咁去完四面佛，我地就去拉差達夜市，事緣偉哥師父強哥做導遊，話呢個夜市好正，遊泰必到。
其實我都唔係好信強哥，不過姑且去下，同埋見個夜景好似唔錯，影下相都無壞。
點知去到就唔得了，呢個夜市同JJ Market好唔同，劃分得好整齊，好好行，掃完一行又一行，而且左邊係買東西，右邊係食野，都幾多野買，有衫褲手錶之類，我買左少少褲之後就去右邊攤檔掃街，正呀，燈火通明，新夜市果然係唔同玩法，拉差達，好野! 強哥，勁!
坦白講，我就唔多鍾意掃街，因為唔乾淨，但係呢條街D食物擺設我又接受到，還可以，同埋真係勁平。
串燒10蚊串，即係港幣$2.5一串，痴線! 而且燒牛柳真係好好味，我買左一次又一次，口渴就買個椰青或者可樂，痛快! 仲有個公仔麵攤檔，大家都覺得好好味，我都豁左出去，放下身段掃街。
本身打算食完野去影相，點知會合完偉哥佢地就落勁大雨，慘啦，冇得影夜景。
唯有去商場避雨，由俊宏用遮接我地過去，我地仲比偉哥師父鬧左一餐，鬧我地冇幫俊宏手，咁我地又係衰左D哈，唯有認下衰仔。峰爺餓到傻，淪落到食麥記，服呀!
避完雨本身佢地打算另有節目，後來又傾傾下冇左，同埋聽日大家要去巴提雅，所以一早要起身搭車，唔想咁夜先訓，所以最後大家一齊搭地鐵返酒店。
睇下峰爺幾可憐？哈。
都係搭的士返酒店算。
我呢？其實精神充足，仲想玩多陣的!