好啦，食完野我就一個人行左上去米開朗基羅公園拍夜景，睇到黃昏的夕陽，好靚，老橋條河好似識發金光咁，成個城市都好寧靜，好多遊客都好辛苦先行到上座山個公園。
我覺得為左睇日落都係值得的。
忽然想起余光中老師講過，柳宗元初登西山，流連忘返以至昏暮，心凝形釋，與萬化冥合。
雖然我未去到呢個境界，但的確流連忘返。
老橋同埋阿諾河，徐志摩口中的翡冷翠，諗起余光中去倫敦的時候好似落雨，我冇落雨黎到翡冷翠，都算係好彩。
望過對面，好多餐廳都做緊生意，睇緊呢度都係食旅遊呢個產業為主。
其實我覺得城門河都好靚，不過未必有咁多金色街燈同埋古建築，所以先被比下去，換轉變曬白色燈，可能個浪漫氣氛都冇咁突出。
呢個角度直情見到月亮，可能十五，比較圓，橋上的燈暈搖曳在波上，冇諗過可以睇到咁清的倒影。
老橋的店白天是賣金飾的，都係搵富貴遊客埋手，夜晚收曬檔，反而有好多遊客就坐低左，欣賞四周街景，我覺得佛羅倫斯最美就係街燈，係街燈令到呢座古老的城市添上咁多浪漫的色彩。
橋的另一面就通返去馬路，見到有人拎支紅酒坐上橋上面飲，我都買左一支水坐低一個人慢慢飲。
第二日，繼續行下呢座舊城區，其實佛羅倫斯好細，我覺得1.5日已經行完，呢度係教堂附近的女人街，加上日落時間好夜，所以變相其實等於響香港留左3至4日啦，所以唔洗安排太多。
今日黃昏，我都走左去橋邊睇日落，不過好似冇第一日咁靚，好多時候，初見的感覺往往最難忘，最靚。
呢度突出左一道堤之類的東西，好多人就行落去坐低，可惜距離太遠，我冇落去，水漲時會蓋過一D位。
呢度係遊客區比較出名的熟食市場，我都幾鍾意黎，因為收到都好夜下，所以唔洗怕夜晚冇野食，同埋價錢方面平D，中文叫中央市場，英文叫Mercato Centrale Firenze。
其實都好多餐廳選擇，所以唔洗擔心，而且涼涼地，設施都幾新同乾淨，人又唔多，所以好值得黎呢度坐下，反而出面露天餐廳又貴又要排隊，多人。
我呢個位睇到意大利人點樣整薄餅，成餅野車落個爐度烤。
第二晚醫肚餓，我都黎返中央市場叫左個意大利粉。
黎意大利食意大利粉，好味道，不過覺得佢好似落左勁多芝士粉，可能香港都整到哈，今次終於冇中伏，好野!
附記:
黎到意大利，點都要食番杯雪糕，呢間雪糕店完全冇人，響遊客區旁邊，奇怪，唔知點解冇咩人幫襯，明明上網睇佢拎左佛羅倫斯雪糕大賽冠軍，意大利雪糕，gelatio，無論營養價值同埋成份都比起香港普通雪糕好，難食極都應該OK吧。
一試! 叫左款士多啤梨，又真係幾好味，今次旅行都幾好彩，法國巴黎食到貝蒂永Berthillon冰淇淋，意大利又食到gelatio，雖然我本身唔係雪糕控，但係食到唔同款式都開心。
呢間雪糕店叫做Arà is Sicilia，無咩人排隊，真好，服務態度都幾好，識聽英文。
食完雪糕，其實佛羅倫斯仲有一樣食物都比較出名，就係三文治，好似有好多唔同款式，我睇介紹去左一間特色三文治店，是但叫左個當日推介，汁係燒汁，好多火腿片，食落都幾有口感，而且可以望住佢點整，好似覺得自己叫做食左D幾特別的食物咁。
當然，三文治係幾好味，不過呢麵包係比較硬D，同埋比我揀食一次就夠，因為都係麥當勞豬柳蛋比較適合我哈。呢間店叫做SandwiChic。
仲有一樣開心就係佛羅倫斯有港式十蚊店，Tutto 99 Cent，方便我買幾支水返去，唔洗一歐一支，都幾大支下，平過英法，其實好多人話意大利消費貴，我覺得小食還可以接受，如果要食正餐就真係貴，至於我，對水的價錢比較敏感，如果要多過1歐買飲料就覺得心痛。
畢竟香港一支水先4蚊，而且好飲好多。