我地就渣住駕車跌跌碰碰咁出發，初時極擔心平衡唔到，渣得超慢，後來平衡到，就渣得放鬆D，時速由15公里上到37公里，好好玩，超有成功感，估唔到學親咩都半桶水的我竟然可以幾個字學識電單車，響公路度奔馳。
那刻，我覺得自己有幾分似Mission Impossible的Tom Cruise，成功!
大家都好留意住7仔位置，好驚渣過龍，同埋又冇手開google map，真係靠估，最後比我地搵到7仔位置，跟其他電單車轉彎，條路慢慢愈黎愈闊，我地停低架車影番幾張相紀念一下今次的壯舉。
好鍾意呢種有achievement的感覺，而且仲有獨一無二的經歷，有種經歷生死全身而退的感覺。
台灣D路真係超級易行，基本上直行就到左貓鼻國家公園，入場費超平，30蚊台幣，裡面可以行的地方都唔算好多，但係可以行高少少望到海，應該係台灣海峽，影相唔錯，而且仲可以俯瞰巨浪拍岸的情景，型。
全個公園都好乾淨，又有水飲有紀念品買，而且人流唔算好多，我地行下影下相，但又怕趕唔及7點鐘搭最後一班去高雄的巴士，所以都唔敢停留太耐，所以急急腳就走。
要比較，我覺得貓鼻有少少似蒲台島，D景色都好，但不及塔門，可惜塔門而家太多人了，我讀大學的年代人少D，多少少世外桃源的感覺。
好啦，跟住我地去拎車，已經非常熟手，上車仲可以拍下片，其實都幾危險，一直在玩命。
衝呀，下一站係白沙灣，租車店大叔話呢個季節白沙灣日落方向應該係最靚，可惜我地冇時間，等唔到日落，只係渣車去到沙灘影左幾張相就走，同樣地，沙灘好靚，冇咩垃圾，人唔算好多。
之後睇下時間，發覺原來仲有個幾鐘先到七點，但係去唔到太遠，於是我地決定渣車去恆春，因為租車店響附近，可以遊一遊城內。
點知又行錯路，結果要U TURN，橫過大馬路，對新手的我都係一個挑戰，好刺激!!
通常樂極都會生悲的，入到古鎮都好順利，冇咩問題，後來行左去民居，一條冇車的道路，我直情，左扭右扭，見到掘頭路，就打算U turn啦，點知渣左落去一個駁位度，由於速度好慢，我都失左平衡。
醒目的我當然跳車逃生，全身而退，但係大妹唔知，就訓左落地下，我大叫:「撞車啦。」佢就應聲倒地，我當堂嚇到標尿，即刻拉開架電單車，拉佢起身睇下傷成點。
佢隻手肘黑左，我以為擦傷得咁嚴重，用手拍下，原來只係污糟左，奇蹟生還!! 不過佢隻膝頭都有輕微擦傷。當時仲要落大雨，兩個人戴住頭盔站在風雨中，無奈!
我地兩個嚇到呆左，企左響度，唔知係咪腦震盪，企左陣先執番架車，今次冇事可能因為佢揹著我個日本買的大書包，落地時擋一擋，但係諗返都覺得好危險，下次都係唔好亂咁U turn，始終平衡力都唔係好足夠，加上突然間落雨，條路濕滑好多，訓練不足!
咁我地慢慢渣架車去附近便利店買張膠布，反正落大雨，大家就坐響度玩下電話，台灣便利店都幾好坐，涼涼地，總結番頭先意外，不忘同二妹三妹報告我地的陣亡，yeah! 文學老師教落: 嚴殺盡兮棄原野!
還番架車比美如租車店，我地就行返去恆春踏大巴，嘩，條路原來咁遠，渣電單車一陣就到。
半路仲落大雨，最後去到恆春站，去個廁所坐一陣大巴就到，我地就上車，架車完全係冇人，渣返去途中仲熄埋燈，都幾好訓，好舒服，只不過車程長到訓醒都未到。
返到酒店差唔多10點，我地hea陣決定出去食宵夜，就決定搭地鐵去瑞豐夜市，響巨蛋站旁邊。夜市都幾多野食，我地坐低左買左碗魚蛋湯黎飲，頹頹地我幾鍾意飲。後尾我見D雨愈落愈大，就想買宵夜返酒店食。
買左幾款宵夜截的士返酒店食，杯出櫃的觀音烏龍都幾好味，個炒麵夾多士都幾特別，蒜香豆干就太辣了，鹽酥雞返到酒店凍左唔好食，都係最平的肉燥飯最好味，日日都食肉燥飯! Yeah!
食到飽到傻，睇下台灣偶像劇同天才衝衝衝，就訓覺，旅程雖短，好似發生左好多事咁。