好啦，終於向住旅程的最高點少女峰進發!!
所謂風吹草低見牛羊，應該係咁的環境。
食得都幾滋味。
又再一次上到黎轉車站，響呢度就要直接搭車上去少女峰，由於溫度太凍，我怕凍到連我出去行都行唔到就無謂，加上旅程基本上得T同埋一件小cardigan，於是響呢度的旅行用品店租左一件風褸同埋一對雪鞋，事後證明係幾有用，因為冰天雪地完全唔怕凍，同埋唔會滑倒，但反而冇咩人會去租，奇怪，可能佢地自己帶左衣服替換。
好多人都趁未上山影下相先，呢度商店都比較多，因為係上山必經之路。
呢個位都望到幾遠下。
未有車，於是我就周圍行下影下。
好啦，由於我冇比多D錢，所以排另一條隊，但係我發覺另一條隊又係即刻上到車，而且又有靚位坐，所以都覺得有D奇怪，不過唔好理啦。
D座位係幾靚，幾四正，而且好穩陣。
好啦上到黎，終於望到一望無際的雪山啦。
聲稱係歐洲之顛，其實就唔係，不過以纜車上到的地方可能係，因為不費吹灰之力就上到黎，3,571米，人生最高的記錄，雖然未有喜馬拉雅山一半咁高。
出面都幾凍，結曬冰咁，好多人影相，我都有幫人影。
地下係穿洞的，好以望到下面，開頭我都有少少驚，唔敢行，後來又覺得一場黎到唔行下的確好曬，結果死頂行下，點知愈行愈順，仲克服埋畏高，記得6月去大阪搭天保山摩天輪個陣仲係好畏高，唔夠膽張開眼，估唔到而家已經得心應手啦，係人生的一個小里程碑。
兩座少少突出的山峰，原來就係僧格峰同埋少女峰，終於望到，響前面，旅程的最高點，高山呀!!!有種目標達成的滿足感，不枉我由馬鞍山走到黎少女峰，瑞士的高山。
其實好多時候都好多雲，但係等等下，行幾個圈，忽然又會見到雲層散開，望到下面的山景，又係一幅好震撼的景象。
呢幅係最清楚見到少女峰的相片。
好多人都有影相，其實如果我有帶衫或者唔洗著到咁厚走過黎。
繼續觀賞雪山景致。
呢張都好近影去雪山度。
後來落左去，穿過一個山洞會見到有雪地可以比人任玩，有好多高空遊戲，我唔敢亦都唔想曬氣，於是自己行埋一面坐低睇下，我發覺係冇人會坐低，好多行左幾步就走左，因為個場地都好大，所以我行到好遠自己一個坐低冇人理，拎舊雪玩下，原來雪的感覺係咁，同埋拎隻鞋刮下D雪，剷起雪堆。
好多雪。
呢度就係雪場，其實真係任玩，但路就比較難行，見到有人又PK。
呢幅係我坐響地下影去入口班人個面的，一個人坐下hea下都幾舒暢。
落到山仲要趕過去一個地方唔識讀，因為之前見UTRAVEL介紹有個滑梯，於是BOOK左，行經見到有跑山大賽。
黎到車站，行左幾個字，原來都幾偏僻下。
仲要搭架纜車上去。
架纜車會播一D輕快音樂，都幾搞笑得意，車長幾有禮貌。
纜車上山可以望到成個小鎮景色。
好啦，玩呢個滑梯，可能我買左玩一次啦，覺得D人都幾hea，冇咩點樣理我，其實就幾易玩，不過冇咩景色睇，同埋上去時有少少危險，因為得支棍比你渣住拖上去，架車就斜上，好彩時間唔長，可以接受，不過冇咩特別，走到咁遠玩都幾無謂。
玩完滑梯就搭返纜車返去條村度，好彩最後都趕得切最後一班纜車。
下篇待續~