今日定了去三支香，我地下午2:30左右響青衣地鐵站集合，之後去馬莎買左少少乾糧，就搭的士去長青邨馬路邊落車，沿青康路行上去。
天氣果然係好熱，陽光好猛，雖然查左太陽油，但我都要開遮先行到。
行到一個涼亭停左陣再行上去，不過呢條路算係易行，一黎冇咩斜山路，幾乎全部都係樓梯，二黎都幾多樹木，唔會望到崖邊。
三支香就係三座山，高低起伏，路程唔長，由於長青邨本身地勢都高，所以好快就已經上到半山，望到葵涌一帶的景色，仲望到大帽山、針山。
呢個方向應該係望緊香港東北，最高個座大廈係如心廣場，尖尖地的山就係針山，左邊再高的就是大帽山，前面就係青衣樓景，勉強見到少少藍巴勒海峽(Rambler Channel)，個度曾被評述為15個最佳觀賞日落的地方，藍巴勒海峽對面一處綠化就係葵涌公園，但係以前係醉酒灣 堆填區，到今時今日依然係廢棄，只有香港賽馬會國際小輪車場，另外將一部份的堆填區分配給香港板球總會以作臨時板球場地之用，其餘地方未能開放比公眾。
再行去另一個方向，就會見到青衣西部的油庫，香港大部份油庫都係呢度，例如埃克森美孚、中石化、加德士之類，仲見到條青馬大橋，遠睇都幾正，下面就係珀麗灣。
三支香除左第一座山可以望到上述的景色之外，第二支香基本上就冇咩睇，全部都比樹林遮住，要行到第三支香先有景可以睇。
由第三支香遠望，可以睇曬所有貨櫃碼頭，最清楚當然係9號貨櫃碼頭，青衣島就係9號貨櫃碼頭主要係現代貨箱碼頭(九倉68%及招商局27%)，同埋8號HIT(和記40%同中資60%)，對面就係1-7號，呢度就係全球第六大貨櫃港。
呢幾日的土地大辯論，其中一個方案就係響貨櫃碼頭上面起樓或者騰空碼頭的地建屋，望住呢度咁大幅地，如果搬左佢地都幾壯觀。
第三支香仲望到南昌一帶的私人樓，望到西九龍ICC同埋對面港島的建築物，最大座的莫過於係汲水門大橋，好大座，座落響昂船洲上面，第一次見到咁多大大小小的建築物，五顏六色。
本來旅程黎到呢度都無咩難度，同網上所講一樣，三支香唔算一條好難行的山，可惜我地見到個大叔，佢話繼續向前行有條小路可以快一點落到山，朋友睇過，網上話呢條路非常崎嶇，但阿叔話跟佢行就OK，好易行，於是我地就相信佢跟佢行。
點知條路都的確比之前的路崎嶇，因為唔係樓梯路，而係山路，中間仲有D大石頭，都要手腳並用先落去。
但我地發覺落到半路有個小懸崖，呢度可以更近地望出去貨櫃港，而且睇到成座山的樹林，都幾震撼，值得行落黎望下。
由於行程趕急，我地都拿拿聲行落去，我覺得有戴對手套應該都唔難行，不過有D位冇咩石頭，差錯腳可能會跣落去，建議著對防滑能力好一點的鞋會好D。我呢？著AIRMAX，都勉強應付到，冇仆落地下，係比較辛苦同埋花多少少時間，好彩的是，我落去個陣太陽曬唔到我地，陰陰地落去都可以接受，幾有挑戰性。
阿叔話好多行山人士唔識路就行遠左方向，結果迷路。我地跟住佢，冇行錯路，行左半個鐘多少少就落返黎地面，青衣美景花園附近一條馬路，有水務處的水管響度，之後行行下就出返大路，路經青衣IVE，順便行去美景花園搭小巴去葵芳。
總結，三支香睇景一流，而且唔難行，近市區，至少唔會好似西貢咁一去無回頭，響市區補給會相對方便一點。
原來青衣島原名叫春花落，南峰就係第三支香，334米，幾有詩意的名字，政府保留三支香，免得油庫火燭個陣燒埋青衣住宅區。