將要離開巴黎前往Provence了，對於巴黎沒有太多的不捨，因為好想去下一個地方，睇旅遊雜誌同書就形容為薰衣草花海，雖然我對於花海就不算太熱情，但係睇下都無妨。
搭火車由Leon Station去Avignon，不過呢我住的民宿就唔響Avignon Centre，而是要再搭一個站的Avignon Montfavet，所以路程都幾辛苦下。
上面呢個就係Avignon城外的火車站。
終於搭到黎Montfavet，呢度係一個小鎮，相傳Rodin的女伴Camille Claudel後來同Rodin分左手之後痴左線，就係住響呢個小鎮的精神病院裡面。
一去到民宿，我就拿拿聲睇下超市幾點關門，呢間超市響教堂旁邊，教堂就你成個鎮的中心所在，睇到尖頂大概都會估到自己的地理位置，因為而家已經8點幾，雖然仲係白天，但旅程將會響明天開始，所以我去超市買支橙汁。
可惜，不幸的是，回家路上聽到一隻狗吠我嚇到IPHONE 7跌到落地，角位有少少花左，好彩Mon冇裂到，都算不幸中之大幸。
上面就係個座教堂，都幾舊下，唔知幾多百年歷史。
成個鎮鬼影都冇，得我一個人拉喼行去民宿。附近環境係幾好，有公園，道路都幾乾淨，不過有種人跡罕至的感覺，真係適合療養多D。
繼續行，要用10幾分鐘先行到去民宿位置，係一堆村屋的其中一間，日頭行都唔算太恐怖的。
好啦，到左民宿，呢間算幾好，有風扇一把提供，雖然都係冇冷氣，買左一支同蘋果汁今晚慢慢飲，野食方面就仲有幾個杯麵同出前一丁，勉強可以應付，屋主係一個年輕女子叫Sarah，間屋得佢一個人住，神出鬼沒，幾千呎大屋。
廚房都幾大下，右邊推門出去仲有泳池。
客廳都好大，不過我就唔多想住呢類大屋，因為打掃好辛苦，而且比較似美劇D屋，成日凝住有鬼彈出黎，夜晚間屋愈大愈恐怖，何況附近咩都冇，行10幾分鐘先有一間超市，冇任何娛樂，而且間屋得一層，一望出去就係草地石屎路，出外一定要靠車。
所以冇車的我呢幾日只能步行出去觀光，行到而家腳爭都有少少痛，所以要早點休息一下，不過響外地唔知點解又唔覺得寂寞孤獨，一個人，反而覺得好多野都好新鮮，第一次住咁大間屋，廁所又真係幾乾淨，唔明佢一個人點樣清潔都咁一絲不苟，另一樣唔明係，唔開冷氣又住得偏僻，夜晚應該好多蚊下，唔知佢點頂，我就靠查白花油去應付，呢幾日都唔算辛苦。
如果有地方可以有冷氣就好，而且原來附近有7仔係一件如此美好的事，唔洗下下擔心幾時關門冇得買野，如果半夜口渴都唔知點樣忍受。
房間Wifi訊號唔係咁好，成日斷斷，好彩下載左幾本Lonely Planet夜夜慢慢睇，好快就訓著左，因為9點幾日落，夜晚至深夜凌晨都只係得3個小時比我整理一下。