一早起床，好期待，終於可以去集中營，我覺得每個讀西史的人都會想睇下二戰的遺跡，難得薩爾斯堡比較近慕尼黑，所以我就搭左兩個鐘頭火車去慕尼黑，打算去參觀下集中營。
比起奧斯威辛，其實呢度唔算係最慘，我響慕尼黑火車站門口搭架巴士，見到好多鬼佬學生同埋老師一齊去，其實都幾方便，跟住佢地就無死，一齊落車。
去到門口啦，裡面已經有唔少人，大家都好嚴肅，好靜。
呢度曾經監禁過18萬人，當中3萬人響度死埋，所以其實係幾慘的一個地方。
日光日白黎到呢度，反而同我想像中的感覺好唔同，以為係昏天昏地，好大霧的一個不毛之地，點知竟然係陽光普照的一個大廣場，咩都冇，得石路通往遠方，真係估佢唔到。
可能本身冇睇過佢係點，所以一去好驚訝，不斷周圍行。
呢D符號唔知咩意思呢？紅色三角形其實係代表政治犯、社會民主主義者、共產主義者、共濟會員、無政府主義者，黑色三角形代表反社會人士，藍色三角形代表外來移民，以及自外國的勞工。
達豪集中營紀念生還者的藝術品。
集中營監禁政治犯的年份。
大型廣場，當年應該係訓話、虐待囚犯、勞動之用。
行入去博物館，睇到歷史的簡介，當中呢幾幅畫真係令我覺得好悲哀。
點解要咁樣去對其他人種，人地都有屋企人，我唔明白政治意識型態點解可以將人性扭曲如此。
我見到有成年人睇到喊左，自己都沉默不語，可惜歷史的教訓或會隨時間沖淡，第日會否重蹈覆轍呢？見到鬼佬老師帶學生參觀完之後進行討論，還是覺得德國是有希望的。
佢地討論好認真，踴躍發言，同香港的導修又真係好唔同，我的確自愧不如。
呢個雕塑，唔知點解覺得好恐怖同慘。
行返出黎。
有集中營訓覺的房間。
廁所。
呢度一大片石地，更覺荒涼，香港好少地方有咁大片地但係又冇咩用途，反而覺得突兀。
呢道有條大路通向一座類似教堂的物體。
就係呢座紀念塔之類的物體。
我坐左響裡面好耐，耐到甚至門口影相D人都望住我，可能我係咁攝鏡。
再四方圍參觀下。
呢度好似係有病的人會調黎呢黎存放，後來變埋停屍間。
再將佢地的屍體放落墳化爐。
響咁恐怖的一段歷史中，當下的安詳形成左一種好強烈的對比，事過境遷，回想起，再睇返歷史，都不期然會覺得，有種恐怖，雖然很遙遠，但其實又好似好近。
香港人，有幸唔洗經歷呢種災難，希望人道價值可以永存。
之後返左去慕尼黑，但係發覺太早，德國的火車未到係唔會比你上早一班，所以唯有在車站坐返幾個鐘先可以上，行下書局咁，因為附近自己都唔係太熟悉，加上有點兒累，所以都係hea下。
德國城市冇我想像中咁乾淨，其實慕尼黑都幾舊下，同埋我都幾驚有D咩恐怖襲擊，因為呢度好多時候都係落手對象，好彩最後全身而退，返去薩爾斯堡的台灣旅館中。
好啦，聽日我將會離開奧地利，飛去德國東部城市德累斯頓Dresden，希望一切順利。
下篇待續~
附記:
慕尼黑市內的環境
有幾座尖塔係幾壯觀，上面一堆尖塔就係瑪利亞廣場，是啤酒館政變納粹黨和國防軍的戰場，至今只剩下幾個樂手在表演西洋音曲，充滿文化氣息。