《汕尾市．海城鎮旅行》

 今次目的地係海豐縣城東鎮。

首先由深圳坐包車向東面出發，
到達霞涌服務區可以落車休息一下，
先到茶樓飲茶，之後再渣到去金山名城拜見阿爺
之後再到伯爵酒店吃晚飯，
然後在伯爵酒店休息，
第二日在伯爵酒店飲茶，
然後坐包車再到霞涌服務區
然後回到深圳返港。

手信方面，我收到花生，魚蛋，餃子，豬肉乾等手信，唔知味道如何。

2日所食的海豐菜其實即是鶴佬人的菜系，
主要經典的菜式據我這幾日的觀察有以下幾款，大部份都是我喜愛的食物。
1. 小米(薯粉餃)：用蕃薯粉、五花肉、大地魚粉、鹽、糖、等配料製作而成的餃子
2. 扁食(雲吞)
3. 枸杞豬雜湯
4. 菜包粿
5. 菜茶
6. 擂咸茶
7. 馬餃魚丸
8. 三角艾粿：即係三角芋頭餃，幾好食
9. 潮州粉果
10. 其他海鮮：勁大隻蝦同蟹

11. 炒飯：有落魷魚比較有咬口

最好食的菜包果。

普遍城鎮的菜都比較翠綠好食，酸菜魚我則覺得一般，魚肉切得不夠薄，辣度層次不太夠。

呢種魚既魚肉都幾彈牙。

蟹的味道還可以的。

凍蝦仁之類，我沒有膽試。記得很久以前見到薄殼與田螺我都沒有吃。

《九龍城拍拖節目》

1. 去九龍城泊係城南道

2. 行去九龍城寨公園參觀

3. 去九龍城廣場散步聽中樂

4. 出黎已天黑就去聯發茶餐廳食蔥花滑蛋飯

5. 食完九龍城街道周圍散步

6. 見到城南道檸檬餐廳門口有貓

7. 之後泊去獅子石道，然後行去對面足苑按摩

8. 等左半個鐘終於可以按，但要分開坐

9. 之後按完上車極速渣返天水圍

10. 1145到達天水圍

《銅鑼灣拍拖》

希慎興業（0014）及華懋合組財團，上月以高於估值約15%、即約197.78億元高價奪得銅鑼灣加路連山道商業地，以項目最高可建樓面面積107.6萬平方呎計算，每方呎樓面地價約18,374元。地政總署今日（16日）公布其餘落選投標者的投標金額。第二高的財團出價為133.31億元，較中標價低64.47億元或32.6%。

新世界（017）最近向土地審裁處提出，就銅鑼灣波斯富街54至76號、利園山道5至27號快樂大廈等多個地段舊樓申請強拍，整個項目佔地約19,831方呎，市場估值約45.05億，屬強拍金額歷來最大宗。

姜濤《鏡中鏡》mv在銅鑼灣加路連大廈取景。

希雲街有許多小店cafe，沒有太多人排隊的小區自成一角。

《筲箕灣拍拖》

這日去到筲箕灣拍拖，發現鯉魚門街市關閉，感覺像一個廢墟，回到家裡搜索才知道這座有45年歷史的街市因租置率低下而關閉，至今仍未決定有甚麼用途。

另外去了鯉景道，看見正在興建分區圖書館及安老院舍，本應於2022年底完工，但延至2021年初才動，最新預計2024年落成。另一面1966年建成的義德大廈強拍後重建為傲華，房協亦重建明華大廈。

看了這些資訊，忽然對於政府如何決定一個地方是否興建街市感到興趣。

原來規劃署以往規定「每55至65戶家庭設有一個公眾街市檔位，或每10 000人設有約40至45個檔」，但2009年有關條文被改為「應按個別情況考慮是否闢建新公眾街市，以確保妥善運用公共資源。當局除了應考慮該區人口外，也應考慮其他相關因素，包括人口組合、社區需要、附近公營及私營街市設施的供應、新鮮糧食零售店的數目，以及區內市民對於保留小販區的意願等」。

本港公眾街市的空置率達到13％，元朗區更達30％，地區居民亦建議改劃街市作其他用途，例如葵芳居民促政府將榮芳街街市改建為綜合服務設施大樓，旺角舊街市丟空8年後區議員亦建議改做牙科設施。

圖書館方面，造價高達6.7億元的西灣河鯉景道圖書館及安老院舍綜合大樓，現時正在動工中，最快2024年啟用後將成為港島最新最大的分區圖書館。

馬鞍山第103區綜合設施大樓將設立新書中心，地盤位於鞍祿街與馬錦街交界處，佔地約7443平方米。大樓將設體育館、室內游泳池、社區會堂、民政事務處分處和收費公眾停車場等設施。政府計劃為工程開展施工前期工序，涉款7430萬元。如撥款申請在本立法年度內獲財務委員會批准，計劃於2020年第四季展開施工前期工序，預計於2023年第四季完成。

至於上環新政府大樓將不會設置圖書館，元朗YOHO Midtown旁則擬建體育館同設圖書館。

政府曾經有文件比較國際圖書館，香港圖書館資料周轉率在各城市中最高，每名登記讀書平均計算的成本最低，當時顧問提議將分區圖書館與人口比例由1比20萬降至1比15萬，再增加樓面面積。

《香港規劃標準與準則》訂明在每個分區內各設一間分區圖書館；而每二十萬人應設一間分區圖書館。

總結，規劃準則對於街市及圖書館的定義都不同。

《大嶼劏肚小試》

本身揀左羌山郊遊徑行呢就無咩難度既

可惜之後由於行得比較快

於是去到靈會山之後就向深坑瀝繼續出發

冇去狗嶺涌同埋分流頂，可惜離開左鳳凰徑就出事

深坑瀝400幾米唔算好高，但係向二澳方向要落山

短短幾十米距離的斜度好大

本身我就畏高，去到有段路少少懸崖

我坐左3個字諗緊叫唔叫飛行服務隊 

咁大個人都未行過咁斜 腳步輕浮又大腿又抽筋

爬返上去都好難，因為都好斜下

背住爬落去我又唔夠膽 差錯腳就有排碌

萬一之後d路仲係咁垂直落我應該行唔到

之後休息左陣就慢慢踩住落去

冇咩攀石經驗，隻手d肌肉又冇咩練

最後好彩慢慢落到呢個斜坡，之後d路雖然斜但係冇斷崖要爬落去

但係落好大雨，好彩早少少爬落去

否則都唔知點落山，執返條命

技不如人都係行返普通郊遊徑安全好多

好彩可瑩揀既外套夠硬淨，點刮都唔爛 厲害呀

《不一樣的路線：由火炭行牛湖托上草山針山》

 行足7小時23分的山路，14公里的路程，這次的目的地是草山和針山。

首先在火炭火車站D出口，行去工業區然後到達駿洋邨，據說設計師因應地區環境，把藝術家皮特·蒙德里安的格子風格融入至駿洋邨設計當中。駿洋邨的樓宇名幾特別，逸爾山時湖，即係一二三四五，哈哈。

仔細一睇，原來火炭的街名好多都與九肚山的舊村名一樣，例如山尾街，黃竹洋街，長瀝尾街，河瀝背街，桂地街，坳背灣街都係舊村名。當中坳背灣街1號就係中州的新樓盤項目，背邊就是旭禾苑，係一座單幢式的居屋。

跟住我行到上去駿洋邨後面的桂地新村46號，搵唔到條上山的樓梯，見到有條樓梯係落山，於是我地行落去搵到一條入村的路，行一段小路會見到一條橋，條橋下面又有路，唔知點解要起條橋，可能之前下面係冇石屎路。

再行就會入村，途中有一間藍屋有4-5隻狗不停吠，但基本上係鎖住，所以冇衝出黎，都幾安全，係嘈左少少。

再繼續行就會上山，路段亦都開始冇咁明顯，我地都係跟住地圖同埋絲帶的指示。行行下就會入左密林，前面的山友係咁話冇路，搵唔到路，但我地去到又見到有路，之後行多陣佢地就消失左，而我地就繼續進入密林探險。

呢段最奇怪的地方係會進入竹林，但竹林的高度係極矮，所以要彎低身先可以過到，究竟係咪牛開出來的路呢？定係當時的村民身高太矮，所以開條咁既路出黎呢？不過又覺得幾好玩幾刺激，上網睇有人命名為「竹林迷徑」。

我地路線係向搖斗坪前行，然後轉上禾上墩去牛湖托。呢段路比較模糊，所以都係見絲帶就轉，有時候見到幾條絲帶就是旦揀一條。幸運地我地冇行回頭路，即係冇行錯，不斷見路就行就可以的。

行山路途中會見到山尾村同坳背灣村的舊街牌，因為村莊已經荒廢，所以原來路牌的位置已經雜草叢生，我地冇行入去睇廢校廢村，繼續前進。

行到去牛湖托位置會比較開揚，牛湖托有幾條分岔路，但似乎都係向草山方向，冇咩雜草，都幾好行，但係行完出左大路行多一陣之後就發現山路係行去大埔滘方向，我睇地圖發生偏離左，於是行返轉頭一小段路搵下上山入口，但又見唔到邊度有山路入口係向草山方向，只係見到一幅斜坡。

望左一陣發現幅斜坡有少少人行過的痕跡，我諗應該係山路，頭先冇為意呢度係山路的入口，於是我地慢慢爬上去，坡度都幾斜，如果一口氣衝上去應該都可以應付，最緊要就係唔好驚。事後我發覺應該係我地行過龍，其實係要由呢條路上草山。

呢條唔係比較多人行的上電塔路段，好處係比較短，冇經過水澗，困難處係要上一段斜坡仔，真係幾斜，但景色就好靚，比較開揚，唔洗行密林，望到對面399米的狗肚山。

上左段斜坡之後山路就非常明顯，不停向前上就可以，基本上冇咩難度，好快就會到達647米的草山，所以先前的斜坡係全程比較高難度的路段。上到草山休息一陣之後就沿著麥理浩徑行去針山，途中經過電塔，本來我地應該係呢個位上去草山的，但行錯路都幾開心，搵到條新路，特別的經歷。

上針山我覺得由草山行過去會比較好行，因為城門水塘上針山的路已經爛得好厲害，而且多碎石，反而草山行去針山那段路比較完整，碎石少，梯級之間的距離亦都冇咁大。雖然針山可以望到城門水塘，葵涌荃灣，汀九橋，昂船洲大橋，但我我覺得草山的景色會比較好睇，一方面有一大塊草地可以野餐休息，另一方面可以望到馬鞍山，沙田，大埔的景色，270度景色，遠望更加可以睇到赤門海峽，轉頭亦可以睇到針山等群山並列的氣勢，再加上我地由草山去針山係由東至西咁行，所以可以睇埋日落，如果火炭沙田落山應該未必有日落睇。

落到山就天黑，我地直接落去安蔭就搭的士返屋企。

《石澳的豪宅？行龍脊》

早排1月中行龍脊，完全冇任何難度的山徑，好行，而且望到石澳泳灘，還有石澳半島外的兩個小島五分洲和大頭洲，風景好好，原來山頂叫打爛埕頂山，個名幾得意。山頂望落去會見到兩座比較明顯的樓房，黃色我對照網上資料，估計可能係馬化騰的屋企，而紅色可能是信和定唔知會德豐家族居住的地方。咁近望到富豪的屋企，感覺幾特別。

《半考牌路線之環船淡水湖一圈》

 一直都想環繞船灣淡水湖一個圈，今次決定試下，睇返全程，我地首先由大埔墟搭小巴去烏蛟騰，然後向九担租方向行去船灣淡水湖郊遊徑。

船灣淡水湖係漁護署難度最高的郊遊徑，雖然唔係最長，但要上好多座山，上上落落對體力的消耗的好大，難度就唔高，但係就好長。

11時41分由烏蚊騰出發，好快就搵到入口上第一座山峰馬頭峰，我地12時22分到達295米的馬頭峰，行了大約45分鐘，開始可以望到船灣淡水湖的景色，一條筆直的長壩直削天地。原來當時興建船灣淡水湖時水位將大埔六村淹沒，1960政府決定將村民集體安置於大埔墟，所以至今在廣福道可見到一些4層高的建築物，就是當時的村民及後代所居住的地方。

繼續前進，發現一個路牌「前路極為艱辛難行，山徑陡峭，林蔭極少...」向這個路牌展開我地環湖之旅。大約1時48分到達大峒。原來不知不覺已經行了1.5小時了。遠處可以進到沙頭角鹽田港景色，另一個方向可以望到更清楚的船灣淡水湖，一座座小山頭環湖並列，天氣晴朗，唔算太熱。

之後行了15分鐘就到達觀音峒，時間是下午2點零6分。沿途我都有影低標距柱。慢慢就可以見到多少少印洲塘。印洲塘特點係好平好靜，印洲塘英文名好得意，叫Double Haven，因為被Double Island灣洲及吉澳Crooked Island包圍，所以水流唔急，好寧靜的內港。

繼續向前行會比較多上落，慢慢地勢會變得愈來愈陡峭，中間我地經過左紅石門岰的入口及石芽頭，仲記得當日行迷椏走廊挑戰失敗，唔知幾時再次挑戰。大約3點13分我地到達280米的鹿湖峒，普遍船灣的山唔會高過300米，但好多係落到好低再上返去，所以全程爬升左成1037米，對體力的要求都好高。

去到鹿湖峒之後發覺前方仲有路，於是我地唔環湖，繼續往海角方向前進，查地圖知道前面係跌死狗，覺得有d危險，冇打算行到好入，但行入d就會發覺跌死狗其實都唔係好高，太約只有295米，而且難度唔係好高，都係比個名嚇親，但景色方面就可以睇清楚曬成個印洲塘景色同埋外面島嶼，群島包圍的印洲塘湖水湛藍而山色碧綠，加上冇咩人行到黎呢邊，可以好好享受寧靜的遠足之旅。

我覺得難度方面唔算太高，但注意要有足夠補給，因為沿途係冇任何可以買水的地方，但係路線都比較明顯，冇咩分岔路，仲有絲帶指引，慢慢行基本上都輕鬆，主要係前半段比較辛苦，後半段十分輕鬆。

再行到去238米的鳳凰頭，由於時間關係我地就此回頭，因此時間已經是3點半，見到有幾個人由鳳凰頭上黎，查一查先知原來前面仲可以行多幾個山頭去埋白角山，昂莊山再去黃竹角咀摸鬼手，下次可能要早少少去先得，因為新聞見過有人在鳳凰笏頂迷路。

冇摸鬼手，我地行返去鹿湖峒，之後環湖繼續行，經過219米的鵝髻頂之後行去虎頭沙，再去125米的長牌墩，其實高度唔算好高，路都比較易行，但係就多數都係樹林路，冇咩開揚位睇外島景色，只係望到淡水湖的景色，望返之前行過的幾座山頭，發覺原來都行左好多座山。

最後我地行去溢水壩，然後會見返石屎路，之後的路途都冇咩難度，普通大壩行人路，行返出去大尾督就可以搭小巴離開，但天色已經入黑，好多蚊滋飛黎飛去，所以都係早去更好，及早離開。

總結，路途都幾有挑戰性，環湖作為一個行山目標也未嘗不可，但係後段大壩的路其實都幾悶，如果下次可能去黃竹角咀之後原路走會比較舒服，因為之後大壩的路極度漫長，而且冇咩挑戰性，景色都普通，但不少跑山人士會選擇作為挑戰體力的路段，最後我地由上午11點36分行到下午7點11分，總共行左7.5小時，距離是21.53公里，最高點只有305米。今次補給充足，行到十分自在，落到山所有野都食曬飲曬，輕裝回家。