行行下真係覺得有點熱，就決定搭架的士，上到的士，司機問我去邊，就答恆春，好似有個古城，去下亦無妨，睇下有冇野買。司機就開始渣去恆春，行車途中同佢傾下計，分享下去歐洲，佢表示奇怪，因為我地好似冇咩特別地方想去，又好似唔係好知想去邊，仲響度大言不慚，真係傻!
之後司機建議我地不如租電單車渣下，我都係第一次聽，之前從來冇聽過去台灣渣電單車。本身冇車牌，唯一係識踩單車，佢話好易，而且平過係咁搭的士。細想又覺得佢都幾好人，有錢都唔賺，仲車埋我地去租車店門口，親自落去同老闆娘講我地情況。
我心想，人一世物一世，學下都無妨，平時唔見有呢種勇氣去學車，而家反而神推鬼就去學渣電單車，無牌駕駛! 仲要車埋我妹兩條友，背著個大書包，唔知一陣會發生咩事。
司機同我地講ok，我地就落左車告別，填左一份表，700蚊台幣任踩一日，除開每人90蚊港紙，馬鞍山龍運租單車全日都要80蚊，而家電單車平成咁，抵玩!
之後老闆返左黎教我渣電單車，佢講得超熟練，言辭間沒有半點廢話，簡潔。
我坐上架車，一扭掣，個身即刻飛出去，佢叫我慢慢扭，唔好急，唔係坐後面個人會chok親，然後叫我渣去前面紅綠燈轉彎返黎。
我心諗嘩，咁遠，我都未上手就要響馬路同D渣左幾十年的司機同行，比人撞撞命都冇，到時真係要claim保險，唯有渣得勁慢，去到路口要轉彎，我直情落車推部機車去過馬路，成個傻仔咁。
慢慢終於跟到其他車，渣到返去租車店，可以開始我地亡命之旅!
想渣去邊？唔知道! 老闆娘比左一張地圖我地，話貓鼻同白沙灣景色唔錯，可以去，我地決定去，但睇地圖都唔近，好在直路，老闆話見到7仔轉彎，跟路牌指示就去到。