準備搭歐洲之星由倫敦去巴黎，之前訂左張飛，價錢好平，但係到達巴黎的時間是晚上十一點，後來計劃行程的途中見到話巴黎夜晚治安唔係幾好，而且仲要分區，每區的治安各異，於是驚驚地決定買到一張下午3點到達的車票，上面就係等候上火車的候車室。
到左巴黎第一時間就係買套票，即係十蚊歐羅有幾張飛個種，比起單買一張飛會平D，睇番幾日行程，要買兩次先夠搭，巴黎地鐵的確幾方便。
呢個站有段好長的隧道穿去另一個轉車站，類似中環站去香港站咁。
講起巴黎地鐵，第一個印象就《天使愛美麗》，好似好浪漫咁，事實上，當我親身到達之後，有幾個觀感，第一就是比起倫敦地鐵涼爽，London地鐵真係好熱，不過巴黎地鐵車廂冇冷氣，開窗還有少許風，冇窗其實都幾熱下，另外車站幾骯髒，同香港比差好遠，而且極度唔user friendly，大部份車站都係冇電梯上落，要拎行李行上去，好在我行李少，都算輕鬆。
地鐵職員未夠7點就放哂工，天都未黑，所以係搵唔到佢地幫手，至於入閘，盛傳有人會跟住其他人尾入閘，出閘就唔洗過閘機的，所以唔洗再用張飛，搭左幾次，我去到凡爾賽宮個站索性由出口行返入去，唔洗比錢，又冇人捉，勁!當然市區的地鐵站就好難啦。
記得有次我搭地鐵，停站時聽到一聲慘叫，個個人以為恐襲走出去望下咩事，原來有個黑人女人隻手比車門夾住，佢唔夠力拔出，好痛苦，那種慘叫有點像死神來了，個個都望向那卡車廂，有幾個男人走過去幫忙，有人看到她以後別過頭去，可能情景太嘔心，我就望唔到，之後就離開了。巴黎地鐵的車門要自己打開，一開始我都唔係好夠力，而且開門發出的聲響有點恐怖，所以我多數都係等人落跟手先落，不過歐洲好多地鐵都係咁，唔明點解唔學香港呢，一次過開哂咪仲方便。
記得有次我搭地鐵，停站時聽到一聲慘叫，個個人以為恐襲走出去望下咩事，原來有個黑人女人隻手比車門夾住，佢唔夠力拔出，好痛苦，那種慘叫有點像死神來了，個個都望向那卡車廂，有幾個男人走過去幫忙，有人看到她以後別過頭去，可能情景太嘔心，我就望唔到，之後就離開了。巴黎地鐵的車門要自己打開，一開始我都唔係好夠力，而且開門發出的聲響有點恐怖，所以我多數都係等人落跟手先落，不過歐洲好多地鐵都係咁，唔明點解唔學香港呢，一次過開哂咪仲方便。
車廂內有人會拉手風琴賣藝，動物都可以上車，所以有時候車廂都幾臭同污跡斑斑，盛傳多小偷，不過我就冇比人偷過錢，反而係去到布拉格地鐵站見到有女人罵一個老頭，話佢偷野，個老伯每次都係等列車就黎到站的時候偷人野，咁就算失手都可以即刻走，唔洗比人捉住。
好啦，搭錯左幾次車之後終於黎到Airbnb個站，其實離市區都有段距離，不過見網上治安話唔錯，於是就揀呢間，價錢都唔平，幾晚要2000幾，有生之年再黎一定會揀正市區酒店，因為黎到呢度好似唔係法國咁，好多房屋的形狀都好似香港D單調的工業大廈咁樣，比起香港，巴黎市區/旅遊區的建築係幾有古典味道，但係大部份人都未必有能力住響市區，一去到類似巴黎市中心外圍的地區時，房屋就會變左單調實用為主，冇咩特色可言，反而比人一種冷清的感覺。
講起Airbnb，先講下附近的配套啦，其實今次係一個幾好的體驗，因為真係去左一個正常巴黎小區住，好似去左香港的新市鎮咁，但係感覺唔係太好，第一個原因係呢就星期六黃昏的時候去到的，發覺超市就關門，之後星期日唔開，星期一至五關7點，所以我其實好難夜晚返黎買到日用品，因為附近根本冇7仔，街市關左門，餐廳銀行都關哂，巴黎人習慣好早收工，之後我估佢地可能返屋企啦，因為條街都唔見得好多人，比起倫敦的熱鬧，巴黎算係比較冷清。
另一個原因係街道都係一般乾淨，有點似馬鞍山的恒安村，我樓下都可能乾淨D，我住的那座住宅有升降機，大廈門前有一對情侶在露宿，女的穿金戴銀，染髮紋身，極度MK，和男人在地上放了一張床墊就當自己的家，還和其他路過的人談話，周圍放哂佢地日用品，旁若無人，唔明佢地平時去邊度沖涼，或者落雨時候點算，始終係街邊地方，真係奇人，我不禁響度諗，其實佢地過住呢種餐風飲露的生活開心嗎？當下雖然燦爛，可是將來不知道會怎樣。
睇下我間房啦，擺設都唔錯，當然對我黎講全部都係冇用。
唯一有用係張台，因為可以手寫日記，不過間房冇風扇，焗到傻，好彩我有帶小米，夜晚都勉強頂到，通常我都唔會點訓，睇下片，facetime下，玩下facebook，又輕易渡過幾個鐘。
靚過我屋企，我有生之年唔知有冇一間咁大的房間，可惜室雖大冇咩有用的東西，屋主係一個呀婆，成日去旅行，住這裡的那幾天她去西班牙旅遊，全屋基本上是我的，享受住大宅的感覺，有許多圖書，可惜全部法文，哂氣!
呢個方向係我訓落床望的方向。
推開房間的門會有一個小露台，種了一些玫瑰花，幾有詩意，可惜多蚊，夜晚要關掉，一條友我好少企出去，影完相就返入房。
景觀都叫開揚，對正交匯處，風水黎講，兩把利刃穿心，唔死都一身散，哈。
仲有少許時間，走出去望下，見到有人獻花，我決定去香榭麗舍大道行下，感受一下巴黎的黃昏，浪漫的氣氛。
巴黎的黃昏呢就係8-9點，因為9點15分左右先會日落，所以呢段時間個天灰灰地，其實幾有詩意，條大道又幾好行，算係比較乾淨，我一個人疾走，見到得意野就停低望下，餐廳就貴到傻，望下就算數。
呢間LV好大間，門口有個電子螢幕，好大幅蒙娜麗莎，天色漸黃，正是林文月老師口中所講的雲興霞蔚，宜乎躑躅，適於徜徉!!
最後行行下比我行左去凱旋門，呢幅企響馬路中心拍的日落，我覺得都幾端正，冇上去啦，因為我有少少肚餓，之後搭車返去住宿地方，都用左半個幾鐘，之前倫敦青年旅舍冇熱水沖唔到杯麵，今次黎到巴黎有廚房，正好煮返個合味道，香江味道，家鄉情懷，真係好好味，送清水一流，響外國食親都係burger king，食番個合味道先有種正常的感覺，人去旅行我去旅行，竟然咁掛住香港食物，食個刻，突然好想食譚仔、吉仔、M記、茶餐廳。
咩係浪漫？藝術史的角度而言，浪漫主義指背叛規矩，以對比及衝突性的激情給人們感官上的悲壯之美，今次旅行，冇女朋友冇朋友咩都冇，冇人冇物，唯一同浪漫有關可能係背離咗自己一貫的生活方式吧，食杯麵先發覺其實我媽媽煮的東西其實都幾好味。
旅行才開始了十分之一，餘下的日子怎樣過呢？哈，下回繼續。