星期六報左HK01同沙頭角故事館舉辦的探險團，本身以為係去柏架山行山，點知原來係去睇遺跡，一開始就從康山花園行上山，去到康柏橋附近就行進密林睇下舊時纜車的地基，同埋靶場的舊址，原來當時英國人會用纜車運D高官上去避下暑。
廢墟的確一片狼藉，下圖係舊時軍事廁所。
再向山上行，路過三個英軍爐灶。
途中去左幾個防空洞探險，當中最大的是神社洞，原因係裡面有個櫃，好似神社咁，所以有呢個名。
防空洞要人彎低身行，而且仲要用電筒，出黎少不免都會沾到沙土，部份路段彎曲，容易迷路，但面積不大，所以唔算危險。
唯一問題係裡面有蝙蝠倒掛在山洞上，都幾恐怖，啡黑色抖動著，而且一見到光就會飛來飛去，地上仲有幾條四腳蛇，我一鼓作氣衝進去，再馬上跑出來，成功行完所有山洞內的路線，應該唔會再去第二次，因為山洞的空氣比較混濁，令人呼吸困難，但我覺得去一次感受下都無妨，起碼明白當日掘山洞的困難同打仗的痛苦。
之後出返黎就行大潭郊野公園，路線像劈開左香港島打直落，大潭幾好行，都冇咩難度，天色甚佳，能見度好高，所以點影相都好睇。
去水務署的員工宿舍廢墟參觀，要攀過圍欄，我畏高，所以繞過堤壩，但係都有一段路好高，旁邊就係乾涸了的壩底，所以非常危險，感到難過。
最後也努力行完，見到舊宿舍建築，我想有生之年應該未必會再走過黎，這樣想就覺得都值得走一次。最後行返出郊野公園就完結左今日的旅程。
今日旅程雖然驚險，但都安全，睇到好多野，有導賞的好處係聽到唔少歷史故事，人生的經歷好像豐富了一點。在香港去的地方愈來愈多，穿過防空洞、古蹟、小島、邊陲、堆填區、泥灘、魚塘、濕地、沙灘，懸崖、絕嶺、火山岩、沉積岩、地質公園、廢墟、廢村、復耕農地、客家村落等，這樣的生活好像也不錯，當趁雙腿可以走動的時候多到不同地方遊歷，不枉此生。
