第二朝，我地搭新幹線由大津直達神戶旁邊的姬路城，目的就係為左睇日本最出名的古城。
呢座城好似係少數冇被戰火破壞的，可惜天氣麻麻，不過無損大家雅興，仲好，唔洗咁曬。
當然，如果冬天或者陽光普照黎，一定會更靚，因為而家D植物都好普通，冇櫻花或楓葉。
一入去就見到好大片草地，已經有好多人去緊。
漸行漸近，白雪雪的一座古城。
開始又要行山之旅，樓梯，斜路，衝!
D石頭有好多年歷史，唔知以前D人如何堆砌出黎，歷經戰火都仲響度，奇跡。
行到上城頂，見到成個城市，我地就係沿住前面條大馬路黎的。
要攻頂，就要除鞋仔，一步步行斜樓梯上去，其實都有少少高，每步可踏上的空間不多，而且又夜，老人家都係唔好勉強。
頂樓就係六階，即係要行足6層樓梯，轉到傻，頂樓好多人，大家行到上黎都有種興奮的感覺，成功!! 事實上咁大座城，上到黎的確有種滿足感。
望出去俯瞰成座城市，D人都變到好細，估唔到神戶大地震都冇震散呢座城，唔知下次黎佢仲響唔響度呢？希望。
個細路都捐個頭出去望。
古舊的樑木。
姬路城的模型。
樓下有棵大樹，肯定好多年歷史啦，我地行埋去都顯得好細個。
下面近距離望，好巍峨。
之後搭返去神戶食野，我覺得呢個城市半空中都幾多電線，算係比較落後，唔知D日本人望天個陣見有咁多條線會唔會覺得好煩呢？
想去呢間神戶牛肉店食野，排到傻，右面個位哥哥都幾好人，雖然佢唔識我地D話，但係指手劃腳叫我地走，因為原來已經賣曬D飯，好慘，最出名果然唔易食。
後來我地響幾個街口後搵到間餐廳，因為時值3-4點，好多食店都曬午餐或者落場，所以難得呢間有就試下，神戶牛好大塊，肉汁鮮甜，薄薄地，肉質有口感，脂肪比例我都好喜歡，最正係D汁，好濃，撈飯一流，好快已經食曬，好味，原來神戶牛係呢種味，又真係難怪佢咁出名，想食多碗呀!! 可惜。
下篇待續~