巴黎的第一日早上，我好早就搭地鐵黎到奧賽博物館。相比羅浮宮，我更愛奧賽，因為這裡比較開揚，行得好舒服，反而羅浮宮有種長時間響地下的感覺，加上人太多，展品也多，行得很辛苦，雖然多野睇，但係行到腳都斷。
人少少可以望企響度望下雕像，好迫真，線條都好靚。
博物館有好多大型的宗教畫像，我幾鍾意睇，幾震撼。
呢個位置係奧賽博物館的樓上，好多人都鍾意影呢個鐘，感覺時間的流逝，天氣好望上去都會見到藍天白雲，是但亂影都好似有種古典、藝文的感覺。
昨日天陰，今日見到雲層慢慢退去，博物館的頂層外面可以出面透透氣，食番支煙仔，當然我就唔食的，睇人地自拍，望下塞納河，今日都算幾好彩，唔洗迫餐死。
慢慢去其他館，會發覺愈黎愈多畫自己係睇過的，見到幾個歐洲人拎住本簿響度仿繪大師畫作，佢地用鉛筆都畫到好真，服左佢地，西利!其他人就企定定，呢度比較少中國人。
呢幅印象派的畫作，似日落多d。
我同呢個石像姿勢都差唔多，眼金金望住外面條河。
呢個花瓶好熟口面，幾靚。
個個鬼佬都係咁影呢張，梵谷自畫像，我覺得佢個身後面d線條有少許恐怖，不過印象幾深刻。
呢幅都係好出名，好似係醫生黎。
石像形態各異，栩栩如生。
呢個姿勢都幾特別，返香港要借d書研究下到底佢響度做緊咩，之前都唔多時間睇咁多，幾得意。
上面個金字塔係貝聿銘設計，好似係大師作品，不過我個人對於羅浮宮的這個設計就感覺麻麻，有種坐井觀天的感覺，唔覺得開揚，或者係我自己問題吧，而且成個溫室咁，裡面都好熱下，冇咩冷氣。
羅浮宮的中央廣場，四個方向都有不同的展館，我行到好辛苦，總算走馬看花的看過一次，用左成幾個鐘，後尾太肚餓食左個午餐，只係薯條漢堡包，成$200，但冇咩力氣冇計。
佢d天花裝飾嘆為觀止，睇到我條頸都有d痛。
呢條樓梯幾有電影感，我幾鍾意行，滑滑地，輕鬆。
我覺得羅浮宮最值得睇係一d大型畫作，因為唔多地方可以展出咁大張畫作，可以睇到每個人的神態，企後少少睇有種宏偉的感覺，不過有d位會反光，所以要行去唔同位置睇畫。
前面成堆人排隊去影蒙羅麗莎，其實咁細張，聽講好似仲係假，大家都肯慕名黎，包到咁點睇都唔清楚啦，似係一個打卡熱點多過欣賞藝術，我影一兩張就走了。
埃及獅身人面像好巨型!
石棺，好多展品我都哄到好埋睇，結果比管理員勸退，不過有時候企去d中國導賞團旁邊學下野，聽下歷史導賞都唔錯。
呢座牛頭像都幾宏偉。
行完終於出返黎，天色愈黎愈好，我都忍唔住行下塞納河，d水都幾碧綠，雖然我個人比較喜歡城門河，但係睇下都好，始終好多文學題材都以塞納河為靈感的來源，好多遊客影相。沿岸有人賣二手書畫。
天色放晴，得番少少雲。
橋的中間，見到這樣的景色，我都嘩左一聲，上天對我太好啦，竟然好天!
頭先響對面行過黎，這樣的景色很巴黎。
呢個位靚呀，坐低傾計訓下覺一流，我覺得係成條河最值得hea的位置，有種明信片的感覺，幾夢幻，雖然現實係好曬，但係坐響度感覺浪漫，香港有幾多人有閒情逸緻坐響度睇風景呢？呢度生活的節奏都好似慢左好多，舒服! 環遊世界就係要咁。
巴黎聖母院，多人到傻，後面d雲好靚，我就企響度睇下佢外型就走，雖然之後幾日都路過，但係次次都勁多人，根本入唔到去，逗留巴黎得幾日，時間無多，無謂浪費響呢度，不如周圍行下仲有意思，其實沒有甚麼景點是非去不可的，隨心所欲。
d人話要去龐畢度藝術館，我都跟住去下，原來係睇現代藝術，即係更加抽象，有更多裝置藝術，不過座大樓設計幾特別，千其唔好浪費左張博物館通，一定要用盡佢，咁先值回票價。
樓上有空中樓層可以遠望到聖米歇爾山的景點，望到哂成個城市，而且唔算太高，都好舒服，建築物好整齊，最鍾意登高遠望的感覺。
有個大水池，水天一色。
行去唔同角落睇景。
d畫就唔識睇，畫得幾得意，有d畢卡索畫的，不過我又唔覺得悶，只係奇怪點解佢地個腦會畫得出呢d咁得意的畫作呢？唔知代表咩意思？幾正!估唔到我竟然唔抗拒呢d藝術。
今日最後一站係蒙馬特，響法國兩日，感覺上呢度治安完全冇問題，網上d遊記真係搵笨，放大佢地治安問題，其實法國都幾太平，根本就唔洗咩攻略要住邊一區，正常根本唔會比人搞。
記得網上遊記提到蒙馬特呢度有座教堂，雖然靚，但係好多手繩黨，即係班黑鬼衝埋黎將繩套落你隻手度然後收錢，唔比錢就唔比你行上黎或者行落去。至於我係點樣上去？首先我跟響鬼佬後面，趁黑鬼企到悶悶地轉身怒氣沖沖咁衝上去，心裡面諗住邊個搞我就比佢見識下我拳腳，結果好輕鬆就上左去。
剛好撞正有少許日落，好多旅行團同鬼佬都坐響度吹水傾計望住成個巴黎景色。我都坐埋一份，觀察下佢地，浪漫，難忘。
一條友行上去，日光日白真係鬼有事咩，如果因為誤信網上傳言就冇黎到真係可惜!
上到高少少的位置，影番張相先，一覽無違，成座城市，一大塊平地，香港的確少見，但我鍾意香港多d，有山有水。
除左手繩黨，都有d紀念品黨，賣水賣酒的，不過基本上都冇咩野，我行黎行去都冇人聊我，冇人察覺到我，存在感低的人去到邊都係不易引人注目的!
轉身望下座教堂，係幾靚，我都有進去裡面坐坐，休息左半個鐘先出返黎，一出黎又見手繩黨，甚至乎我見到有鬼佬傻傻地比錢然後同佢地擁抱，對於我地黎講係騙，對鬼佬黎講可能其實無傷大雅，至於我點走返落去？我坐響度觀察左好耐，見到有華人同黑鬼糾纏，有的甚至鬧起交來，起初我都諗緊點落去，後來發覺非常簡單。
只要混入台灣同內地的遊客團中，很容易就落到去，佢地又以為我係團友，黑鬼見到咁大班人又唔敢埋身，我輕鬆落到去，其實黑鬼都係搵食，如非必要都未必會搞我地，唔肯比錢佢地最後都會放左你。有時候我唔係好明班黑鬼點解唔搵返正職，成日靠做呢d有咩尊嚴呢？可能巴黎經濟太差吧，令到佢地被迫要咁樣去生存，慘!
好啦，一日巴黎觀光又到尾聲，最後當然又係搭地鐵返去住宿地方煮香港帶來的合味道，好遙遠的路程，聽日繼續踏上這無盡旅途!