清早出發前又再走返去catalana食多餐，因為唔知幾時先再有得食。
今次叫左杯sangría，應該係水果酒，因為有一片檸檬響裡面，睇埋維基，原來為紅葡萄酒及切片水果製成，也常加入柳橙汁或白蘭地，飲落完全唔會醉，好開胃，而且巴塞呢度天氣算係比較熱，行到出汗再飲返杯簡直人生樂事也。
正如上篇所講，我叫左個有蝦的海鮮飯，就係咁，份量太少，雖然好味，但唔識食蝦就只會浪費左，所以下次都係唔叫海鮮飯，同我想像中海鮮焗飯都差好遠下。
呢味盧筍配菌類，個汁好好味，唔知落左咩香料，盧筍好味係人都知，可惜得幾條，賣相唔錯，可惜唔飽肚。
呢個焗芝士配薯蓉就夠飽啦，飽到傻。
最後甜品我叫左個catalan cream，其實同我響南法食的cream brulee都冇咩分別，可能再焦一點，同埋上面塊薄片比較脆，味道好似冇咁甜，我覺得法式會好味少少。
食完野就搭車去魯營球場，坦白講我冇睇波的習慣，唔明白90分鐘睇住人地踢波有咩咁開心，不過見到好多巴塞球迷話一生人點都要去一次朝聖，流曬眼淚咁，就覺得，自己難得有個機會去，點都要去下，不過入場費都幾貴，早預約都要百幾蚊港紙，好啦，而家去!
穿過呢條路……
裡面有個博物館，收藏左好多球衣同埋球盃，呢個應該係蘇亞雷斯。
獎盃。我比較鍾意睇佢地同皇馬的歷史，不同的兩個族群，以足球去見證住加泰隆尼亞人奮鬥的精神，加埋場內又播埋D好激昂的音樂，搞到我都好似對佢地有種認同感。
呢個大熒幕幾秒鐘就會變曬波衫，之後又變其他野，幾得意。
好啦，出到球場，可惜球季剛剛過去，所以草地比人剷起再舖過，原來呢個球場可以容納到成萬人，都幾恐怖，成萬人一齊睇波，咁市內咪得番好少人？唔知係咩感覺。
影幅全景圖，好多遊客同我一樣都係坐響度傾下計冇咩做，或者影下相咁樣，我就仲慘，唔知同邊個講野，唯有上網睇下資料哈。
側面就係咁，D坐椅都五顏六色。
呢個德國阿伯唔識影相，叫我幫佢影，其實呢個位背光，點影塊面都係黑，我盡最大努力整光D佢個樣，佢好似好感激我。
美斯出場應該有行過呢條路吧。
去完魯營球場，我發覺好似行錯路走，行勁耐都搵唔到車搭，好似最後上到巴士，去番街市買場一set火腿片食，生食火腿其實幾咸，如果有酒送下就好味好多，但係食落又停唔到手，薄薄地煙煙韌韌，好好味。
琴晚預約到聖家堂，今日再黎，覺得及時行樂的重要，你睇下，個天灰灰地，影出黎的聖家堂冇之前黎咁靚，好彩個日有走過去影。
門口D雕塑真係顛，望到人嘆為觀止。究竟佢係點樣雕出黎？
聖家堂裡面都好大，不過感覺唔係好似一般教堂咁多長椅，反而似係一個好大的廣場，大家都望上天花，佢D柱樑好特別，有少少似樹枝，燈光都好華麗，冇一般教堂咁陰沉，不過感覺似係一個旅遊景點多於比人祈禱的地方，因為人太多。
玻璃折射出的光線都是五顏六色，好靚。
不期然又影多幾次教堂內部的天花。
光線充足，好多遊客都企響度周圍望，同影相，企響咁大座教堂裡面，忽然覺得人類其實好渺小。
好大塊碑，唔知寫左D咩。
通常去到教堂我都會坐好耐，一黎咁辛苦黎到唔好好感受下唔值，二黎座位區通常都比較靜，可以慢慢周圍望，發下呆，諗下之前去左邊，經歷左的人和事。
在香港時候反而冇咁多機會去教堂坐下，因為呢種行為會比較奇怪，但係去旅行去一個陌生的地方，平時奇怪的行為反而又變得理所當然。
隻龜好慘，比成條柱壓住。
好啦，天色唔早，我都係時候離開。
下一站黎到噴水池，等待噴水池的表演。
開始啦，我覺得成個旅行裡面最有玩的感覺，就係企響噴水池前面濕曬身，大家都睇得好開心，我覺得黎巴塞必定要黎呢個音樂噴泉，佢都左播好多流行曲，例如Coldplay的 Hymn For The Weekend，Sia的Chandelier，望住五光十色的噴泉，忽然覺得時間好似就停左響度，都市繁華，得失好似都變得冇咁重要，有種活在當下的感覺。
下篇繼續。