今早多雲，本來預定的行山活動亦推辭了。
至11時見天氣開始變好，唔忍心浪費左星期日，於是馬上起行至上水。
由坪洋行到去新界東北堆填區，發覺冇得入，於是穿旁邊的小路去石水古道，後來見唔到石水古道，亂行左幾條山路。
其實有少少想放棄，因為堆填區的味道好臭，而且石級都比較高，後來見到儲泥區方向有路，於是繼續前進，在轉角處搵到古道入口。
繼續向塘肚古道前進，古道的路唔算太好行，但勉強都可以應付，比起剛才響堆填區外圍的山路更加易行，有絲帶指引，可惜沿路都係樹林，冇咩風景。
今日就係靠呢D路標去行。
曾經想行上山頂，但係太多野草密林，所以放棄，打算就咁行去蓮麻坑。
中間都見到有邊境禁區的指示牌，就繼續行走。
沿著絲帶繼續行。
慢慢沿古道行，好彩有絲帶指引，D林都幾密下，冇D絲帶都唔知點行，古時D人真係西利。
今次路程的特點就係沿路有好多粗樹幹攔路，要俯身輕輕穿過，幸好冇咩昆蟲。
去到一個分岔路，本身打算企響度食番個包，但係老黃想向另一面行埋睇下有咩，我諗住落返黎再食，點知響樹林中間見到一間小屋，跟住發現原來呢間就係傳說所講的廢屋，好多行山客都MISS左。
我只係覺得奇怪，點解桌上放左本爭鳴，好有鬼屋feel，而家係我較光左之後屋內的情況，唔知當時D人點樣起呢間屋呢？
打算去露台食番個包，見有樓梯就上，原來佢天台非常開揚乾淨，一片大平地，最適合玩航拍，而且可以望到蓮麻坑村同埋深圳個面的建築物，令到本來亂行密林的旅程忽然有驚喜，好開心，我地玩左好耐，我都食飽飽。
上面個景好靚，見到下面有人行過，我大叫呢面有野睇，可惜佢地向後望一眼之後更加加快腳步行，可能佢見唔到間屋但係又聽到有人聲，以為撞鬼都唔定，呢間小屋就好似結界咁。
你我若有緣，總有機會相遇上。
天台門口。
落左屋仔次後一段易如反掌，輕鬆到傻，平路一條，好好行，天氣更加好，我地繼續向禁區進發。
到達蓮麻坑村，見到公園有幾個呀伯，成條村好靜，難得有個大魚池，有山有水。
全景圖就係咁。
行出村口，難題來了。
蓮麻坑村唔係禁區，早幾年開放左，但係通往呢條村的唯一道路是禁區，換言之，我地要沿禁區旁邊的山行，行到非禁區的大路先可以等小巴。
圖為禁區的入口警崗。
左面係禁區，我地只好行右面的山路直行。
有好幾處都幾高下，有難度，要手腳並用。
好彩行山客預備左繩子比我地，我地拉住繩子上山。
從小山的高處可以見到中港的邊界，左面係大陸，右面係香港，甚至可以深圳河的最窄處，仲見到一條國際橋，當年村民要走「國際橋」來往耕種，出入此村都要帶禁區紙。
禁區的一段直路。
終於走出大路，完成左一日驚心動魄的堆填區山路之旅，全程都密林開路，一開始都覺得好似行錯路，甚至一度想放棄，但係行完之後又覺得好刺激，少少成就感。
黃昏的蓮麻坑村，再會!