最後一日待在尼斯，我決定遊覽一下尼斯的宗教建築，之前去澳門都睇過D教堂，今次都想睇下究竟天主教色彩濃厚的法國，究竟會拜D咩神。
所以我最後決定去左幾間教堂，分別有東正教教堂同埋聖女貞德教堂。
呢座法國建築都幾特別，不過肯定係有錢人先住，因為我住民宿個面D樓宇其實都冇咩特色，有D仲核突過香港D住宅。
呢座建築仲型，好多雕刻同支柱都好特別，幾有古典風格，一種純粹美感而冇咩功用的建築特色，Denis Dutton話好似就係建築美學。
到左東正教教堂，第一次去東正教的教堂，圓頂好特別，似阿拉丁神燈，冇咩人入去，方圓都好靜，其實就在住宅區的一個角落，兜左幾次先去到，天氣晴朗有陽光。
裡面冇人又冇咩長椅，但有好多金箔的雕刻同埋宗教器具。
金碧輝煌，但係唔見有人主持或者解釋一下宗教儀式或者器具點用，旁邊有少量遊客觀賞緊，有D祈下禱。
只有一邊的椅子可以坐，整個場地都幾空曠，有種奇怪的感覺，唔算特別寬闊，冇一種好宏偉的感覺。
之前去聖女貞德教堂，外型圓頂都幾有特色，可惜去到關門，沒有開放，唯有在門外影張相就算。
由於行得太散漫，咁就一日，返到去都開始天黑，夜景、海岸線，都好迷人!
食完杯麵之後，我去左天使灣附近個市集行下，見到好多攤檔，可惜冇咩野好買，有兩個人望住我鏡頭，街燈映照之下，市集係幾浪漫，同埋都幾乾淨下。
好多人都仲食緊野，食完野都響度傾計唔走。
入夜特別多情侶出遊，我就一個人望下金色燈光照著的街道建築。
行到出天使灣區，見返地上電車條步道，有個幾大廣場，好多遊人一家大小都在散步，尼斯係一個幾靚的旅遊城市，景點都唔算好遠，玩個天使灣都夠，應有盡有。
另記:
朝早出發之前都按lonely planet推介去搵下尼斯的地道美食，下面個款叫Socca。
按網上記載，當地平民都愛吃這種餅，可能簡單快捷吧，我覺得送啤酒是一流的。
買多件薄餅仔，咁就夠飽，其實呢度都幾多人排隊，而且冇咩位，好似我都搵到個位，觀察下D人分享socca，閒話家常。
日光日白飲啤酒，入鄉要隨俗，幾好飲，不過我酒量麻麻，飲完都輕飄飄。
話說呢有一日我等緊火車，坐左響度玩緊手機的時候，突然有個少年跑左出黎，之後仆左響地下，兩個男人好似幫緊佢，佢身體不停抽搐，我個下心諗: 死啦，個男仔發羊吊，希望佢冇事啦，我都幫唔到D咩手。
但後來見到有警察黎左，之後見到佢手上有個麵包，先知道，原來佢係響旁邊7仔Relay偷麵包，兩個男人又會咁眼利捉到佢，禁左佢響地下。
不過我又覺得其實佢都幾可憐，好眉好貌，靚仔過我都要偷麵包，尼斯呢個城市比起我去的其他法國城鎮或城市而言都算係乾淨同富庶一點，然而都有少年小偷出現，可能其實城市都未必如想像中繁華。
其他人反應都好冷淡，冇咩人拎手機出黎影或者走去睇下發生咩事，令我見到外國人冷漠的一面。