返到酒店，酒店職員同我地講，原來我地係要今朝早check out，因為我地係冇book到今晚響酒店訓。
咁多隻眼望住都可以book錯，爽呀!
咁我唯有勉為其難用英文同佢地爹兩句啦，最後佢地話好啦，加幾舊水泰銖就可以訓多晚，真係平到傻，當時心想早知就黎到泰國先book酒店啦，原來仲平，真係羨慕自己!
返到房，偉哥就問我想唔想出去，估到佢想食野啦師父，於是我就搵下附近邊到有宵夜店，個陣時係凌晨一點鐘，比我搵到間叫55泰式料理餐廳，距離近，菜式賣相正常，好!
就去呢間，叫埋俊宏，我地3條友出動，其餘兩位年紀老啦，留響酒店訓覺。
出面依然落緊少少雨，但我地有理冇理，著拖鞋殺出去，出奇地今次Call的士非常順暢，個司機又好乖仔咁跟住我的指示去行，好快已經到左間餐廳，老闆都幾好人，我都幾肚餓，馬上叫野食。
今次餐廳難得有象啤，即刻叫3支，象啤味道淡淡地，用黎送濃味的泰國菜真係一流。
食神們又響度點評菜式，笑左。
幾樣菜都好好味，酸酸甜甜，食到我都好飽，覺得咁至係人生，去旅行點都要有少少即興活動的! 好似當年同偉哥響福安夜晚食宵夜咁，當時我仲記得係讀緊大學定唔知考緊高考，可惜間小店已經執左，變左地產代理，懷念!
響一個狂風暴雨的晚上，我地為左食，的確可以去好盡。
好享受鋤的士佬價的過程，每次鋤佢幾十蚊都覺得自己賺左好多。