好多人話Eze Village係必去之地，因為同尼斯的距離好近，而且地勢高D，有多D景睇。
可惜之前有朋友話等巴士等左個幾鐘，令我都有少少驚會唔會有事。
幸好今日上車尚算順利，仲比我搵到位坐，搭緊車的途中望到對面有個女仔自己一個站著，唔知係咪香港人，都算幾有緣，可惜一落車就唔見左人了，就咁睇相都幾似D情歌MV的情節。
落車發覺呢度有人拍緊戲，不過渣呢D玩具車追逐都好笑。
買左飛，行上Chateau，一個類似莊園的地方，個天好藍，地勢之高，可以極目遙遠。
呢個莊園好多唔同種類的仙人掌，好似以前係打仗所以起到咁高，莊園唔算好多人，因為門票都幾貴下，同埋我行得快，所以行落幾舒服，不過有幾個位都幾高，我本身畏高，都有少少淆底。
每個位都可以望到景，周圍穿梭。
仙人掌好高好大棵，幾壯觀，不過有D都幾核突。
呢個風景位都好多人影相，望住地中海，居高臨下，似乎高度比昨日更甚。
呢一個方向可以望到法國典型的村落小屋，錯落有致。
下面有座教堂，好大個鐘，可惜係冇電，時間係錯的。
好多鬼佬行到上落都半條人命，我就水都冇就咁喪行，佢地選擇坐下傾下計。
中間有條馬路，好似話蒙地卡羅挑戰賽係度舉行，因為好多彎位，好考車手功扶。
例牌必穿過的直路。
行上黎會穿過的洞穴小路，戰時防守據點之一。
少量藝術精品店，有幅畫，我幾鍾意呢種亂黎的style。
好多有特色的藝術品開響呢度。
之後周圍亂行，突然發現呢度有條小路。其實前面行多幾步就係懸崖，根本無路行。
原來呢條路叫尼采之路。
尼采之路，笑左，變左景點，相傳佢讀書個陣放假成日周黎呢度渡假，爬下懸崖同山路思考人生，唔知佢本《查拉圖斯特拉如是說》係咪真係響度諗出黎？不過得一段幾步路，咁都叫景點我都覺得有點兒戲。
下一篇將會繼續我下午的旅程!!