最後一晚響曼谷，峰爺訓左，我地4個就徒步行去最近的7仔掃手信。
第二日，一場黎到曼谷，點可以唔參觀大皇宮同埋臥佛寺呢？畢竟泰國最出名的廟宇群。
朝早去唔難，我地由Makkasan Station搭去Hua Lamphong，沿住一條藍色線由頭搭到尾，響總站外面叫的士，輕鬆。
去到大皇宮都唔算多人，排下隊買飛就可以入去，但裡面好多唔同遊客，主要係大陸遊客，多到好難影到相。
但係廟宇建築好華麗，而且數量好多，都幾誇張，仲有吳哥窟的模型，不過好多都係得外面可以睇下影下相，裡面可以參觀的廟宇就真係唔係咁多。
玉佛寺的璧畫。
吳哥窟模型。
好靚。
當中最靚真係玉佛寺大雄寶殿外面的璧畫，畫得好精細，雖然我都唔係好明佢畫咩，好似係佛祖的故事。
仲有舍利塔同埋藏經閣，外面的雕飾都好華麗，但可惜大部份人都係影完相就走，其實企耐D望下就會覺得好壯觀，因為所以細節都好清楚。
可惜時間無多，仲要趕住去下一間，驚趕唔切飛機。
下一站，臥佛寺!
臥佛寺我自己反而比較鍾意，因為基本上冇咩人，而且有好多庭園可以抖下，唔錯。
可惜星爺一去到就急屎，ALL左好耐，我地唯有響門口等，臥佛寺屙屎，笑死。
之後我地一齊去裡面行，其實臥佛寺最正的地方就係呢有好多廟都可以比人去裡面參拜，而且仲可以影相，覺得好正。
我都拜左兩拜，靜靜的環境，舒服。當然最重要當然係要搵到臥佛去影下啦。
臥佛好大座，橫臥左響廟裡面，每個位都只睇到佢少少，幾有趣。
去完臥佛寺，我地就決定把握最後的時間去埋金佛寺，事緣偉哥話個度有佛牌買。
去到金佛寺，我地都冇咩點樣參觀，直接去睇佛牌，但都唔係好合心意，突然有個講廣東話的人叫我地跟佢去一個地方，係一個細房，裡面原來仲有D更加名貴但唔會放出黎的佛牌。
有古老佛牌、掩面佛，最貴要成幾萬蚊，最平就7000蚊都可以買到，法力不一。
可惜最後偉哥都係冇揀到，我地行返出黎，然後就決定搭的士返去酒店預備check out。
去到酒店，食埋酒店個午餐，之後我地就出發去機場，一切順利，唯一就係final call的時候峰爺偉哥仲去食煙，要型冇計，好彩最後都順利起飛，結束今次的旅程。