離開琉森，今日將會係一日漫長的搭車之旅，因為要去Hallstatt，被喻為奧地利的隱世小鎮、仙境，仲被列入世界文化遺產。
先搭火車去返蘇黎世，然而呢就搭飛機去薩爾斯堡，再由薩爾斯堡搭去Hallstatt。
一早狂搭火車由山區出返去市區，15:48先搭緊飛機去薩爾斯堡。
16:51終於到左薩爾斯堡去Hallstatt的巴士站，響巴士站買左幾個杯麵同埋橙汁，一陣個面冇野食就大劑。
風景好治癒，相比之下，奧地利比起瑞士少D山，多D田野同平原，好似畫公仔的圖畫咁，D屋都係一模一樣，之前去京都的美山町都見到好多田野，但係相比之下，呢D似乎更加童話feel。
巴士開往bad ischl，開頭我見咁複雜，仲諗緊會唔會好難去到，結果原來勁易去，巴士又冇咩人，又好坐，司機渣得都好穩陣，沿途風光旖旎，好似貼在玻璃的圖畫咁樣，難得仲要咁好天，未去之前睇天氣報告又話麻麻。
開頭我都盼望天氣只要好似五漁村或者琉森咁樣唔好落雨就心滿意足，點知，竟然會勁好天，而且5點至6點呢段時間夕陽金光餘暉灑落田野，有一種it’s now or never的感覺，下次黎都未必有咁靚的景色。
好啦，到左bad ischl，發覺要等半個幾鐘先有車再開，於是我唯有放低行李(相片中央)，周圍行下，發覺成個站附近係咩都冇，得一兩個人同我一樣等緊車，極度偏僻，但無論你去到幾偏僻都好，都永遠會見到韓國人，韓國後生仔真係痴線，成日去旅行，去到邊度都見到佢地。
成架車真係得幾個人，火車都幾舊下，幾有種風味。
根據維基，1849年，弗朗茨·約瑟夫選擇在此建立夏宮。1853年8月19日，弗朗茨·約瑟夫和茜茜公主在此舉行訂婚儀式。1854年，皇帝的母親蘇菲，將皇帝別墅送給他作為結婚禮物。別墅成為皇室的夏季居所；弗朗茨約瑟夫稱之為「地上的天堂」。
但我覺得呢度好偏僻，好似咩都冇咁哈。
車廂外望出去的景色，湖靜到完全可以反映到個倒影出黎，加埋落日，好有詩意。
黎左hallstatt對面的Obertraun，因為Hallstatt，好多房間都已經比人Book左，所以唯有響佢對面的小鎮Book間房，事實上又真係平少少，好多一家大小都呢度，不過呢度餐廳勁早關門，又冇7仔，好彩買左杯麵。
呢間旅館都幾乾淨，冇大衛旅館咁恐怖，但係尾房，wifi訊號係完全冇，咁我第二日就落去同個經理理論，佢開頭又話apple iphone唔得，跟住我話ipad都唔得，佢又話所有apple產品都唔得，我問佢咁你點知邊D得邊D唔得，跟住佢就開始發脾氣，我叫佢賠返少少錢，冇wifi我根本就唔會黎(湊巧手機數據又用盡)，我又唔知邊到黎的勇氣竟然用英文同佢對話，平時好日都唔講下英文~~
佢死都唔肯賠，又話我好rude，我都冇辦法，唯有上booking.com投訴啦，結果返香港之後booking.com賠返百幾蚊比我，我就算啦，不過負評左呢間旅館，因為服務態度真係好差，而且個男人又係變面高手，一見其他人又笑咪咪，最後我臨走同佢講左句廣東話粗口，否則真係難消心頭之恨。呢度風景咁靚，但係竟然比佢煞風景，可惜!
響Obertraun搭船就可以去對面Hallstatt，時間大約15分鐘左右，一架船好少人，而且可以睇曬成個湖，旅館響正湖邊，行都唔洗點行，所以好舒服，上面張相係剛開走的船隻，佢地見到我之後就渣返黎載埋我，好好人呀。
船主的兒子負責收錢，好得意，如果買埋回程的車票可以平D，我唔記得左買，所以價錢會貴少少。
遠離我的旅館，個天好曬，影到好似明信片，事實上當時景色真係無得彈，痴曬線。
群山都影得好清楚。
我坐正船頭，迎風前進，大家都冇咩點出聲，好好享受下呢段小船之旅。
唔知冰天雪地響呢度搭船會係點？可能根本連船都唔開。呢度係十四湖中被譽為最靚，長5.9公里、寬2.3公里，面積8.55平方公里，海拔高度508公尺，最大水深125公尺。
對面就係Hallstatt，傳說中的渡假聖地。
慢慢見到少少建築物的模樣，不過都曬下，曬到我都有D怕，希望快D到岸有陰的地方乘涼。
愈黎愈近了。
到啦，一眼就見到建築物好整齊，好靚的小鎮。
湖光山色，一個人旅遊好方便，輕鬆就可以黎到呢到。
遠處比較少人。
岸邊有好多天鵝，佢地唔怕人，專登會游埋黎。
下篇我將會落去行下，待續。