本身今日就預約左一架由園部開去美山町的旅遊巴，之後打算去天橋立同埋伊根，但係細妹起身遲左出門口，錯過左班車，搞到我出門時都有點唔開心。
後來諗諗下算啦，旅行唔應該為左追趕時間表，大家隨心遊歷就算。
於是我地決定繼續用我地自己的方法去，首先就搭的士去日吉駅，坐日本黑色的士，真係好貴，其實個司機都算幾好人，肯載我地去，比著香港司機要去西貢D偏遠村落，可能多數都唔肯去。
黎到日吉駅，先發覺原來2點先有車，但係而家先12點，所以即係表示我地要坐響度兩個鐘頭等一班巴士，其實都幾辛苦，我地去附近行左一個圈，發覺根本冇任何食店或者便利店，於是只好返到去車站等。
等待的途中，我地都好好反省左點解今朝會遲出門口。
行左出去，發覺附近盡是民居，天氣唔錯，但我地竟然被困於荒山野嶺之中。
企響度好耐，心諗附近D人到底係點樣維生？咩店都冇。
終於可以上巴士啦，我覺得前面的女學生好勁，當巴士去到一個位停左車，佢即刻落車跳上另一架車，然後兩架巴士即刻開走，日本人準時程度真係得人驚，如果是但一班巴士遲少少都可以令個女學生搭唔到。
香港，等巴士是常態，早到是幸運。
到美山町，呢度被譽為係隱世合掌村，其實係一個茅屋群，用茅草搭成的屋子，呢度係一條寧靜的村落，四面環山，搭車過程見到好多尖尖的樹，妹同我都覺得好似人工種植上去，大自然的構造實在奇妙。
呢條村好少人，好好行，每條都是小路。
正面睇茅屋又覺得好可愛，屋前的花朵都五顏六色，好靚。
由於搭車搭得太耐，所以好肚餓，去附近唯一餐廳食左碗蕎麥麵，麵粉係用呢度天然麥粉造的，所以別有一番風味，的確係好日本feel的美食。
美山有條好長的河流，好似拍戲的場景。
垂釣、拍照。
上面有條橋。
細妹行左上去，但係條橋的欄杆奇低，而且當地都幾大風，我好擔心會被風吹吹下差錯腳跌到落去，所以都小心翼翼。
就係呢條橋啦，可惜黎得太遲，天都陰陰地，但係去到一個世外桃源，四周忽然變得好靜。
條橋都幾宏偉，橫跨長河之間。
近距離拍攝茅屋。
附近好多小路可以探下險。
好多小花，可以衝入花叢之中拍攝文青照片。
花海都幾靚，日光之下相信會更加美麗。
好清新，好似宮崎駿的動畫情節。
好多綠色小路、田野。
落返黎見到插秧的稻田，幾奇妙。
稻田比人一種溫暖的感覺，加上附近霧氣漸重，周圍都是山，更加有種身在仙境的感覺，疑幻似真。
禾田。
睇完稻田我地就等車走人啦，準備返去市區。
我覺得去旅行或者可以試下去一D冇咩人去過的地方探下險，咁樣影到的相可以比較特別，有屬於自己獨特的風景。
下回待續~~