第二朝落去酒店2樓食早餐個陣我見到前面條友熟口熟面，原來係健吾同渾水，佢地著住一模一樣藍色T-shirt，食野都不忘用電腦工作，我地就係咁食，冇理到佢地。
食完野搭捷運去高雄圖書總館，想參觀下圖書館係咩樣，發覺都好大，而且D書係呂中圖書館包書法，冇硬膠，懷念當年做librarian的日子!
我發覺呢佢天台有個花園係完全冇人，個景好靚，由於圖書館前面塊地未有規劃，所以呢企響天台花園可以望到會展同高雄港，附近的高樓大廈都望到，可惜香港好似冇咩地方的圖書館有呢種天台花園。
之後呢我地去返地下間翰林茶居，因為太熱想涼下冷氣，我點左杯熊貓珍奶，好好味，飲得極快，下次一定要黎再試，香港D珍珠奶茶我通常都飲唔曬，呢杯又唔算好甜，珍珠都幾有咬口，我妹叫左杯人蔘茶，都幾滋潤。坐左陣又係時候要出發啦。
今日的活動其實唔算係旅行，因為只係去左大遠百掃貨，買下手信咁樣，所以省去，買完野搭的士返酒店放低野，再搭的士去南豐食魯肉飯，再搭的士去駁二。
駁二除左基本倉庫比文青影相之外，原來仲有一大片草地，以前應該係路軌黎，好多人放風箏，影下相，幾有氣氛，之後我地去左倉庫買下手信，幾有文青feel，行左成個幾鐘，出返黎已經天黑啦，就決定搭捷運去鹽埕區。
點解我地去鹽埕區，我都唔知，可能想搵下有冇魯肉飯吧。
去到鹽埕區，發現個捷運站好多小丸子裝飾，於是我都影下相，扮自己去左日本，是但搵左個捷運出口。
發現左呢間開響路旁的米線店，裝修到好日本feel，而且都幾乾淨。
我叫左碗普通米線，發現配料竟然係魷魚! 本身真係唔鍾意食魷魚，冇咩味又好難咬，但係呢一份食落去好新鮮，而且唔難咬，切得整齊又靚，影出黎好似雜誌D美食相咁。
估唔到佢地上菜咁快之餘仲可以賣相都如此精緻，雖然冇實體店，只係路邊搭出黎的店，但係都幾有風味，唯一奇怪係個魚蛋，唔係好合我口味。
之後我地返左酒店，就咁樣完左我地2日的高雄之旅，翌日朝早就搭飛機返香港了。今次旅程雖然短，但絕對係物超所值，因為機票唔洗錢，酒店有兩個人分擔，好過一個人去，而且仲玩到電單車，食物好味，由於冇睇旅行書，唔知咩係墾丁駁二，只係睇到網上話可以去下，反而有種驚喜感。
唯一慘，就係買左返香港的峰蜜蛋糕手信竟然係過期! 2016年到期，勁! 好似係大遠百買的~~