今日下午一時離開薩爾斯堡，終點站係德國的德雷斯頓，但係中間會先響杜塞爾多夫轉一轉飛機，中間要留到夜晚7點先到，所以有半日時間行下呢個城市。
呢個城市聽講係德國最多日本人的城市，而且生活指數都好高下，係一個幾宜居的城市，所以我都想試一試行下。
先將行李放響機場的寄存站。
呢度火車係響道路上面，在半空中行駛，有少少科幻高科技feel。
好啦，到左市中心就展開我的漫步之旅。
呢個城市比我的感覺係幾有城市設計，行得人好舒服，道路都幾闊幾乾淨，天氣都尚算唔錯，唔係好曬，好多綠化同埋河流，易行。
經過一條橋，好多建築物的外形都幾特別。
我覺得如果香港的寫字樓中間有條河會幾寫意同浪漫，可惜多數都只係得綠化。
有隻獅子，雕得好西利。
呢度又係寫字樓同草地的完美結合，商業融和自然特色。
呢度係城市公園中的一個小湖，由於樹木綿密，好有世外桃源的感覺，鴨仔游游下，望住呢個景，不禁覺得愝意非常，我呢，都係比較鍾意都市中的綠洲，多過完全荒山野嶺的小鎮景致。
呢度又係好靚，水天一色，D植物種得好靚，掩映之間，建築疏落，唔影唔得。
行到出黎大河邊，呢條就係聞名不如見面的萊茵河，呢條河讀書讀過無數次，今日第一次見到，覺得同城門河都差唔多哈。
河面平靜，偶有觀光船駛過，武裝萊茵河地區預備打二戰，唔知係唔係指呢度呢？
天色都唔錯，但河水唔算特色靚，好似塞納河靚D。
附近都有教堂之類的建築比遊客參觀。
有D雕塑，好威風。
有間大教堂響旁邊，行到累就去坐下，咁又一個鐘。
黎到杜塞爾多夫呢個咁多日本人的城市，我都搵返間日本餐廳食個拉面，由於已經好多日冇食返餐好，於是叫左拉面再加多個飯，佢地好好禮貌，而且好耐冇食過飯同拉麵，忽然覺得好感動，原來亞洲菜有飯有麵係咁好味，始終鬼佬食物都係食一兩次就夠，我都係鍾意食譚仔吉仔多D。
食完真係好滿足，好想比幾十個Like佢地，竟然在咁遠的一個德國城市會食到日本菜，正呀!
下一站終於到德雷斯頓，最後3個站!
下篇待續。