巴黎，第二日行街，由於購買博物館通，冇理由唔去多幾間，於是我就趁今日去多幾間博物館，今日天色初時有雲，慢慢就少D，街道殘舊，充滿獨特的風格。
第一站先去橘園美術館，裡面有好多好長的畫，呢幅係睡蓮，係最出名個幅，其實都係一pat野，印象派，究竟當時畫家係點畫出黎呢？
出面天色好似愈黎愈好咁，風景如畫。
之後繼續行，見到特別的畫就影低佢。
呢幅幾有意境，日暮黃昏，可以代表自己。
跟住去羅丹美術館，呢度有好多特別的雕塑，呢幅係雙手。
又係雙手。
呢個就係最出名的沉思像(Le Penseur)，好多遊客都有影相，初時黎到個天陰陰地，多雲，雕像黑沉沉，後來臨走時見到雲層散去有一絲日光，即刻把握機會影低。
美術館附近有一條綠林小路，旁邊賣雪糕，我都比面買杯試下，幾特別，不過試一次就夠，之後坐一陣休息下，因為都行了不少路。
綠林小路盡頭有一個大花園，呢度係花園正中間，藍天白雲，法國好多呢D康莊大道，氣派盡顯，可惜一池污水，不過睇相係幾靚，唔好行埋去就得。
繼續行，離遠見到巴黎鐵塔，之前已預約最頂層觀景台，時間尚早，可以慢慢行下先。
好啦，行到佢下面，座鐵塔都幾宏偉，底部幾巨型，彎彎地幾壯觀。
門口等待，睇唔少遊記話排到傻，有飛都要等，我反而好順利，一馬當先，佢一開我即上，搭Lift，好快就上到塔頂，冇咩點塞住，反而後面D人有少許鼓譟。
我輕易進去，不過出面D人唔知點解入唔到黎。
好啦，上到塔頂，係幾壯觀，見到大路好似切蛋糕咁樣將城市整齊分割，而且望到好遠，有種不枉此行的感覺。
呢張好似仲清D，望到塞納河同埋藍天白雲。
人地話塔頂好大風，我又唔多覺，溫度都幾怡人，可能剛好上面有朵雲，唔算好曬唔算好大風。
行了好多個圈，望曬四方八面的景色。
好多遊客都眼金金，亦到見到有遊客上到黎半條人命，因為佢地唔買飛，就咁行樓梯上黎，唔早少少買定飛就係咁啦。
近距離望下鐵塔的組件，好複雜下，屹立於巴黎，成為城市的象徵。
望多兩眼又係時候上路啦，今次好幸運，都算係天朗氣清，如果落雨或多雲，影出黎或者未必有咁靚。
上面個層望落去。
之後有D肚餓，係時候做巴黎人食番餐法國大餐，網上幾個Blog都推介呢間餐廳，我就行黎試下。
侍應哥哥幾好人，未食野都有水同硬麵包比我食，由於呢幾日都冇啖好食，加上今日又冇食早餐，於是我食曬D麵包佢，佢地都再添D麵包比我，感動。
未食野就飲下餐前酒先，我唔識叫，問師兄紅酒配紅肉，呢杯係我叫侍應幫我揀選的，味道都幾好，不過我本身就唔識飲紅酒的，所以咩酒飲落去都覺得好味。
頭盤係三文魚，幾啖就食完，餓到傻，好味。
主菜就係呢個燜牛肉薯仔煲，由於我完全唔識法文，所以我都係是但指樣菜，叫個Set就算數，味道唔錯，牛肉都幾入味，可惜熱到hihi，而我又餓到傻，所以都食得幾辛苦，下次肚餓可能叫其他冇咁熱的食物會更加好。不過，其實相比香港呢個菜只係普通牛腩，睇巴黎旅遊書都有話係經典菜，我就覺得同香港牛腩都差唔多咁好味，D汁我都飲哂。
好啦，時間都唔早，食完野都8、9點，費時入夜再返去，恐怕有危險，於是做個乖孩子，返自己屋企，返到去就剛好日落，玩下Ipad就訓著左，又過左豐盛的一天了。