其實去旅行影到一兩張自己覺得好靚的相片會覺得不枉此行，今次我終於得左。
成功去到鴨川捕捉到magic moment，就係太陽日落個天最藍個刻，燈光亮起，似夜未夜之際的照片係好難忘。
呢度係鴨川附近的餐廳，好靚。
好多人都坐在響河邊，我地都把握機會坐低輪流影相。
影左個小毒男獨望對岸，唔知佢係唔係日本人，神情何以如此哀傷？
好啦，坐左陣大家都肚餓，於是就去左町內搵下有咩餐廳好食，其實金光閃閃都幾有氣氛，好似返左去古代，有D人真係著和服，好多燈籠，都同埋街道兩旁的建築都古色古香。
好鍾意伸個頭望下小巷內的人事，好有詩意，寂寞嗎？
由於三妹做錯事，所以今晚的晚餐由佢負責搵餐廳，結果佢上完網話呢間餐廳評價唔錯，叫柚子元。
我地都響門口等左陣，本身極度討厭排隊，而且見裡面好似好少位，所以一度都想放棄去第二間，好彩臨放棄之時有得入去食。
坐吧位，而且望住個廚房，其實個廚房都好普通，唔明係咪真係咁好食，不過打邊爐我都鍾意的，姑且一試。
叫左一個套餐，個日本人話份量好多，三個人食應該好飽，我原本想叫多D，佢叫我唔好，咁我就算啦，仲諗點解有生意唔做咁得意。
就係呢盤魚肉啦。
呢度的特色就係呢個柚子湯底。
開始食啦!!嘩我發覺從來未食過咁好味的食材，樣睇落普通，但食落去，柚子開胃，我想飲曬成煲湯，樣樣食材都好有驚喜，超鮮味，本身我就唔鍾意食魚同蝦，因為有骨同埋麻煩，但今晚真係係咁食。
我地三個人都話勁好味，未食過咁好味的火鍋，超滿足。
平時我好多時都會搵自己食開的東西比較，黎日本咁耐都覺得食物固然好味，但香港比貴少少都可以食到，但今次真係痴線，無與倫比，有種想喊的衝動，完全係不枉此行!!!
唔怪得網上咁多人讚。
叫多碟餃子。
食完成碟野，有少少飽，但真心太好食，所以我同師傅講要多一份，佢都呆左，問我地邊度黎，我地答香港，佢神情驚訝，心諗邊有人咁大食。
但事實上太好食，同埋佢點野食個醬又係無得彈，我覺得旅行就算中幾多伏都好，只要有一件好開心的事情發生，你都會覺得抵返曬，最緊要三妹高興，咁我就Happy~
叫左杯清酒飲下，透心涼，打邊爐一流!
臨走再三多謝師傅，估唔到佢間野器材簡單，但係咁好食，睇黎食材真係一間食店的靈魂，雖然店內環境擠迫，但係好有氣氛，我地係咁食，好少可三條友食得咁開心，分享同一碟食物，返到香港依然對呢間餐廳念念不忘。
行左成日都好累啦，望住個夜景，街燈有幾種色，覺得今日雖然有浪費時間，但係亦隨緣遇上驚喜，一群人旅行，總有一群人的樂趣。
三妹帶罪立功，yeah!
下篇待續~