行去考山路市集路程唔算好長，好快就到，感覺似係深水埗同女人街的感覺，賣下衫同袋之類。
同行旅伴星爺買左個背包，我就未睇到有咩想買，佢地都買左少少明信片之類。
最後我都買左個椰青飲，不過太少，飲幾啖就冇左。
之後呢星爺口渴就去左7仔買野飲，我就同峰爺等的士，準備搭去河濱碼頭夜市再行下。
點知佢返黎就話銀包冇左，眾人大驚，一齊走返去搵，後尾有個鬼婆比番個銀包佢，但裡面的錢已經冇左。
咁我地就去差館打算報失，好彩差館竟然響7仔對面，第一次響泰國差館搞報失。偉哥佢地3個就走出去睇下追唔追到個賊，服! 鬼會搵到咩哈。
差佬睇番D閉路電視，見到有個鬼佬拎左個銀包裡面D錢走，差佬仲叫左響市集行緊街的鬼婆同佢拎D資料，等左一個鐘就搞掂份report。
難得錄到口供，我地就同警察影返張相留念，其實佢地都幾做得野，不過D制服就比較奇怪。
今次經驗，下次買野唔好將銀包放收銀枱面，原來都幾危險下，好彩我自己有個小背包。
虛驚一場，決定去河濱度玩下輕鬆下，峰爺自己行下，我就同星爺買下衫褲之類，後來我仲自己一個去玩摩天輪。
感覺上河濱個摩天輪比較舊，玻璃唔多乾淨，令到影出來的相都濛濛地，夜景都係一般，冇咩特別的感覺，日本天保山摩天輪正好多。
落返黎之後會合偉哥，佢話要買D 5個人的紀念品，搵條友刻左個木牌比我地每人，都幾靚，我都刻左幾個比細妹們，yeah!
