今日是留在巴黎的最後一天，上午收拾行裝，一場來到法國的巴黎，許多人都說要試Paul這間麵包店的牛角包，其實我由細到大都未食過牛角包，覺得個樣好奇怪。
呢刻我決定去買番個試下。
呢間就係Paul，唔同分店評分都有高有低，呢間評分都幾高，不過我唔記得左響邊，好似響Lyon車站附近，因為我今日下午將會由Lyon搭火車去法國南部，GO!
牛角包係呢個樣，食落好脆，句恰到好處，以為好油，原來又唔係，人間竟然有這種麵包，而我做左廿幾年人都唔知，真係失敗，返香港得閒可以買黎試下。
食完之後再附近行左一陣，最後今日，不知何年何月先可以再黎，行左個幾鐘之後就到左下午，上火車前都想食番餐法國菜，師兄推介去上面呢間餐廳食青口，佢話唔錯。
未上頭盤之前有麵包同餅，由於唔識法文關係，行左咁耐有D口乾，所以就叫左一杯啤酒飲下，好大杯，大熱天時行左咁多路，飲杯啤酒就最舒服。
頭盤係蔬菜沙律，味道同香港都冇咩分別，見D侍應都幾忙下，我就一個人坐響度玩手機打發時間，旁邊有個呀婆食緊青口。
飲左幾啖啤酒，師兄同我講，今次弊啦，原來青口係唔應該配啤酒! 因為青口比較鮮，啤酒比較濃味，係應該配白酒先係，我唔叫都叫左，問佢點算，佢話叫我點杯白酒，啤酒食哂野再飲。
於是大家可以見到我係叫多左一杯白酒，後來仲上埋薯條。
不過其實又幾好，先講青口，我都係第次食青口，原來好易食，以為要用好多開殼，但最後用把叉一插一扯就可以食到青口的肉，鮮甜，而且冇沙，比我想像中乾淨，D湯都煮得好好味，配左白酒的確係唔係搶左青口的味道，而且凍凍地好正。
呢餐真係正，之後薯條配啤酒又係一絕，餐廳人流唔算好多，坐得好舒服，悠閒地自己一個食午餐，響呢個地方，冇任何人識我，我亦都唔洗理其他人，鍾意食咩就食咩，真係覺得好開心。
不過唔記得最後比左幾多錢，好似都要百幾200蚊。
甜品就係士多啤梨同雲呢嗱雪糕，好味，呢餐完美，比起上餐牛腩，我更加體會到法式風情，法國菜冇我想像中食成幾個鐘，但係係有一種悠閒，我諗要一個鐘差唔多，侍應都好識做，上完一樣一樣，同香港速食然後走人係呢種不同的生活態度。
呢度就係間餐廳，環境同佈置幾都幾優雅，不過外面係大馬路，人來人往，衛生情況差過香港。
好啦，準備出發去法國南部，繼續一個人的旅行。