本來完全係冇諗過去Cinque Terre，2017年之前我根本唔知道世界上有一個咁樣的地方，而且我仲會走埋去，諗番起，其實我點解要去呢度呢可？
威尼斯太遠，而且感覺好似好商業化，羅馬多賊多人，南意比較落後，加上自己去左咁多城市，好似仲未去過漁村，國家公園就去過七姊妹，一於去下意大利大澳!
火車首先會經過Pisa，可惜我冇時間去比薩斜塔。
之前聽過意大利火車好似治安麻麻，我去到又唔覺，座位都好新，冷氣又涼，又多遊客，基本上大家都係守望相助。
黎到五漁村的Riomaggiore，就係我居住的地方，呢幾日天氣雖然唔係全部天晴，但好好彩冇咩點落雨，一去到仲有陽光，本來未去之前見天氣又落雨又行雷，而且咁好天真係執到。
因為所有野都Book，已經好難改行程去就天氣，所以真係唯有望天打掛。
呢度由於面積唔大，好多屋都係插針咁依山而起，而且五顏六色，好適色影相。
我間民宿，要自己拎行李上去，好彩D野都食曬，比較輕鬆。
呢條樓梯就係通我間屋，都幾斜，拎住D野食都唔知點開門。
放低行李就出去探險啦，依家天色尚算晴朗，之後愈黎愈多雲，我當時一直暗暗擔心幾時天陰。
呢張算係難得佳作，可以睇到房屋錯落有致，有時候覺得影相呢家野睇個天多過個人技術，因為冇咩靚機，呢張好靚呀!!
路上見到的藝術作品。
望住地中海，海子作過首詩《面朝大海，春暖花開》:
從明天起，做一個幸福的人
餵馬，劈柴，周遊世界
從明天起，關心糧食和蔬菜
我有一所房子，面朝大海，春暖花開
餵馬，劈柴，周遊世界
從明天起，關心糧食和蔬菜
我有一所房子，面朝大海，春暖花開
雖然我沒有一所房子，暫時唔洗餵馬，劈柴，不過可以周遊世界，都好好彩。
而家就等我都面朝地中海，想學日本經典純愛電影《情書》咁大叫一聲﹕「你好嗎？我很好。」
沿住海邊慢慢行。
遠望到D錯落有致的房屋同埋車站，我諗世上冇咩地方有這樣的奇景。
搭左一轉火車去左五漁村最遠個條村Monterosso al Mare，呢度有個好靚的海，不過灘就麻麻，遊客一於少理，專心玩水曬太陽。
太平盛世。
有時候我都覺得鬼佬好勁，咩位都可以訓落去，街邊亂石，席地而睡，自問自己都未做。
行入城區，見到好多餐廳，同埋紅棕色小屋子。
有D青色的水果樹，唔知係咪青蘋果？
行到黎呢度，本來都打算返屋企，見到上面有條路話可以行去另一條漁村，心諗不如行去下一條村啦咁早，而且天色都唔錯，加上好似有咩愛情路。
可惜我呢個決定令我陷入萬劫不復之地，如果我當時知道行落去會點，我諗我唔會揀行呢條路。
下篇待續。