由Dresden轉機去布拉格，捷克，最後一個要遊歷的國家，原來咁就40日了。
來到布拉格，感覺比我想像中舊，但係地鐵都算正常，比起巴黎的地鐵好一點，而且好多遊客，所以也不用擔心，縱觀全程，冇比人偷過野，不禁覺得其實歐洲係十分之安全，用正常心態去睇緊D財物就已經可以了。
人地話布拉格多小偷，我又真係見到有個女人響地鐵鬧個呀叔偷野，不過都係小事一單，反而可能窮鬼比較多就慘D。今次住響旅遊區，所以大部份都係有錢人。
地鐵站都比較古舊，我逗留左捷克兩日，完全係冇買過地鐵車飛，似進入無人境，因為根本就冇閘門，車站口亦都冇職員看守，雖然有閉路電視，但係唔知有冇人睇，D人亦都好早放工，咁都慳返唔少錢，比人捉到都唔知點。
酒店方面，揀左一間古蹟酒店，要行樓梯，冇lift，不過佢地服務態度幾好，比我拎行李上去，住得都幾舒服，冷氣好勁下，閉在如果唔係天台房，個天花係平會好D。每日都有生果、檸檬水仲有零食送，幾體貼，可惜我唔食，都係自己買的東西最穩陣。
我鍾意飲橙汁多D~
布拉格比較多雲，所以天色未如理想，但冇落雨都算係咁，我主要響老城區遊走。
呢面天色會靚D，感覺上同Dresden好似差唔多，但係人就多好多，尖塔頂係綠色的。
維他瓦河。
呢面睇仲有藍天。
好多遊客都響布拉格玩同影相，講到非去不可咁，我自己就覺得雖然建築係幾好睇，但係其實個城市主要都係靠古建築支持住，但係我又唔覺得政府有好好保育到古建築，好多都比人劃花。
不過個舊城區係幾好行，一排排的建築，而且行去河邊就好易認到路。
大概等於城門河兩岸到第一城的距離咁，我覺得馬鞍山海濱好似靚D。
好多人響建築門口影相，其實我響度諗係咩心態呢？我覺得自然風光影下都可以理解，但係響古老的建築旁邊影相，殘殘舊舊，問心我又真係唔覺得幾靚，但係個個都會做，影完就走。
呢D景就叫靚啦，好有高樓同長河先係靚景。
最好就多D陽光，我覺得紅色屋仔遠望都幾靚的。
早陣子迷上左聽古典音樂，見到其中一座好多遊客影相的教堂(聖尼古拉教堂)，冇咩人行入去，我就行埋去啦，先知有音樂會，百幾蚊一場左右，幾平，於是就買左飛去聽，坐到最前。
結果係不知所謂，女高音表演精彩，但係小提琴手的技藝真係好差，巴哈小提琴協奏曲，拉唔到上D高音，反而出面橋上的小提琴表表演精彩得多，而且免費，所以音樂當變成一門旅遊門票生意，質素可能未必咁好。
查理橋上音樂表演者，好精彩，但我發覺佢地好多都拉同一首歌，幾激昂好聽。
呢個都好精彩，臨上機前我決定將所有散銀都派曬比佢地，所以冇咩帶散銀返香港，當係支持下佢地。
黃昏日落的magic moment，藍色天空同埋河，夾岸開始著起金光，好夢幻。
另記，布拉格食物。
發覺自己之前洗太少，洗左幾張歐羅，剩返30幾張，所以呢幾日就食好少少。
飲杯捷克啤酒，解渴但唔識分好唔好飲。
叫左個Guláš，又叫燉牛肉湯，因為太肚餓，所以覺得都幾好味，同埋幾地道，不過其實同牛腩都冇咩分別，可能香港仲好味少少哈。