國、意大利同西班牙三個國家，一日內遊覽三個國家，對於我這種首次出洋旅行的人來說都有少許擔心。
加上班機又遲左起飛，曾經想放棄，乖乖地留在機場，可是去到機場又覺得不甘心，因為班機原定14:25到達，最後竟然神奇地14:16著陸，仲早過原定少少。
最後，我決定跑快兩步往市區出發，腳底因為行得太多路有少許痛。旅程已經去左三分之一，剩下日數不多，要更加努力去多D地方，將來不知道有沒有機會再來這些地方。
首先一落機就跑去寄存行李，前面排緊隊的櫃位就是寄存行李的地方。
買左張leonardo express高速火車飛，火車站有少少熱，時間係15:23，我都企左一段幾長的時間。
入閘口。
到達市中心，見到有賣票機，其實就唔難用的，因為我只係買一張飛，咁我就排隊買飛，買完飛想拎返找左幾毫，突然間有個阿伯衝出黎插隻手落部機拎D錢比我。
我估佢係好心怕我唔記得，教我點用之類，我講左聲唔該打算走，佢伸隻手問我拎錢，我心諗咁都得，好多人應該都會比少少佢，但係我趕時間，又覺得其實我都識用，冇咩義務要比錢佢，於是頭也不回地走左了。
先跑去羅馬競技場先，嘩，天色咁靚，唔影相真係哂左，之前的日子都唔知會唔會落雨，有得去就去左先，對自己有個交代。
D人唔知點樣上去，好似要買票，我冇久留，影左幾張相。
古建築就係咁，其實望得多高樓大廈又覺得呢D好矮，不過當時科技冇咁先進，唔知D人點興建。
跑後少少再影闊少少。
好啦，向下一個地方進發，臨走再影多張相。
沿住google map，來到一座舊城的廢墟，見到個鬼佬，佢話自己研發緊個Apps，好似你影完相用佢個App可以睇到該景點的古代虛擬圖，我抄低左個名，叫atavistic，而家佢自己就繼續影相研發個App，都幾有心。
個廢墟就咁樣響市中心留在咁多年，帶動當地旅遊發展左好多。
唔知幾十年之後呢度會唔會仲係咁。
我見好多人都企響廢墟面前影相，的確又少見咁大型的廢墟，其實都好震撼，仲保存到原貌。
呢座建築好靚，有好多雕塑。
好似睇電視意大利新聞見到的意大利政府照片。
旗幟飄揚，good day，唔知平時D人行上街示威，呢度會唔會變成一片戰場呢？
好野，黎到萬神殿，行到腳都斷，時間無多，呢站係最後，好古老的一座建築。之前響法國巴黎的時候都去過Panthéon先賢祠，都係參考呢度。
維基百科話萬神廟整幢建築都用混凝土澆灌而成，但是當時的人們能用混凝土澆灌出如此巨大的穹頂依然是一個奇蹟。如果用今天的混凝土，必然難以澆灌出這麼大的一個穹頂，因為混凝土的張力將無法使它承受自身的重量而坍塌。人們後來得知，古羅馬人當時使用的混凝土是來自那波利附近的天然火山灰，再混入凝灰岩等多種骨料。
原來如此厲害，服!
門口有支好高的柱子，旁邊都有唔少軍警戒備，好多人，恐怖襲擊選址這裡也不出奇。
正面都影哂，Iphone 7影到咁闊已經好好。
好彩呢度唔洗買飛，如果唔係有排都入唔到去，而家好輕易就行到入去。
原來裡面係咁，好大的穹頂。
好見人企左響度向上影相，或者圍住神殿行，每個位都有D神像。
大殿中央係咁。
前面好彩都有少少長椅比人祈下禱，雖然冇導遊介紹呢度，但就咁望下我都幾開心，同埋夠哂自由，唔洗好像鴨仔咁睇時間跟住人地行。
好啦，行完搭返巴士去地鐵站，先發覺原來自己只係買左一張單程票，於是唯有唔出聲，行入巴士，其實我都好驚比人發現，結果冇人理我，一落巴士就跑去火車站，好痛，但好青春，省返幾歐。
18:10到達機場，點知班機竟然delay!!!!!!!
早知唔洗咁早就去到機場啦，慘呀。唯有買少少野食下。
上網睇，隻蛋叫arancini，好味! 本身去英國都想食scotland egg但係食唔到，食番呢款意大利蛋都叫做補番數，仲有得飲可樂，爽!
班機delay到20:20，遲左一個鐘，早知就去埋Vatican哈，曬左，我當時咁樣諗。
原來唔係，係delay到21:00，勁啊，好彩帶左《宗教哲學對話錄》去睇，冇曬到時間，同埋自己都有D累，坐下休息下。
今日都幾充實，雖然多災多難，但都去左好多地方，旅行總會有意想不到的體驗。
人生，其實除左賺錢之外，就係要多D特別的體驗，咁先有回憶，有種不枉過的感覺。
唔知幾點先會到巴塞呢？下篇待續。