出事了!
去完水族館，我地就決定搭的士去JJ Market，去到見到好多人，佢地響門口買串燒，我呢買左包西瓜，都幾好食，但係入到JJ Market發現好大好亂，行左好耐都冇咩啱買的東西，唯一就買左個生日杯仔比細妹，之後就走人，決定去河濱碼頭夜市。
可能JJ Market適合女人去，我地覺得冇咩好買，同埋環境比較凌亂。
搭的士去河濱碼頭夜市，同司機好難溝通，落左車先發現偉哥唔見左個銀包，我地懷疑跌左響的士，因為臨上的士偉哥都仲有買野飲，結果打返比個司機，叫佢渣架車返黎，銀包的確係架車度。
好彩，擾讓左一個鐘，偉哥終於悔改，為左慶祝搵返個銀包，我地去食好野!
河濱碼頭夜市好大，有好多個Zone，比較新同埋整齊，加上又近河邊，有條長廊可以影下相，但係曼谷夜景唔算好壯觀，相比香港直情係廢。
反而夜市五光十色更加值得影下相，本身打算去睇泰拳秀，但係1000泰銖佢地覺得貴，我自己麻麻地鍾意睇打交，由於太肚餓，於是我地決定馬上去Fire & Dine度食野算，呢間應該係我地食過最貴的餐廳，埋單食左成4000幾泰銖。
其實本身食物不算太貴，但係每人叫左杯酒就貴啦，佢地覺得D酒麻麻，我自己杯藍色就就好好飲，配上live band music，Ed Sheeran的歌，氣氛簡直無得彈，成班人share野食的確係幾正，烤雞正! 我自己覺得最正係咸蛋炒魷魚，極好味道，真係超好食，咸蛋都可以炒菜，仲要咁香! 燈紅酒綠的生活就係要咁!
大家對烤雞的評價唔錯，我都覺得幾好，軟殼蟹就唔夠熱，不過串燒由於漏單，我地食飽曬先到，而家燒得太耐啦，肉有D硬。
附近都仲有好多餐廳，咩國家菜式都有，下次可以再試下。
可惜食完野時間都唔早，無時間深度行，要趕住去揼骨!