好啦，最後一個旅遊景點，就係搭左幾粒鐘來回的CK小鎮，由於呢個地方香港人成日都去，所以我都去下，反正都幾近布拉格。
搭車搭到傻，終於到，有少少急尿，不過全程都忍到返酒店先去，估唔到忍到，仲以為要去出面廁所，縱觀全個旅行我都冇去過出面的廁所。
CK小鎮的確好多一排排延綿不斷的橙色小屋，我跟住旅行團即刻衝向最高點。
影返張全景圖先，可惜天陰多雲，有種風雲變幻之感。
其實實地睇又覺得橙色屋仔都冇咩特別。
上到高處忽然天色放晴，把握機會影相，原來陽光之下睇落又幾靚，好似一份份積木咁，好故事Feel。
山上面仲有一個好大的公園，天氣好似愈黎愈好。
好靜冇咩人有力行到上黎，所以基本上係影相的好地方。
落走之前補多張，其實CK小鎮都係睇幾個位影相比較好睇，但就好多遊客長時間留守響那裡，所以好難影到好靚，我影相個刻其實人山人海，好彩佢地冇咩入鏡。
返到布拉格，見仲未天黑就走圍行下，呢個鐘好似歷史悠久，我見到好多人停低影相。
當然其中一個必去的景點就是連儂牆，有人表演音樂，我覺得呢度算係比較少遊客，有D文青味道。
反而我自己覺得連儂牆比起CK小鎮同布拉格的商業景點更加好看，因為有種原創性，而且畫得好壯觀。
原來河邊有鎖橋，不過要行近D先見到。
第二日終於離開布拉格準備返香港，離走前買左一個公仔同埋杯煲返香港做手信，不過返到香港先發覺個煲設計係有問題，曬錢。
先飛去法蘭克福訓返一晚先，由於最後一晚，所以對自己好D，搵左一間商務酒店，早餐好豐富，終於唔係Ham and cheese，有我最鍾意食的腸仔。
床都好舒服，辛苦左咁耐，最後要慰勞下自己。
酒店旁邊有間日本餐廳，嘩，雖然係貴左d，但係真係好用心好好味，態度超好，仲好過我響日本，所以食得好開心。
返到酒店數錢先發覺原來用左幾張歐羅，仲剩返勁多銀錢，慶幸冇比人偷錢，記得有一日將袋放在瑞士青年旅舍出左街成日，返黎先發覺亂放，好彩冇唔見錢。
好啦，準備出發去機場，臨走戴返頂帽自拍一張先，紀念一下自己的旅途。
飛機餐，幾好味，同埋飛往香港的飛機竟然冇咩香港人，旁邊個鬼佬飲左6-7罐啤酒，好西利，我就飲返橙汁，飛機幾好訓，但我都睇左成5套戲，滿載而歸。
旅行就到此結束，回想起，自己最常聽的幾首歌分別係:
蔡依林《倒帶》
Gfriend《Rough》《Navillera》
G-Eazy & Kehlani 《Good Life》
Coldplay《Hymn for the Weekend》
Blackpink 《AS IF IT’S YOUR LAST》
冇呢幾首歌陪伴，可能旅行都未必去得咁開心，雖然最後有少少天陰，但大部份都是好天氣，覺得福氣又安康，無咩遺憾，歐洲，短期內亦都唔洗再去，或者去下其他地方，同埋陪下屋企人朋友會更好。
最後要多謝我的妹妹們，響旅程其間比左好多支持同埋幾晚就同我煲電話粥，當然仲有師兄們的協助，2017年，裸辭去左7個歐洲國家旅行，都算不枉過!