繼續旅程，我發覺呢Booking.com都好假下，話我間hostel爆哂，但係其實根本就唔爆，而且去間hostel訂仲送早餐，反而我響booking.com訂就冇早餐，可憐!下次要醒少少先得。
其實London好多公園都有薰衣草，係冇Provence個D大面積花海。
今日準備去劍橋，一大清早趕去搭火車，同返工D人鬥迫，8點幾係返工人潮的高峰期，迫到傻，冇冷氣，熱到痴線，見到D鬼佬鬼妹流哂汗╴令我印象好深刻，原來英國鐵路都幾落後，可能因為冬天唔洗開冷氣索性全天候開窗。
今日再次挑戰Bank Station，幾層都冇咩指示，行到傻，行行下又回到最初的起點，慘過那些年，最後終於比我搵到個月台，琴日行完今日隻腳仲有D痛。
地鐵係污糟過巴士的，而且唔知點解好熱，冇冷氣，開窗。
到左劍橋，今次呢又報左個local tour，導遊係一個講英文的法國男人，個男人都幾燥底，我地一路行緊的時候就見到其他tour，佢不斷強調我地個tour係正宗，其他係假，第二個tour爬佢頭佢又黑面，始終都係女導遊好D。
今次我就早左到，坐響遊客中心whatsapp啦，同團有個呀婆，華人黎，臨出發先黎急屎，又唔識去廁所，要個導遊帶佢去All，All成10分鐘先返黎，遲左出發大家都有少少不悅。
天氣幾好，鍾意劍橋多D，因為有河，比較有詩意，朝早有少少遊客，不過未至於人車爭路。
慢慢遊客都多，現場係極曬，所以影出黎的相會藍天白雲。
好快就行完個tour，個導遊係咁講呢D係邊度個度，DNA係呢座大樓發現之類，唔同書院係點，當下聽你會明，之後其實好快唔記得哂。食Lunch，一日一餐，食呢間手卷，可能太肚餓啦，覺得好好味，醬汁同埋D牛肉都好正，薯條又多，即炸，終於食返間正常餐廳，份量都幾多，最後有幾條未食哂，飲埋罐可樂，一個人坐響間冇咩人的食店，好舒服，佢D紙巾好厚，抹得好舒服。
食完野就繼續周圍行下，黎到呢條河睇punting，睇住D大學生撐船，勁，插落去架船就識行。
坐左響條路旁邊好耐，睇住條河同埋一班班學生飄過，係幾寫意，牛津反而冇咩呢D位可以抖下Hea下，所以我鍾意劍橋。
水面有少少倒影，雖然曬，但係有微風，有風就唔覺得熱，行到好累，坐低就唔想走。
羨慕，成班Fd一齊玩，我形單隻影，往事在回味…..
whatsapp收到call，要幫個fd買tie，silk個款，膽粗粗入去，好似係學生先買得，條友當左我係學生，我扮曬師父咁，要silk tie，最貴個款!買左$300港紙，呢條係Christ College，奇怪，個fd打校tie返工，型D咁話，服左佢。
買完行到黎嘆息橋，頭先個tour都有黎，講返個急屎呀婆，佢頭先企響度問我係識唔識普通話，我話識呀，佢就問我知唔知咩係嘆息橋，又問我知唔知邊個林徽因同徐志摩，我話知呀!佢個樣好似好陶醉，係咁講佢地D野我知。好歹呂中出身，讀左4年文學，枉費美玲老師一番教導，而家要聽呢個女人響度up，all完係朝積D。
相傳佢地兩個成個響度行黎行去吹水，談情說愛。最後徐志摩同佢有緣無份，呢個愛情故事我諗好多人都聽過，不過我始終對徐志摩冇咩好感，拋妻棄子，所以好多人都話佢現眼報。
我企響度望左陣，影下相，睇下D人撐船，佢地真係開心，唔知佢地見到橋上一個衣衫不整的華人有咩觀感？
由於考緊試，同埋嘆息橋(數學橋)係屬於學院範圍，普通遊客唔入得，我響門口行黎行去，突然心生一計，我拎返條Tie出黎，舉起，衝左入去，D人見到條tie，以為我係學生，我跟住前面班人成功突圍入左去。
由數學橋望返過去我頭先企個位，條橋裡面好舊，真係少少似鐵窗邊緣，我企左陣，行多兩次，D人望住我，見我企響度唔知做咩，留左陣我就行返出黎，幾好彩，起碼遊客入唔到黎，扮劍橋學生成功。
返London，回程搭northern train，有冷氣、少人、準時，反而今朝搭個架呢有時會因為冇司機取消個班車，好彩今朝冇事，而家涼冷氣返London都幾舒服。
後話:
回程冇咩做，上網睇下余光中點樣寫倫敦，以前睇過下，佢咁樣寫﹕
「英國則趨於另一極端，顯得陰濕，氣溫也低。我在倫敦的河堤區住了三天，一直是陰天，下著間歇的毛毛雨。即使破曉時露一下朝暾，早餐後天色就陰沉下來了。我想英國人的靈魂都是雨蕈，撐開來就是一把黑傘。與我存走過滑鐵盧橋，七月的河風吹來，水氣陰陰，令人打一個寒噤，把毛衣的翻領拉起，真有點魂斷藍橋的意味了。我們開車北行，一路上經過塔尖如夢的牛津，城樓似幻的勒德洛(Ludlow)，古橋野渡的蔡斯特(Chester)，雨雲始終罩在車頂，雨點在車窗上也未幹過，消魂遠遊之情，不讓陸遊之過劍門。進入肯布瑞亞的湖區之後，遍地江湖，滿空雲雨，偶見天邊綻出一角薄藍，立刻便有更多的灰雲挾雨遮掩過來。真要怪華茲華斯的詩魂小氣，不肯讓我一窺他詩中的晴美湖光。從我一夕投宿的鷹頭(Hawkshead)小店棧樓窗望出去，沿湖一帶，樹樹含雨，山山帶雲，很想告訴格拉斯米教堂墓地裡的詩翁，我國古代有一片雲夢大澤，也出過一位水氣逼人的詩宗。」
睇完覺得，其實當時余光中去London撞正落狗屎，冇野睇，行得辛苦，寫景冇咩好寫，於是只能追憶過去，用下典，加鹽加醋，文人多大話，睇見都覺得佢好慘，肯定好難頂，好彩呢幾日陽光普照，所以旅行都係睇彩數，命裡無時莫強求。