今日開始將會去高雄玩4日3夜，嚴格黎講只係得兩日，因為我只係請左一日假。
星期四夜晚9點機，星期日上午11點機，不過有里數，機票免費，住宿都係900蚊港紙全程，平玩高雄!
最慘係今日要training，去上環總部，唯有拎埋個書包去。
下午5:30上完堂之後就馬上趕去搭機場快線，半個鐘就到左機場，唯有搵個位訓陣等埋大妹佢黎，行李箱要放埋恤衫西褲皮鞋顯得更少位，無法，閃遊係要咁玩。
一切都好順利咁，趁仲有少少時間食個三哥先，可惜叫雞肉佢比金菇我，仲要唔辣，可憐!
今次搭國泰有飛機餐，好快就到左高雄，大約十一點左右，搭個地鐵就到高雄車站，搵左間響附近的酒店，捷絲旅高雄站前館。
由於去到已經好夜，所以落7仔買少少野飲就上返黎，準備第二日旅行。
第二日，我地大約9點鐘落去食早餐，發現都幾多香港人一家大小黎呢度旅行，好多都係一仔一女。食完野就決定去左墾丁先，可能聽日再去台南。
搭捷運去左營，之後一出見到大巴，就去買票，天氣都唔錯，不過車程都幾耐下，搭極都仲未到，我地決定搭去終點，之後再搭返轉頭去高雄海洋生物館，我都幾鍾意去水族館，期待!!
終點站係小灣，但係我地見D人全部都在墾丁大街落車，於是都落埋一份。
買左支冷泡茶，決定行去小灣。我發覺行去小灣都幾遠，行左成幾個字先到，小灣真係名乎其實係小灣，個灣好小，但天氣都唔錯，係曬左少少，影完相我地冇落水，就行返去大街。
響大街買左少少紀念品之後，就去一間有魯肉飯的餐廳食，叫左木耳、竹筍、蝦球、蚵仔湯，每樣都好好味，特別係竹筍，因為香港冇得食，不過得肉燥飯係平，其他都要40蚊港紙一道菜，食到好飽，比起香港小菜味道好似清新D，不過一向對飲食要求唔高，呢D就比較適合我。
好味!
食完野繼續上路，向大街方向行，但係又唔知去邊好，決定行去南灣，往回頭方向行，行左一陣就到，風和日麗，一個冇咩人幾靚的沙灘，幾大浪，同西貢浪茄相比，其實差唔多，都係水清沙幼，但係去西貢就好平，呢D唯一好係鄰近餐廳，因為去西貢郊野公園，基本上係冇野食的，呢度係有渡假feel，同埋多水上活動。
行完南灣，繼續前行，其實去旅行之前，有睇過少少資料，知道大概各景點的位置，但係冇咩特別非去不可的景點。以前去旅行會想去曬plan左的景點，而家反而想不期而遇，就咁亂行其實都唔錯，地圖都費事睇，反正墾丁四處皆是景，人又唔係好多，除左曬少少之外都幾好行。