第二日一早就搭返的士去曼谷，又去返同一間酒店check in，但係奇怪的事情又發生，竟然要加成幾千泰銖!
原來酒店佢地用左我地後日的booking去頂之前的booking，即係今晚係冇房住，要住就要重新比錢。我都覺得上次5個人幾百泰銖咁平，原來只係行政手續費。
咁無計啦，唯有照比，好彩個酒店服務員都聽得明我講緊D咩，輕鬆!
上酒店放低行李之後，我地就去瑪哈拉碼頭文青市集食午餐順便行下。
去到瑪哈拉碼頭文青市集，其實都未搵食咩，見到又係另一間Savoey，就決定食呢間，結果我地發覺餐牌同之前市中心食個一間完全唔同，而且好味勁多，個冬陰功湯都好好飲，有驚喜，覺得都幾開心。
食完野就開始向前行，點知慘事就發生啦，原來呢呢個瑪哈拉碼頭文青市集，係極細，我地一開始就已經行錯路啦，行左去旁邊的市集。
可惜旁邊根本唔係文青市集，而係著名的泰國佛牌街他巴沾，好亂好多佛牌，而且俊宏聲稱去到佛牌街覺得有種唔舒服的感覺，偉哥又話好似比人推住黎行。
我靈力比較低，冇咩特別感覺，但係奇怪的是竟然一張相都冇影到，係有少少陰森的感覺，但日光日白都可以頂到的，只係我冇咩興趣行佛牌街姐，始終都唔係一個好乾淨的地方。
出左佛牌街，發現原來文青市集就係頭先餐廳Savoey的樓上，實際上係一個天台，有少少裝飾比你影下河邊的景色咁，天色唔算特別好，但係都心情都唔錯。
所以旅遊書未必對，文青市集其實只係一個類似鴨寮街的佛牌市場似的。
去完瑪哈拉碼頭文青市集，下一站我地決定步行去考山路市場，中間坐低左響一間飲料店飲下果汁。