《台北宜蘭花蓮5日4夜初婚之旅》

第一日

一到步台北桃園機場我地就首先去拎車，職員先帶我地去睇架車，然後影相記返低架車本身花痕，之後佢載我地出去到時交車位置再比架車我地，由於係左軚車，所以我一開始好緊張驚留唔夠位，所以渣得比較慢，同埋唔習慣打燈係另一邊，另外我地發現本身架車係未入滿油的，不過我地冇同租車公司講。

之後我地就開始渣去第一站環球中心中和店，很肚餓所以吃壽司郎再買手信，買完手信之後路過見到行李箱就買，可惜後來發現原來香港買更加便宜，比店家騙了，不過我們沒有行李箱，所以也是必要買的，再順便買銀包給父親。

之後換了免費泊車就出停車場，覺得在台灣泊停車場也比較簡單，有繳費機可以付款，然後我們就直接向山水澗溫泉出發，中途在宜蘭入第一次油。駕車的過程發現車子的引擎聲很大，山路更是有種快要爆炸的感覺，直路亦是非常嘈吵，第四日太太發現原來我們一直用L波駕駛，沒有用D波，所以車子的轉數一直在5000-6000轉以上，又不能快速的行駛，轉回D波就回復正常了，一直艱苦地完成雪隧及蔣渭水高速公路的路程，又走錯貨車磅重的路才回到主路。到達後已入夜，酒店在山腰之上，是獨立屋的設計，有3-4層，房間露台有露天風呂，還有秋千可以玩，不過始終覺得浸溫泉的時間不長，我傾向去按摩好似更加舒服，下次可以不選溫泉。我們駕車到中和路吃八寶冬粉，味道不算太好吃，冬粉更是難吃，可是價錢比較便宜，只要港幣35蚊就可以解決兩個人的晚餐。飯後我們去買藥妝，然後上車回酒店洗澡休息，完成今日的旅行。

第二日

食完早餐，直接向太魯閣方向出發，中間在蘇奧服務區買手信及甜品，發現宜蘭盛產麻糬，宜蘭餅也不錯，可是其他餅比較硬，然後開車到太魯閣，直到天祥停車場才泊車，吃普通台灣飯菜，感覺來來去去都是肉燥飯，魚蛋湯，炒米粉等食物，一開始吃會覺得抵吃美味，吃多三四餐就會覺得很膩很厭，再吃會想念香港的食物，奇怪為甚麼台灣人每日吃都不會厭，然後我們再開車至白揚步道，步道比較遠及長斜路，沒有太多景色，所以我們決定離開再開車回頭，在九曲洞步道停下，然後觀看太魯閣峽谷的景色，九曲洞十分震撼，步行在洞穴之間，會驚嘆究竟花多少人力物力才通出這條中橫公路，中途更聽到落石碎裂的聲音，峽谷險要，高不可攀的峭壁令人側目，往下望可見立霧溪水，大理石璧鑿出的道路，以前是舊中橫公路，原來是清初至今採金的道路。

離開太魯閣我們開車至七星潭卻開始下雨，我們到海邊邊民宿安頓，發現民宿衛生情況一般，比較舊，人流亦不多，基本上沒有見到其他租房的人，然後我們開車入油，途中發現胎壓異常，找個油站打胎氣，再前往花蓮市養鍋打邊爐，吃完後肚子痛返去上廁所，然後驅車前往時光二手書店買書，再去附近足底按摩店按摩，按摩的技師手藝不錯，可惜人流只有我們兩人，收費跟香港相若，性價比不算太高，唯一好處是不用給小費，按完摩後想到夜市買宵夜回民宿，可惜過了9時後大部份已關門，加上下雨更加難以逗留，唯有找一間串燒店吃東西談天，說起來好像只有我們二人和店家兩人，人流極少，路上的餐廳選擇不多，市面人流亦比較冷清，餐廳也不用排隊就可以進去，街邊可以隨意泊車，看來花蓮的夜生活不算豐富，所以我們食完後就回民宿休息。

第三日

早上去海邊邊旁邊的Cafe食早餐，味道都幾好食，之前我地返民宿check out，就係樓下拎車馬上向北迴歸線紀念碑出發，然後過鳳溪一條直路去到光復鄉附近，諗諗下覺得有D遠，而且天氣麻麻，所以決定改去石梯坪，於是我地轉左去光豐(光復鄉及豐濱鄉)道路，原來是一條好多彎既山路，中間部份路段得一條行車線，有一刻差D同對頭車相撞，好彩睇得夠快扭開，執返條命，繼續覺得引擎就黎打柴的感覺，之後到左石梯坪馬上去洗手間，係一個冇咩人既旅遊區，我地係一間原住民既Cafe巴克力藍食少少野，阿美族語「Pakeriran 巴克力藍」是指花蓮豐濱鄉，然後我地影下相，之後行上石梯坪，好似樓梯既石頭，好多皺摺，係岩石經過長年黑月扭曲推壓而形成的獨特地貌，好鍾意呢種類似萬柱海岸的風景，巨浪滔天，太平洋的一望無際感覺。

之後我地就渣車向新社稻田進發，路過牛山呼庭，中間停在花蓮的山度，入去打卡，之後渣車去嶺頂沙丘，發現原來只係國姓廟望出外灘的一幅地，有少少似三家村石礦場附近的村落，之後再渣去星巴克洄瀾門市貨櫃場睇下，旁邊的商場空無一人，仲冷清過內地的商場。繼續渣往宜蘭民宿，中途又再經過太魯閣大橋，沿途第一次入夜渣山路都真係非常漆黑，最後成功去到叢宿，好靚的一所民宿，在農田之間，非常清幽，放低行李之後我地馬上渣出去夜市搵野食，去羅東夜市食完野，再去附近購物，然後返民宿休息。

第四日

早上起來落樓下食早餐，民宿的早餐係即叫即整，好有心，而且超級好食，食完飲杯橙汁睇下書，過多一個鐘先出發，今日冇咩特別節目，首先我地去左張美阿嬤農場同動物玩，然後再渣去睇落羽松，之後就去黑RURU Cafe食野，但食物唔算好食同埋偏貴，之後再渣去民宿布魯懷特，一間希臘藍白小屋風格的民宿，好多樓梯，房間是海景房望龜山島，房有一座大浴池，好看卻不中用，放下行裝後我們去宜蘭傳藝中心睇下紅磚建築，有一個好大的公園，店家不算太特別，以手信店為主，有少少似永慶坊，呢方面我覺得廣州會比多野睇，之後我地就渣去新月廣場，可惜冇咩特別野好買，食左個牛扒餐，之後去東門夜市買宵夜返民宿食，可惜民宿桌子很小，很難吃東西，之後洗澡入睡。

第五日

清早起來到樓下吃早餐，這間民宿的早餐是外賣，有少許失望，可能因為之前所有民宿都有廚房提供早餐，換了要吃外賣有點奇怪，而且味道一般，令我對這間民宿的印象大減，然後我們出發由宜蘭返台北，到了石碇服務站落車看看，可惜沒有甚麼好買，就繼續前往華泰名品城，很多名店，價錢相宜但款式有限，不是最新款，最後也沒有買到甚麼，在food court吃完最後一餐台菜就去入油還車上機返香港了，結束5日的台灣旅程。

總結，也許景點不算很多，宜蘭花蓮也沒有甚麼好看，畢竟鄉村地方要求不能太高，天氣差比較少戶外活動，見識過4種不同種類的民宿，果然各有風格，最貴未必最好，能遇上一所簡約但好住的民宿，就像遇到一個對的女孩那樣，有太太在身邊行商場感覺反而像到愉景新城拍拖，沒有太大異地旅遊的感覺，反而即使風景很好但只有自己一個也不會有難忘的感覺，一起計劃旅行試伏的體驗，就是天氣不似預期也感到歡愉的初婚生活。

《故宮．離運氣有半寸那麼遠》

凌晨起左身，就走左去阜坑豆漿買早餐，上次黎台北買左粢飯同油條，食唔曬，太浪費，今次吸取左經驗，叫左一碗凍豆漿同一份蔥蛋，兩樣都好好味，而且勁平，20蚊港幣都唔洗，人生最開心莫過於食到呢D。食完野就再返去訓，之後呢我就check out，然後將行李鎖在台北車站的locker，自己再搭車去故宮博物館。

故宮博物館唔難去，借左個導賞機慢慢聽，可惜2個小時實在太短，無法好好欣賞展品，同埋呢白玉菜又借左去台中，有少少可惜。但感覺上，故宮博物館唔算好大，門外一條大道其實同百萬大道的感覺都差唔多，未去到凡爾賽宮個種廣闊的感覺，亦都冇歐洲大廣場個種莊嚴的感覺，唔知北京故宮又會係咩感覺呢？短短幾日台北，只係參觀左一個故宮博物館，冇去過其他博物館，實在有點可惜。

去完故宮之後，就去左公館站附近食下野，然後去茉莉二手書店買本書返香港睇，順便買左塊雞扒，都幾好味道，可惜竟然有骨，咁我都係鍾意豪大大冇骨雞扒會好D。食完時間差唔多，搭返車去台北車站拎行李去機場搭8點鐘飛機。

好景不常，去到台北車站搵唔到個行李櫃的編號，太多行李櫃，同埋車站又大又多人放工，搵左陣先搵到個行李櫃位置，點知壞左開唔到，我拿拿聲跑去售票處搵人幫手，點知佢又話有人去左，結果我又要走返去，個師父搞左好耐先拎到件行李出黎。

我馬上去買飛搭去桃園，點知又買錯左高鐵，應該買去機場的火車票先係，擾攘左好耐，最後成功退款再買票，上到火車我覺得幾好彩啦，點知都係遲左好耐先去到機場，好彩架飛機未到，所以會遲半個鐘飛，比時間我最後check in，仲有時間用曬所有台幣掃手信返香港，但係手信都好似唔係太夠用，無辦法，唔夠時間買太多手信，下次要計劃得好D。

總之今次旅程由第一日開始多災多難到最後一日，下次自己一個去應該會上心少少，同埋可以享受自己一人自由自在的時間。

《淡水．雨滴滴答答的墜落》

第三日一早起來，我地就去左松山文創園區參觀，之前去過華山，覺得細到無倫，無咩好睇，今次響松山真心有驚喜，幾多文青野睇，可惜我本身冇咩研究，但睇完之後都激發左我去留意下D碗碗碟碟，建築係工廠改建，所以D走廊幾有舊時風格，由於場地好大，都有好多設計工藝品睇下，可惜太貴，而家諗返其實就唔算好貴，反而冇咩買到工藝品返去有點可惜。

睇完松山，我地就搭車去淡水! 去淡水基本上狂搭紅色線就搞掂，到達淡水之後我買左碗涼茶叫十八味，都幾好味，順便食埋野，我發覺好多間店都叫自己做阿給，淡水阿給，據說係淡水出名的小吃，做法是將油豆腐的中間挖空，然後填充炒過的冬粉浸泡過滷汁，以魚漿封口，加以蒸熟。我當然冇食，因為唔敢冒呢個險，形狀古怪而且冇咩香味，我最後叫左碗麵線，魚丸同埋肉燥飯，魚丸係淡水出名特產，味道都唔錯，至於值唔值得因為魚蛋走過黎就見人見智啦。

食完野之後我地去左按摩，想試下台灣的按摩到底係點樣，同泰國比又差幾遠呢？由於天氣太差，落緊雨，搵D室內活動做下比較好。

按摩店叫做芳香閣足體養生館，按腳過程大約45分鐘，舒服到訓著左，完全唔痛，睇黎我命中注定都係要按腳而唔可以按身，加上間店似係本地人去開，乾乾淨淨，按完冇收貴，比左錢就可以走，下次可以再黎。特別係響台北冇咩做，按腳都係一個好活動，相比泰國按左三次摩，我覺得最正係泰國腳底按摩，其次係台北淡水呢次，其餘全身按摩都係垃圾，浪費金錢兼且周身酸痛，都係咪搞，價錢方面，600蚊台幣，即係153蚊港幣左右，其實同香港按腳的價錢差唔多吧，但係我未試過香港，所以唔知質素係點，以旅行的享受而言是可以接受的。

按完摩之後搵車搭去情人橋，途中狂風大雨，好彩我帶左便利雨衣，大派用場，基本上冇咩靚景，因為太大雨，但係條橋都幾特別，冇瀝源橋咁老套，同埋宏偉少少，但同布拉格的查理大橋相比，呢種斜拉橋設計即係汀九橋同汲水門大橋個種設計，都係冇咩特色可言，唯一係到左夜晚會變下色。

夜晚我地就搭返車返市中心，去左暪著爹食，呢間日式餐廳好似好受歡迎，之前響Facebook都見唔少人分享魚生丼飯，同埋佢有幾間店，分別賣壽司、居酒屋同埋丼飯，我今次去食丼飯，叫左個港幣200蚊的豪快盛海膽丼，加個蛤蜊味噌湯，個飯好好味，都幾多海膽，好快就食曬，由於我唔識欣賞貴價食材，所以下次都係叫蛤蜊味噌湯仲好，因為好多蛤蜊，食極都仲好，湯底好鮮甜，價錢都唔算太貴，只係60蚊一碗，即係10幾蚊一碗湯，勁平，仲有一個茶碗蒸，不過太多蔥，食落冇咩特別，呢餐算係我地咁多餐裡面最貴的一餐啦，之前食開都係港幣20-30蚊一餐，最後一食就豪飲豪吃。其實台灣都幾多唔同種類食物選擇，同埋唔洗排隊排咁耐，普遍價錢都抵食，平玩之選。食完野搭車去師大夜市，冇野食冇野買，連男裝店都冇，比旅遊書搵笨，於是就返左酒店結束左今日的行程。

《二子坪．如果 禍與福都躲不過》

第二日食酒店早餐都幾豐富的肉燥飯。今日的行程就是陽明山，我地搭車去士林站，之後再搭巴士去到陽明山入口，再搭108號遊園公車，但係唔識叫落車，結果就比佢地車左去二子坪車站，唯有第一個景點去二子坪先啦。

可是錯有錯著，我覺得二子坪幾乎是陽明山最靚的地方，一大片草原，而且位置在山谷之間，人流不多，加上有小河流同橋搭建而成的景觀。

11月的季節也有芒草，所以非常清新，步道都唔算好遠，行大約15分鐘左右到。藍天白雲，秋風送爽，氣候宜人，之後去其他地方反而冇咁靚，一方面晨早天朗氣清，另一方面11月開花的植物不多。陽明山四時變化不同，每段時間都有值得觀賞的植物，11月應該睇芒草，慶幸第一站黎二子坪!

之前我地就搭返一架區間車去返陽明山觀景台，交通方面的確唔係好識路，而且又唔知有咩好睇，因為冇咩做功課，打算行到水窮處，坐看雲起時。沿住竹子湖方向行，海芋田、繡球花田，全部通通冇野睇，同上次去台北一模一樣，始終過左秋天農田都冇咩盛開的農作物。行到有點肚餓，就去左一間農家菜餐廳食，餐廳名叫湖田大樹下。

我地叫左蛤仔湯，好濃的蛤仔味，而且勁多蛤仔，份量好足，唔怕唔夠食。三杯土雞肉，平日唔鍾意食雞的我都食埋一份，佢煮得都幾好味，易入口。最後係山茼蒿，在香港，大葉的稱為茼蒿，莖長、葉細的為皇帝菜。細葉的皇帝菜，本為日本品種，又叫春菊，味道都好好，也許是因為太肚餓，呢D飯菜送飯真係一流，可惜埋單有D貴，每人差唔多100蚊，都算物有所值的。

食完野有番D力之後就繼續我地遊湖的旅程，成個竹子湖都幾大，本來自駕遊係最好，因為遊湖公車都未必可以遊曬成個湖。我地冇車，唯有自己用腳行左東湖、頂湖同埋下湖。

見到大片海芋田，盛開的芒草遍野，中間一條小路可能觀賞農田，其實都係一件賞心樂事，我覺得下湖比較大，有幾條步道可以慢慢行，可惜個天開始有少少陰，所以相片質素會差少少。其實呢個季節陽明山都係冇咩睇，因為植物都未開花，只係得葉子，但係去郊外對我黎講係幾寫意，反正終有一日我會睇到盛開的花朵，到時可能未必有而家咁少人，又係迫餐死。下湖仲提供左一D步道，配套係比較齊全。

之後我地又搭遊園公車去左冷水坑，途中經過小油坑，其實小油坑就係一個噴煙的火山口，我響巴士望下就算，冇專登落車睇，到左冷水坑，一大片密林。

天氣都仲還可以，路過一條鐵索吊橋，名叫菁山吊橋，條橋都好穩陣，幾值得去望下，但係唔算好高，所以冇咩感覺。

再行入少少有D小湖泊同普通的山路，但係天色開始變暗，所以我地決定盡快行去擎天崗，大約1.7公里，路程唔算太長，太約半小時就到，但係行左二子坪、竹子湖同小油坑的我開始有D累，選擇慢慢行算。去到擎天崗，慘，天開始黑了，日落時份，加上部份地方唔開放，所以得個草原係可以行下，但其實，只要去過清境就知道，擎天崗草原唔係好大，我覺得作為禮拜六日去下冇所謂，但旅行去就冇咩驚喜，因為最大個部份的草原冇開到，好似係維修之類，有少少可惜，但係天黑都影唔到D咩，算啦，今日已經超額完成任務。

夜晚我地搭車返去市中心，去左新北投的日勝生加賀屋國際溫泉飯店浸溫泉，專登預約左一間獨立湯屋，靜靜地浸費事同人爭，但係過程極難受，湯屋面積太細，兩個人根本唔夠位浸，唯有輪流落水啦，D水又熱到傻，好似點較都唔適合自己咁。

最後我都係沖返凍水涼算數，結果一個半小時的溫泉之旅，就在痛苦的冷水浴中渡過，可能自己真係唔太適合浸溫泉，享受唔到個種疲勞盡消的感覺，間酒店都幾高級，全部日式裝修，乾淨有禮貌，但我覺得溫泉不太適合我，結果落機已經流緊鼻水，之後仲大病一場，真係慘。

放晚去左士林夜市食野，發覺除左腸仔基本上都冇咩好食，所以買左幾次，有條九菜串燒，食完喉嚨好乾好痛，中曬伏，之後麵線冇咩味，可能我食開辣，所以口味不合，唯一慶幸係買到幾件性價比高的T shirt，總算不枉此行，就咁樣又完左一日，唔中伏都唔算叫做去旅行，下次就知道自己需要D咩~

《命運若是 三千場福禍．台北遊記》

今次遊台北都算係多災多難，都怪自己好多事情都冇做足準備。

臨出門口先發現自己冇左張入台站，咁我唯有將soft copy放落USB度去機場印，點知印的時候又禁錯制，結果印左彩色要成20蚊，咁都算，仲要去到台北入境，排完隊先發覺每張入台證只可以用一次，因為上次用左去台中，所以冇辦法唯有重新去排隊做過一張，個職員態度一般，可惜佢自己都搞錯，所以最後大家都冇咩。

去到台北，第一時間去酒店check in，我覺得今次酒店認真麻麻，房間有陣霉味，廁所去完味道會衝出房間，可見通風系統一般，而且花灑力度都時好時壞，深夜仲會有妓女徘徊，而且酒店都只係佔幾層，根本就唔似一間酒店，好似職員都樂意幫忙，一個電話就送左好多水上黎比我地飲，唔洗自己落街買。下次我應該會訂一間貴少少酒店，因為酒店好影響一個遊客對城市的觀感，不過幾晚訓落去都冇咩問題。

放低左行李之後，我地去左樓下食肉燥飯，價錢先17蚊港紙，我叫肉燥飯加油豆腐，又飽又好味，呢間店叫阿水獅豬腳，好店!

 

之後我地就決定搭火車去九份，一開始去到台北車站其實都唔係好知點去，後來搵到班車去瑞芳車站，剩番幾分鐘就開，於是急急腳，最後趕到，仲要係快車，飛左好多個站，真係好彩。

去到瑞芳車站就再轉車上去九份。

可惜搵左好耐先搵到架車，佢個巴士站原來唔響車站附近，仲落左陣雨，冇法，後來搵到架車，點知又冇位坐，唯有企左幾個字，終於到左九份，原來係一條起響山頂的村落，而家已經變成旅遊區了，村落景色有少少法國山區鄉村同六鄉村的外觀，但植物同建築其實都差好遠，而且好多好多遊客。

我地迫左入去九份老街，真係太多人太多手信店，我就買左杯幸福堂同埋食左條腸仔。由於時間關係，馬上攻頂，山頂係一間小學同埋觀景平台，可以睇曬附近的村屋建築，而且人流比較少。其實九份都幾靚，如果朝早黎可能比較少遊客。

出左老街，我地打算去十份，但係發覺每架巴士都載滿遊客，而且又擔心太夜到會錯過天燈或者返去的火車，最後我地決定搭的士去，唔算太貴，幾十蚊港紙，去到十份，見到經典的放天燈同埋長長的火車路軌可以比人行。

我地搵左間餐廳食肉燥飯先，可惜味道一般，太多油了，不及酒店樓下個間好味。

放天燈我地有4頁，寫左好多野，但其實我自己就冇咩願望，都係寫人地願望多，變成一種祝福，毛毛細雨，覺得好天會更美，落雨有種淒清的感覺。

我在想，一個天燈先120蚊台幣，除番港紙大約30蚊左右，一個鐘可能都係得幾班遊客黎光顧，究竟十份D人係點樣謀生？點係賺天燈呢小小錢已經足夠呢？如果真係足夠，咁都幾幸福，但如果要成世都只係幫遊客點天燈，其實會唔會有點浪費？可是，每天出入寫字樓，營營役役的白領又何嘗不是另一種浪費呢？假如純以薪金去論斷一個人的幸福會否太過武斷呢？無論如何，天燈點了，何必執著。點完天燈冇咩做，仲有成個鐘先有火車，唯有到處拍照，可是街燈太少，怎樣拍都有一種零落感，人流愈來愈少。

接著搭火車回到瑞芳再搭回台北，直接搭紅色線去象山一睹台北的夜景。象山距離地鐵好近，唔算好高，基本上行15分鐘就到山頂，是台北的嘉頓山，可以望到101同其他樓景，上到去見到都幾壯觀，但係同香港都係冇得比，有個小型觀景台，有D遊客甚至爬上石頭影相，由於觀景台附近比較多樹，景觀不算開揚，但可以免費欣賞到台北夜景都不錯。最後成功趕到最後一班捷運返酒店，渡過左台北的第一個晚上。