我決定由Monterosso行去Vernazza。
一段漫漫長路，中間基本上冇咩人，都好孤獨，唯一好彩就係天朗氣清。
上面就係我要行上去的路，以前都有行山的習慣，但前面同後面一個人都冇，就都係第一次。
有種好恐懼的感覺，行到半路仲見到蜥蝪，嚇到我係咁跑。
當我一口氣跑到上山，勁多級樓梯，真係有種筋疲力盡的感覺，咁大個仔都未試有種想放棄的感覺，但又覺得好似已經行左好多路，而家返去可能又要見到蜥蝪，於是唯有頂硬上，企左陣，喘不過去，忽然見到後面有人行緊上黎。
繼續向前行，經過一D種葡萄的地方。
見到一D標記，但係我都唔知係咩意思。
後來終於比我見到呢兩個公公婆婆，佢地唔知遊客定居民，完全係痴線，女的竟然著拖鞋行山，其實呢座山的山路都幾陡峭，甚至可以用崎嶇形容，上面幅圖就見到其實路唔係好闊。
再加上冇咩石級，好多人行出黎的路，多沙，易滑倒，後來睇番新聞先知落雨期間有人曾經響山上遇害，因為天雨路滑，所以我有命落返黎都要感恩。
我冇出聲，默默響佢地身後行，突然間有個伴令我覺得好溫暖，好似搵到倚靠咁樣，佢地停的時候我就跟住停，當然我都有同身在香港的師兄保持whatsapp，唔係都唔知點頂，明明一大清早由佛羅倫斯黎到，坐都未坐就要行咁遠的山路，分分鐘冇命，座山好多地方都冇欄杆，令情況更加兇險，因為我唔係成日行開山個類人。
個景色都幾好，呢樣係唯一值得安慰的地方。望住地中海(利古里亞海)，好彩仲有藍天白雲。
呢個位影到我好似企到出海咁濟，身處崖邊。
有遊客帶鎖黎鎖住，紀念一下，我覺得，行到呢種山的情侶要一生一世唔難，因為個對公公婆婆都好似相處左好多年，老伯依然會先行落去再扶佢妻子落去，好溫馨，服呀!
繼續沿著崖邊爬走。
有番D簡單欄杆同樓梯，我都比較安定一點。
佢地繼續領前。
好野，望到終點啦，終於行完呢段痛苦孤獨的行山之旅，見到有遊客想由呢面行入我頭先行黎個面，可惜天色變陰，日頭都慢慢消失，後來更烏雲密佈，唔知佢地點？會唔會半路放棄呢？
慶幸我在天色好的時候行完，算係在異地完成一次行山，人去旅行我去旅行，我去到變左一個人自己行山，咩玩法呢？呢次經歷真係冇諗過，一時衝動令自己受左咁多苦。
行山途中，一直口中唸唸有詞，唱住《我要向高山舉目》，先可以戰勝呢D惡劣的環境，多謝天父! 歌詞只得一句﹕「我要向高山舉目我的幫助從何來我的幫助從造天地的耶和華而來。」
原來我總共行左7.78公里，用左1小時20分鐘完成，其實唔算行左好耐，但係對我黎講好似玩完一個camp咁漫長，我永遠都唔會忘記自己曾經如此玩命。
外國旅遊網站有以下評價: If you only want to hike one trail for the experience, I’d recommend the blue trail between Monterosso and Vernazza. This is the hardest hike, with lots of stairs and narrow passages, but is the most rewarding!
好野! 完成一個壯舉! 向下一站出發。