《深圳丨花滿庭烤鴨》

 按摩完後我地想食晚餐，我地決定由福民站行去會展中心食片皮鴨，由於按完腳想行一陣，於是出發之後望到平安國際金融中心發覺都幾近，諗住行到去先去附近既會展中心，點知原來係勁遠，去到已經9點，仲要唔近會展中心，於是我地決定放棄，就食花滿庭的片皮鴨。

可惜呢間餐廳令人失望，片皮鴨得返一隻，味道都普通，再加上椒鹽鴨架太乾身，令我地覺得加多50蚊既一食非常唔抵，另外係冇生煎包，所有麵食炒飯都冇曬，我地只能叫一個蟹湯同埋豬肉鴨腎湯，味道係好味的，但冇主食始終食幾多片皮鴨都有種奇怪的感覺，堆單657蚊港幣。

食完之後打算返香港，去到福田口岸站，發覺前面係湯崎，心諗一場黎到就去睇下幾多錢，睇完之後就返去福田口岸站，發覺該站已經關閉，原來1030就會關，之後我地馬上搭地鐵去羅湖，但上車後發覺1127係最後一班，我地要1123先到羅湖站，連埋過關排隊應該趕唔到，於是我地出福民站，又去返東方園既位置搭的士，用10蚊去皇崗口岸附近再行去過關，過關之後搭大巴返香港，完成呢日既旅程。

《深圳腳底按摩的社會觀察丨簡單攻略2023》

經常有好多人會返深圳按摩，覺得比起香港平，根據我的觀察，平唔平過香港要視乎到底你想要咩服務。

內地有幾種按摩場地可以選擇，一種係過夜既服務，亦都係大部份食玩攻略會提及的按摩服務，佢地d鱔稿通常都會推薦福田區的按摩店，因為比較接近落馬洲，一出福田口岸就係，例如前身係水立方既湯崎，或者係隔一個站福民站北面既東方園，同埋福民站南面的東方棕泉。所謂嚴選都不外乎呢幾間，服務方面，呢d通常都會要求顧客除衫沖涼換衫，然後做一個按摩項目再加一至兩個大堂項目，時間可以選擇過夜或者唔過夜，仲有一種係專做腳底按摩既場，但價錢更加貴，所以不會考慮。

1. 最低消費免沖涼費用

呢類按摩店通常都會有最低消費，以東方棕泉為例，要消費滿199蚊先免淨桑費，即係如果你想腳底按摩45分鐘，費用109蚊係未達到佢最低消費，所以要比返129蚊淨桑費，即係238蚊未計加一，所以一般人都會做幾個項目夾夠條數慳返個沖涼費用。

至於東方園就要消費滿219蚊先免淨桑費，否則要比189蚊淨桑費，而湯崎就更加貴，要消費滿500蚊先免淨桑費，否則要比280蚊。

如果選擇過夜，一般都會做幾個項目，要達到最低消費金額其實唔難，而且仲有任食水果同飲品，部份仲有其他娛樂設施例如波枱或者遊戲機提供，亦都可以選擇睇戲，好似搭飛機睇戲咁。缺點係通常訓既按摩床都唔唔好訓，過夜不如住酒店可能更加舒服，除非有好多按摩項目要做。

我就會選擇普通街邊按摩店，因為其實我只係即日來回，而且按一個鐘都夠，搵樣活動輕鬆做下，太漫長既按摩其實都幾辛苦，水果飲品對小朋友吸引力比較大，為左食生果比幾百過夜都唔係好划算，不如爭取時間去其他地方行好過，再加上大型按摩場旺季或者節日可能要排幾個鐘先會有技師，再加上技師一日做咁多單，可能有機會攰到草草了事，所以未必一定舒服，等待既時間浪費左好多去食玩既機會成本，有時候會見到d人係大堂等勁耐都冇得按，所以我鍾意去小店按一個鐘當係叉下電。

2. 按摩要比小費

按摩比小費都係深圳骨場的文化，大型按摩場例如東方園，一般都要簽小費比技師，房間項目既小費每小時都要比100蚊，睇返你按幾耐去計，大堂項目(即係了耳仔腳底按摩個類)就通常50至80蚊小費，不過呢d比技師既小費就唔洗加一既，反而基本按摩項目既收費就要加一，甚至東方園係加15％服務費。

湯崎推出包單制，免簽小費吸引顧客，所以項目單價方面就會貴d，其實小費都有作用的，會令技師落力d工作，免簽小費表面上係明碼實價，按摩技術係咪真係咁好就見仁見智，不過一般人好似我咁冇咩要求應該都分別不大。

至於街邊按摩小店，按摩費用極平，60分鐘都只係48蚊，比起大型骨場湯崎200蚊45分鐘，東方園99蚊45分鐘，東方棕泉109蚊45分鐘平勁多！所以其實技師會聲稱佢地冇人工的，話人工係來自於小費，真定假我唔知，店內小費紙上面會提供30/35/40/45比你選擇，最平小費30蚊都佔本身按摩費用48蚊既6成，係幾有趣既定價。

究竟要比幾多小費先好呢？內地有網民話唔洗比小費，反而係香港人要面子先鍾意比小費，究竟小費係咪智商稅呢？唔比又會唔會走唔到呢？比人黑面好似唔係幾好，所以我多數都會圈30蚊，即係最低個格，因為其實我都唔識分佢手勢好唔好，跟返慣例就算，所以埋單78蚊60分鐘按摩，唔洗再有咩加一，簡單方便又快捷，價錢亦是可接受的範圍。

3. 中港日按摩比較

港式按摩以九龍城為例，排隊店通常都係價錢比較平，我最近試過等左半個鐘先可以按，以九龍城足苑套餐為例，足底按摩加頭肩頸價錢係288蚊75分鐘，淨足底要188蚊，其他區既按摩店45分鐘足底更加要268蚊！

相比之下，內地按摩小店，60分鐘足底按摩其實也包括頭肩頸按摩幾個字，仲有輕量啪骨，非常實惠，日本按摩價格跟香港差不多，但主要集中在溫泉酒店才有腳底按摩，同埋都幾有力水，但按摩方法係有少少唔同，佢會比較多卒隻腳，又未去到細個睇電視會按到流眼淚的感覺。

以按摩技術而言，技師手勢其實邊度都係撞手神，但以我經驗為例香港有部份技師無法啪到指骨，同時力度都唔算特別好，如果男技師更有機會卒到勁痛，因為佢地隻手掌好粗好鞋，最忌都係用死力，唔舒服要清楚同技師講。如果比較內地大型骨場同按摩小店，大型骨場技師會著得靚d，好似睇落專業d，但手勢同按摩小店都差唔多，冇咩太大分別。

服務態度我覺得兩地都差唔多的，分別係香港唔洗比小費，明碼實價，不過香港技師缺點係會同你傾計，內地語言不通反而可以靜靜地訓下，如果手機唔夠電比3蚊租充電寶就可以叉到，香港好似大部份都冇尿袋提供。

內地按摩小店最大缺點係睇落真係冇咁乾淨既，因為顧客唔洗走入去沖涼，大型按摩場個個都要沖涼，所以相對上係比較衛生，不過其實我都唔係好想著人地既衫，但事實大型骨場裝修係靚d，常見一家大小假日去玩，至於去得小店通常都係骨精，識揀又追求性價比既中年人多數會選呢一類。下圖有唔同骨場的收費表。

《深圳丨深業上城丨冬瓜嶺站》

 今日1230係落馬洲往福田站出發，過關都唔算太多人。

好耐冇用深圳地鐵卡，發現入面仲有20蚊，可以玩足成日。

1. 交通：首先我地搭地鐵要由福田口岸站去深業上城，我地搭4號紅色線由福田口岸站往牛湖方向，去到少年宮站，然後再轉乘3號藍色線往雙龍方向，搭一個站去蓮花村站再轉10號粉紅色線往雙擁方向，搭一個站就到達冬瓜嶺站。

女朋友問點解要叫冬瓜嶺站呢？其實因為以前呢度有條村叫冬瓜嶺村，後來各省既人湧去深圳打工，呢度搭左好多屋，之後1998年拆遷左之後起左彩田村，慢慢就有彩田路，變成一個比較繁華既地區，深業上城係福田北最大型既商場，走中上路，我地今次去睇下係點既商場。

編者按：其實唔洗轉3次地鐵，本來10號粉紅色線既起點就係福田口岸站，即係只需要由福田口岸站直接向雙擁方向搭到去冬瓜嶺站就可以，兜兜轉轉追追趕趕浪費體力。

到達冬瓜嶺站地下已經可以直通深業上城，地下通道是用木地板的，感覺格調比較高，跟其他商場有少許分別，我地先去食野，見到1樓有幾間餐廳都不錯，分別是客語，辣可可，鳳凰椰子雞等等，分別拎左飛，最後辣可可最快有位，於是就食辣可可。

辣可可主打現炒黃牛肉，係一間專食牛肉的餐廳，點解要叫黃牛肉唔叫紅牛肉呢？

原來係因為食材係源自湘西秦川黃牛，係一種爬坡性強的牛隻，肉質比較有咬口，換言之呢間係一間湘菜，即係湖南菜的餐廳。湖南菜都係有辣的菜系，我地叫左現炒黃牛肉($69)、麻辣燙鮮豬血($29)、蓮耦湯及小扣肉。現炒黃牛肉其實即係指天椒炒牛肉，簡單但好好味，送飯一流，據講只係用30秒炒牛肉令牛肉爽滑唔會太鞋太韌，餐廳比左個電飯煲我地自己裝飯，個飯勺好好用，不過我地發現佢地係冇洗米就咁倒米落電飯煲煮飯，比較軟身。

至於豬紅唔辣，薄得黎好易夾得起，好味，蓮耦湯色水比較鮮艷，亦是不錯，至於扣肉其實即係肥豬肉，係片到好薄既肥豬肉，非常適合送飯。可惜現炒黃牛肉太辣，我地叫左一支15蚊大可樂，1.25升，飲凍可樂食辣野非常痛快，簡單。發覺米飯也幾好吃，網上說是黑龍江的五常大米稻花香，跟太二所用的五常大米差不多，我也不知道有甚麼分別，埋單201蚊，非常抵食。

相比起昨天在將軍澳吃的謝謝儂，一碟蔥爆牛仔肉要92蚊，味道普通，牛肉也比較少，就會自然覺得這個現炒黃牛肉只需要69蚊比較價錢味道均完勝，相差3成價錢。呢間餐廳主打容易送飯既菜，的確每道菜都好容易送白飯，仲要每桌都有一個電飯煲自己裝飯，不用加錢再叫飯都幾貼心。搭車途中都見到好多現炒黃牛肉的新品牌宣傳，或者係呢幾年冒起的受歡迎菜式。

食完野之後我地就去試玩左蔚來汽車nio同睇下理想汽車，發覺都幾先進，車子有按摩功能，再行下老佛爺百貨，據說係華南首間來自巴黎的百貨公司，但品牌我完全未聽過，之後我地行下超市睇水果同埋買左支奈雪之茶，本身想買杯手搖鴨屎綠檸檬茶，但發現原來支裝只係5蚊，手搖卻要16蚊，忽然覺得支裝好抵，女朋友做對了決定，味道不錯，甜甜地又解渴。

我地上左頂樓睇深業上城的歐陸小鎮，其實就是一些開在頂樓的食店，建築物風格顏色比較豐富而且不對稱，有歐陸小鎮的感覺嗎？據說是參考荷蘭風格派畫家蒙特里安的《紅、黃、藍與黑色欄杆》而興建的，拍照是不錯的，難怪成為網紅打卡位，香港也有一個公屋屋苑向蒙特里安這幅作品致敬，就是火炭駿洋邨，其實這種風格即係有橙色同黃色的格仔既建築，但陽光太猛烈係頂樓行好易出汗，難怪餐廳人流亦不是很多，或許夜晚會比較受歡迎，裡頭有聯合出版的一所書店在開座談會講香港文化，賣的書跟香港的三聯書店差不多，同一個品牌。

回到商場，找不到g jump這個兒童樂園，最後發現原來在剛才餐廳附近，200幾蚊可以任玩彈床遊戲，非常適合小朋友，睇完之後我地決定離開，出發去文和友。

《香港新手丨P牌自助驗車記丨簡單方便丨輕鬆續牌》

 今朝一起身就渣車去8鄉入油

之後去元朗工業邨搵車房換返左邊車頭燈
之前燒左一直都未換

然後就渣去中檢2期準備港車北上驗車
去到係冇人理既
我泊好架車入去櫃台
職員都幾友善，幫我申請左過海關既智易通
仲幫我貼上架車
可惜去到櫃台先發現原來港車北上係先抽中簽
然後先拎架車去驗
我一路仲以為係要先驗車後申請大陸車牌
然後先可以去抽簽，掉轉曬d次序
而呢度淨係做到港車北上既驗車
普通車子一年一檢續牌費係做唔到
要去中檢1期先得

我馬上渣去中檢1期，
預約電話打唔通，我都唔知渣去邊，是但跟其他車排
結果排左去中港車檢查條隊，
佢問我新領定續牌我話兩樣都唔係
亦唔係港車北上，佢話我混吉叫我走，
跟住我是但泊低左入去登記處再問
原來有即日排隊的，但要比585蚊，就係呢度!
可惜我身上又冇現金
唯有渣車去朗屏站樓下泊低，跑去恒生櫃員機禁錢
之後拎車渣返去中檢1期交費排隊驗車
係門口外面睇住一架架車上架檢驗，
職員淨係同我講叫我掉低條鎖匙係車入面
我都係求其泊低左，完全唔知咩事就照做。
呢度驗車係唔會同你講幾時下一架，或者下一架係邊架
佢地隨心自己就行過去渣架車上架檢查
我等左大約半個鐘多d先到我架車上架
後座被拆開，因為自己買左個座椅套，
大約3個字就驗完車，渣返出黎
我就入返房等報告，佢叫我車牌我就去拎返收據同埋一張驗車紙
成功通過檢驗，唔洗靠車房自己都可以驗車成功
費用只係585蚊。

之前馬上渣去機場接機，半路落大雨，
去到機場去個廁所先，然後先渣去沙田再去馬鞍山。
之後再返公司繼續工作，完成上午一連串的任務。

《汕尾市．海城鎮旅行》

 今次目的地係海豐縣城東鎮。

首先由深圳坐包車向東面出發，
到達霞涌服務區可以落車休息一下，
先到茶樓飲茶，之後再渣到去金山名城拜見阿爺
之後再到伯爵酒店吃晚飯，
然後在伯爵酒店休息，
第二日在伯爵酒店飲茶，
然後坐包車再到霞涌服務區
然後回到深圳返港。

手信方面，我收到花生，魚蛋，餃子，豬肉乾等手信，唔知味道如何。

2日所食的海豐菜其實即是鶴佬人的菜系，
主要經典的菜式據我這幾日的觀察有以下幾款，大部份都是我喜愛的食物。
1. 小米(薯粉餃)：用蕃薯粉、五花肉、大地魚粉、鹽、糖、等配料製作而成的餃子
2. 扁食(雲吞)
3. 枸杞豬雜湯
4. 菜包粿
5. 菜茶
6. 擂咸茶
7. 馬餃魚丸
8. 三角艾粿：即係三角芋頭餃，幾好食
9. 潮州粉果
10. 其他海鮮：勁大隻蝦同蟹

11. 炒飯：有落魷魚比較有咬口

最好食的菜包果。

普遍城鎮的菜都比較翠綠好食，酸菜魚我則覺得一般，魚肉切得不夠薄，辣度層次不太夠。

呢種魚既魚肉都幾彈牙。

蟹的味道還可以的。

凍蝦仁之類，我沒有膽試。記得很久以前見到薄殼與田螺我都沒有吃。

《九龍城拍拖節目》

1. 去九龍城泊係城南道

2. 行去九龍城寨公園參觀

3. 去九龍城廣場散步聽中樂

4. 出黎已天黑就去聯發茶餐廳食蔥花滑蛋飯

5. 食完九龍城街道周圍散步

6. 見到城南道檸檬餐廳門口有貓

7. 之後泊去獅子石道，然後行去對面足苑按摩

8. 等左半個鐘終於可以按，但要分開坐

9. 之後按完上車極速渣返天水圍

10. 1145到達天水圍

《銅鑼灣拍拖》

希慎興業（0014）及華懋合組財團，上月以高於估值約15%、即約197.78億元高價奪得銅鑼灣加路連山道商業地，以項目最高可建樓面面積107.6萬平方呎計算，每方呎樓面地價約18,374元。地政總署今日（16日）公布其餘落選投標者的投標金額。第二高的財團出價為133.31億元，較中標價低64.47億元或32.6%。

新世界（017）最近向土地審裁處提出，就銅鑼灣波斯富街54至76號、利園山道5至27號快樂大廈等多個地段舊樓申請強拍，整個項目佔地約19,831方呎，市場估值約45.05億，屬強拍金額歷來最大宗。

姜濤《鏡中鏡》mv在銅鑼灣加路連大廈取景。

希雲街有許多小店cafe，沒有太多人排隊的小區自成一角。

《筲箕灣拍拖》

這日去到筲箕灣拍拖，發現鯉魚門街市關閉，感覺像一個廢墟，回到家裡搜索才知道這座有45年歷史的街市因租置率低下而關閉，至今仍未決定有甚麼用途。

另外去了鯉景道，看見正在興建分區圖書館及安老院舍，本應於2022年底完工，但延至2021年初才動，最新預計2024年落成。另一面1966年建成的義德大廈強拍後重建為傲華，房協亦重建明華大廈。

看了這些資訊，忽然對於政府如何決定一個地方是否興建街市感到興趣。

原來規劃署以往規定「每55至65戶家庭設有一個公眾街市檔位，或每10 000人設有約40至45個檔」，但2009年有關條文被改為「應按個別情況考慮是否闢建新公眾街市，以確保妥善運用公共資源。當局除了應考慮該區人口外，也應考慮其他相關因素，包括人口組合、社區需要、附近公營及私營街市設施的供應、新鮮糧食零售店的數目，以及區內市民對於保留小販區的意願等」。

本港公眾街市的空置率達到13％，元朗區更達30％，地區居民亦建議改劃街市作其他用途，例如葵芳居民促政府將榮芳街街市改建為綜合服務設施大樓，旺角舊街市丟空8年後區議員亦建議改做牙科設施。

圖書館方面，造價高達6.7億元的西灣河鯉景道圖書館及安老院舍綜合大樓，現時正在動工中，最快2024年啟用後將成為港島最新最大的分區圖書館。

馬鞍山第103區綜合設施大樓將設立新書中心，地盤位於鞍祿街與馬錦街交界處，佔地約7443平方米。大樓將設體育館、室內游泳池、社區會堂、民政事務處分處和收費公眾停車場等設施。政府計劃為工程開展施工前期工序，涉款7430萬元。如撥款申請在本立法年度內獲財務委員會批准，計劃於2020年第四季展開施工前期工序，預計於2023年第四季完成。

至於上環新政府大樓將不會設置圖書館，元朗YOHO Midtown旁則擬建體育館同設圖書館。

政府曾經有文件比較國際圖書館，香港圖書館資料周轉率在各城市中最高，每名登記讀書平均計算的成本最低，當時顧問提議將分區圖書館與人口比例由1比20萬降至1比15萬，再增加樓面面積。

《香港規劃標準與準則》訂明在每個分區內各設一間分區圖書館；而每二十萬人應設一間分區圖書館。

總結，規劃準則對於街市及圖書館的定義都不同。

《大嶼劏肚小試》

本身揀左羌山郊遊徑行呢就無咩難度既

可惜之後由於行得比較快

於是去到靈會山之後就向深坑瀝繼續出發

冇去狗嶺涌同埋分流頂，可惜離開左鳳凰徑就出事

深坑瀝400幾米唔算好高，但係向二澳方向要落山

短短幾十米距離的斜度好大

本身我就畏高，去到有段路少少懸崖

我坐左3個字諗緊叫唔叫飛行服務隊 

咁大個人都未行過咁斜 腳步輕浮又大腿又抽筋

爬返上去都好難，因為都好斜下

背住爬落去我又唔夠膽 差錯腳就有排碌

萬一之後d路仲係咁垂直落我應該行唔到

之後休息左陣就慢慢踩住落去

冇咩攀石經驗，隻手d肌肉又冇咩練

最後好彩慢慢落到呢個斜坡，之後d路雖然斜但係冇斷崖要爬落去

但係落好大雨，好彩早少少爬落去

否則都唔知點落山，執返條命

技不如人都係行返普通郊遊徑安全好多

好彩可瑩揀既外套夠硬淨，點刮都唔爛 厲害呀