《香港睇牙 vs 深圳睇牙》

以下是香港及深圳睇牙的價錢比較。

首先是愛康健的價目表。

其次是兩地普遍牙齒治療價格的比較:

返深圳洗牙，做法同香港洗既一模一樣，同樣會給予護齒意見，相對上我覺得會輕力少少，因為香港有些牙醫洗牙的方法都幾粗暴，深圳服務行先，自然希望留住客人，同時冇建議我做其他治療，洗牙第一次有折扣190蚊港幣，比起香港600蚊起要平好多，同時佢地都建議你做個平的洗牙，唔會推銷貴價治療，香港我睇過某牙周治療中心，醫生會講到問題好嚴重，建議你做最昂貴的治療，檢查費未開始治療已經需要付2000蚊港幣，最後睇公立牙醫表示問題不大，無須浪費呢筆金錢。

種牙等價目沒有標示，需要見醫生詳談，或者可以講下價的。

以上是兩地牙齒治療的心得分享。

《採耳體驗丨耳道．深圳卓悅中心》

今日去左深圳卓越中心的耳道試下採耳，第一次採耳的感覺好新鮮，同我預期中的採耳都幾唔同，原來唔洗打側訓，平訓就可以，佢首先會開個cam比你睇下你兩邊耳仔入面咩環境，佢話我冇咩耳石，都幾健康，係入面紅左少少，可能熱氣，我見到左邊有舊大耳屎。

之後佢就會先幫我按一陣頭，好舒服既頭部按摩，大概1分鐘左右，之後開始採耳，首先右邊耳仔，拎支羽毛掃幾下，然後放個筒入去，之後就慢慢伸d細細支既野入去了耳仔，過程完全冇痛既感覺，甚至都唔係好feel到拎左舊耳屎出黎，偶然感覺到刮緊少少，都係好輕力，之後就第二邊耳仔，舒服到我都訓左陣，45分鐘其實都好足夠，兩邊做曬。

做完之後聽野又唔算清好多，可能我本身冇咩耳屎，但係全身都鬆左好多，採耳係幾舒服，呢間店每人獨立房，木系設計，好似太空倉，訓得好舒服，又有花茶飲，而且佢慢慢做，播下音樂好寫意，繼腳底按摩之後發掘到一個新的享受，價錢就200蚊人仔，我覺得係幾值得的，因為呢一個鐘佢真係做足，而且中途佢係唔會同你講野，比你全程寧靜的享受，又唔會好似去水立方按摩咁，全程聽個阿姐係度講自己有幾窮有幾慘搵幾少去搏你比多少少小費，明碼實價，做完就走，有禮貌，體貼周到的服務。

下次去會試下佢個頭療，頭部按摩都想試下，太太試左頭肩頸話超級舒服，舒服到唔想走，身心都得到療癒，意外地發現到新的拍拖節目。

《佛山菜 - 八號麵館及有記餐廳》

第二日我地渣車去食一間叫有記的餐廳，係佛山豬手比較出名的餐廳，我地叫左白切豬手，秘制茄子，雙皮奶，一份炒豬大腸，當中豬手落左花生油，係幾惹味，唔計大良炒鮮奶全部都好下飯的菜式，230蚊港幣，可以接受的價錢，食到好飽先走。

之後我地參觀完影城之後去左店家推薦的八號麵館，201蚊，叫左幾道菜，當中卜卜貝(白貝)最好味，完全無沙，d湯都好清甜，反而佛山瀨粉比較軟，好易折斷，可能唔係機器制所以有呢種質感，感覺比較接近烏冬，還有一道豬雜跟蔬菜湯，都幾好食的，只是主食不算太出眾，但坐在古裝街，天朗氣清的情況下幾有民國的情懷氣氛，路邊攤食物黎講算非常乾淨，甚至比台灣更加乾淨。

《台灣民宿之我見》

今次去宜蘭花蓮住左4間民宿，各有風格，比起住酒店，民宿價錢落差都幾大，其實我覺得民宿同酒店分別不算太大，對我黎講，有個接待處同有間房比我放行李就夠。

第一間民宿是山水澗湯泉，世界上除了義大利之外，只有宜蘭礁溪溫泉含有「酚鈦鹼」成份，而且冇硫磺，但浸落其實都係普通熱水感覺，冇太大分別，我都係鍾意按摩多d，不過呢間民宿係獨立屋既樣子，房間露台有個獨立溫泉，旁邊仲有韆鞦，非常寫意，以山景為主，右邊遠處望到少少海同日出日落，房間床都好大張，廁所有冷泉同溫泉可以浸，而且夠兩個人坐，至於早餐就係酒店式自助餐，可以望住山景露天食早餐係幾寫意，半山區的民宿，自駕都幾輕鬆。

第二間民宿就中左伏，係花蓮海邊邊民宿，呢間民宿有少少似青年旅舍，一開房間有陣味，冷氣吹風都有陣味，露台好殘舊，廁所板好奇怪，成個房間都唔係太乾淨，唯一好在去樓下對面cafe食早餐，早餐味道幾好，即叫即整既all day。

第三間民宿係成個旅程最正，係宜蘭既叢宿，地下個lobby勁有文青風格，而且早餐超級好食，又係即叫即整，擺放既社科類書本幾好睇，房間好新，雖然冇一個獨立廳，但設施一應俱全，訓得好舒服。

第四間民宿叫布魯懷特，完全係希臘聖托尼尼風格既藍白屋子民宿，成個民宿都係濃濃既海邊打卡風情，我地係海景雙人房，房中間好誇張有座巨型浴缸，中間個窗可以望到龜山島，仲睇到遠處太平洋的湧浪，房間是摩登現代風格，床好好訓，係我訓過最大張既床，3邊落床，不過缺點係大而無當，當客廳中間有個浴缸，如果我開滿熱水全間房應該煙霧瀰漫，水氣整濕曬全間房，所以最後都係去返廁所沖涼，反而房入面可以坐低食野既位置唔算太好用，加上大堂早餐竟然係盒裝既外賣早餐，即時扣左好多分數，覺得除左打卡之外其實冇咩特別。

總括而言，係台灣住過酒店及民宿，最鍾意都係簡單乾淨有早餐的叢宿，趁住台灣旅行住下唔同民宿，係幾好的體驗，又未去到好airbnb咁真係人地屋企，但又未去到酒店咁公式化既住宿，介乎兩者之間，叢宿最好的地方是，由頭到尾都唔需要同店家直接見面，所有溝通都係whatsapp就可以應付，其餘3間民宿，湯宿服務幾好，由頭帶你一次行房間，最差服務係花蓮民宿，無咩表情，至於布魯懷特店家幾熱情，但佢個種熱情係會令你想盡情完結對話然後離去。

《台北宜蘭花蓮5日4夜初婚之旅》

第一日

一到步台北桃園機場我地就首先去拎車，職員先帶我地去睇架車，然後影相記返低架車本身花痕，之後佢載我地出去到時交車位置再比架車我地，由於係左軚車，所以我一開始好緊張驚留唔夠位，所以渣得比較慢，同埋唔習慣打燈係另一邊，另外我地發現本身架車係未入滿油的，不過我地冇同租車公司講。

之後我地就開始渣去第一站環球中心中和店，很肚餓所以吃壽司郎再買手信，買完手信之後路過見到行李箱就買，可惜後來發現原來香港買更加便宜，比店家騙了，不過我們沒有行李箱，所以也是必要買的，再順便買銀包給父親。

之後換了免費泊車就出停車場，覺得在台灣泊停車場也比較簡單，有繳費機可以付款，然後我們就直接向山水澗溫泉出發，中途在宜蘭入第一次油。駕車的過程發現車子的引擎聲很大，山路更是有種快要爆炸的感覺，直路亦是非常嘈吵，第四日太太發現原來我們一直用L波駕駛，沒有用D波，所以車子的轉數一直在5000-6000轉以上，又不能快速的行駛，轉回D波就回復正常了，一直艱苦地完成雪隧及蔣渭水高速公路的路程，又走錯貨車磅重的路才回到主路。到達後已入夜，酒店在山腰之上，是獨立屋的設計，有3-4層，房間露台有露天風呂，還有秋千可以玩，不過始終覺得浸溫泉的時間不長，我傾向去按摩好似更加舒服，下次可以不選溫泉。我們駕車到中和路吃八寶冬粉，味道不算太好吃，冬粉更是難吃，可是價錢比較便宜，只要港幣35蚊就可以解決兩個人的晚餐。飯後我們去買藥妝，然後上車回酒店洗澡休息，完成今日的旅行。

第二日

食完早餐，直接向太魯閣方向出發，中間在蘇奧服務區買手信及甜品，發現宜蘭盛產麻糬，宜蘭餅也不錯，可是其他餅比較硬，然後開車到太魯閣，直到天祥停車場才泊車，吃普通台灣飯菜，感覺來來去去都是肉燥飯，魚蛋湯，炒米粉等食物，一開始吃會覺得抵吃美味，吃多三四餐就會覺得很膩很厭，再吃會想念香港的食物，奇怪為甚麼台灣人每日吃都不會厭，然後我們再開車至白揚步道，步道比較遠及長斜路，沒有太多景色，所以我們決定離開再開車回頭，在九曲洞步道停下，然後觀看太魯閣峽谷的景色，九曲洞十分震撼，步行在洞穴之間，會驚嘆究竟花多少人力物力才通出這條中橫公路，中途更聽到落石碎裂的聲音，峽谷險要，高不可攀的峭壁令人側目，往下望可見立霧溪水，大理石璧鑿出的道路，以前是舊中橫公路，原來是清初至今採金的道路。

離開太魯閣我們開車至七星潭卻開始下雨，我們到海邊邊民宿安頓，發現民宿衛生情況一般，比較舊，人流亦不多，基本上沒有見到其他租房的人，然後我們開車入油，途中發現胎壓異常，找個油站打胎氣，再前往花蓮市養鍋打邊爐，吃完後肚子痛返去上廁所，然後驅車前往時光二手書店買書，再去附近足底按摩店按摩，按摩的技師手藝不錯，可惜人流只有我們兩人，收費跟香港相若，性價比不算太高，唯一好處是不用給小費，按完摩後想到夜市買宵夜回民宿，可惜過了9時後大部份已關門，加上下雨更加難以逗留，唯有找一間串燒店吃東西談天，說起來好像只有我們二人和店家兩人，人流極少，路上的餐廳選擇不多，市面人流亦比較冷清，餐廳也不用排隊就可以進去，街邊可以隨意泊車，看來花蓮的夜生活不算豐富，所以我們食完後就回民宿休息。

第三日

早上去海邊邊旁邊的Cafe食早餐，味道都幾好食，之前我地返民宿check out，就係樓下拎車馬上向北迴歸線紀念碑出發，然後過鳳溪一條直路去到光復鄉附近，諗諗下覺得有D遠，而且天氣麻麻，所以決定改去石梯坪，於是我地轉左去光豐(光復鄉及豐濱鄉)道路，原來是一條好多彎既山路，中間部份路段得一條行車線，有一刻差D同對頭車相撞，好彩睇得夠快扭開，執返條命，繼續覺得引擎就黎打柴的感覺，之後到左石梯坪馬上去洗手間，係一個冇咩人既旅遊區，我地係一間原住民既Cafe巴克力藍食少少野，阿美族語「Pakeriran 巴克力藍」是指花蓮豐濱鄉，然後我地影下相，之後行上石梯坪，好似樓梯既石頭，好多皺摺，係岩石經過長年黑月扭曲推壓而形成的獨特地貌，好鍾意呢種類似萬柱海岸的風景，巨浪滔天，太平洋的一望無際感覺。

之後我地就渣車向新社稻田進發，路過牛山呼庭，中間停在花蓮的山度，入去打卡，之後渣車去嶺頂沙丘，發現原來只係國姓廟望出外灘的一幅地，有少少似三家村石礦場附近的村落，之後再渣去星巴克洄瀾門市貨櫃場睇下，旁邊的商場空無一人，仲冷清過內地的商場。繼續渣往宜蘭民宿，中途又再經過太魯閣大橋，沿途第一次入夜渣山路都真係非常漆黑，最後成功去到叢宿，好靚的一所民宿，在農田之間，非常清幽，放低行李之後我地馬上渣出去夜市搵野食，去羅東夜市食完野，再去附近購物，然後返民宿休息。

第四日

早上起來落樓下食早餐，民宿的早餐係即叫即整，好有心，而且超級好食，食完飲杯橙汁睇下書，過多一個鐘先出發，今日冇咩特別節目，首先我地去左張美阿嬤農場同動物玩，然後再渣去睇落羽松，之後就去黑RURU Cafe食野，但食物唔算好食同埋偏貴，之後再渣去民宿布魯懷特，一間希臘藍白小屋風格的民宿，好多樓梯，房間是海景房望龜山島，房有一座大浴池，好看卻不中用，放下行裝後我們去宜蘭傳藝中心睇下紅磚建築，有一個好大的公園，店家不算太特別，以手信店為主，有少少似永慶坊，呢方面我覺得廣州會比多野睇，之後我地就渣去新月廣場，可惜冇咩特別野好買，食左個牛扒餐，之後去東門夜市買宵夜返民宿食，可惜民宿桌子很小，很難吃東西，之後洗澡入睡。

第五日

清早起來到樓下吃早餐，這間民宿的早餐是外賣，有少許失望，可能因為之前所有民宿都有廚房提供早餐，換了要吃外賣有點奇怪，而且味道一般，令我對這間民宿的印象大減，然後我們出發由宜蘭返台北，到了石碇服務站落車看看，可惜沒有甚麼好買，就繼續前往華泰名品城，很多名店，價錢相宜但款式有限，不是最新款，最後也沒有買到甚麼，在food court吃完最後一餐台菜就去入油還車上機返香港了，結束5日的台灣旅程。

總結，也許景點不算很多，宜蘭花蓮也沒有甚麼好看，畢竟鄉村地方要求不能太高，天氣差比較少戶外活動，見識過4種不同種類的民宿，果然各有風格，最貴未必最好，能遇上一所簡約但好住的民宿，就像遇到一個對的女孩那樣，有太太在身邊行商場感覺反而像到愉景新城拍拖，沒有太大異地旅遊的感覺，反而即使風景很好但只有自己一個也不會有難忘的感覺，一起計劃旅行試伏的體驗，就是天氣不似預期也感到歡愉的初婚生活。

《港車北上丨廣州站》

我地第一站由港珠澳出發，直接渣到去永慶坊附近先落車，落左車向上下九步行過去，搵到間陶陶居，由於肚餓，於是就入去食，發現係陶陶居既總店，叫左幾樣點心，蔥油拌麵正常，沙翁凍得黎唔夠大澳好食，冰鎮咕嚕肉就只係凍左既咕嚕肉冇咩特別，甚至比熱既咕嚕肉，以冰配酸甜咬落有去鬆脆外層，但食落完全冇呢個感覺，反而蝦餃同燒賣都真係好大隻，去大陸食野真係要小心選擇，否則其實同香港分別不大的。

之後去左行荔灣區永慶坊，呢條街砌到好似拍古裝咁，有小橋流水，中式庭園，而且都幾新，行得幾舒服，小店賣既精品都真係幾靚，好多廣東話句子既精品都幾得意，食店都幾特別，好多燈籠同打卡位，夜晚睇係會有feel過日頭，外面大街有騎樓糖水舖，仲有即叫即整超好食糯米糍同埋特別口味既蛋撻，仲有雪糕同鴛鴦，幾好行的一條街，相反荔灣區上下九步行街都幾冷清，賣既物品都係唔等洗或者好頹，冇咩特色。

我地之後渣左去越秀區大佛寺: 呢個寺廟都幾巨型，外面睇好多人話似千與千尋既油屋場景，我去到又覺得真係幾似，佢D燈光打落紅色既建築外面好靚，唔係金碧輝煌個種靚，係有少少暗光既紅色，入面有3尊大佛，白玉觀音同好大幅既菩薩雕像璧畫，以廟黎講都幾靚，值得睇下，附近北京路步行街，冇咩特別的一條步行街，好多比較好食既店都好排好耐。

我地去左傣妹火鍋度食晚餐，勁平既火鍋，4個人都係300幾蚊埋單，材料正常，羊太大陣味，湯底重慶辣到苦，唔算十分好食，衛生條件都一般，原來係火鍋界屬於比較下欄級數的火鍋，可惜附近冇搵到食咩好，唯有求其揀，所以係中左少少伏既。之後我地返左去永慶坊食左間騎樓糖水店品燕君，老闆話綜藝都有取景，可以推窗出去望騎樓的，舊式糖水店情懷。

今次揀既酒店係永慶坊入面，樓下係翻新了的古街，幾有風味，酒店所有飲品免費，廁所仲有日本個隻有洗屁股的，可惜房間比較熱，出風太細，去水比較慢，但我自己就尚可接受的。

第二日訓醒左我地就離開酒店去越秀區聖心大教堂，聖心大教堂係一座歌德式教堂，原來教堂既石頭係由牛頭角同茶果嶺掘完運過去起的，可惜無開放比公眾，外面條街勁多車勁熱鬧，海珠廣場其實係一個大型公園，搵唔到有大商場，中間淨係有個大雕像，所以馬上離去。

下一站我地去左海珠區太古倉: 將好多年歷史既珠江江邊貨倉改建成為碼頭餐廳，可惜日頭冇咩人行，除左食其實都冇咩睇，但靜靜地都幾寫意，感覺附近D樓應該幾貴。

我地食左一間唐苑酒家，原來以往都係貴價餐廳，整改後搬左去江邊，叫左一隻片皮鴨，好奇怪，其他餐廳片皮鴨通常都有少少肉，呢度直情可以片到只有皮，但份量唔多塊，有少少後悔冇叫二食，浪費左鴨肉的，石鍋翅又平又抵，40蚊，廣州的西關瀨粉勁淋身，一夾就爛，好似食緊糊仔咁，瀨粉的口感非常特別，就像是加了米粉的米糊。瀨粉都是提前做好的，為了保持粘稠度會一直放在保溫鍋內，我都係鍾意香港瀨粉多D。其次蛋撻同埋燒賣都正常，我最愛係乾炒牛河，炒得幾好食，是一道廣州唔會中伏的菜式，可惜埋單要500蚊，其實都幾貴的，因為12蚊一個茶位費，但香港食一隻片皮鴨要428蚊，幾乎等於我地呢餐飯，可以食到西關瀨粉同牛河，都算係品嚐左廣州的經典菜式。

食完行陣太古倉，太太鞋子破了，就決定去天河區太古匯買運動鞋，再行萬菱匯。太古匯根本就是翻版圓方，萬菱匯反而多餐廳，有間中式甜品店幾特別叫入續，桃膠甜品，有開心果糊，超濃，女子們不停食桃膠甜品，我就飲我既養生茶飲，幾好飲。

之後返去拎車見到車子有少許花痕，泊街的浪漫在於有歲月留痕，驅車前往荔灣區嶺南花卉市場時慢慢天黑，呢個花市真係非常值得去，去完會發覺係香港買盆栽同花真係好貴，5蚊18支玫瑰，好多鮮花盆栽都係10蚊，部份仲要幾蚊已經有交易，極度抵買，買完都唔會心痛既地方，買完放上車即走感覺好好，唔洗等巴士走人，附近唔見得有的士可以截，我諗緊買完花冇車可以點樣離開呢。今次去曬廣州4個區，海珠越秀天河荔灣，4個地方都有唔同特色，同太太一齊感受下呢個地方既風土非常寫意，假日出走，唔洗係香港去探索下新地方係幾正。

《入續丨廣州的新派糖水店》

「這家店面積約120平方米，整體空間以新中式美學為基調，結合竹林流水景觀、禪意木質佈景、草木植物裝點、嶺南窗花元素等細節設計，呈現古樸自然又不失溫情與趣味的空間感和休閒體驗。 開放式明檔廚房讓製作區域可視化，「真材實料看得見」。 外擺區更以竹木為主要原料搭起廊架，模糊室內外空間界限，形成一體化的空間視覺感受。

“輕補時入，想念時續”，品牌名“入續”二字，其實也寄託了Chace進入賽道的初心和希冀：“'入'是回歸本真、恪守內心，'續'是延續 、連結。入續希望透過重塑空間的自然、堅持食材的純粹，以一碗糖水，與顧客形成更緊密的聯結，讓更多故事在這裡發生。”

質地上乘的特A桃膠，中國三大名蓮之一的武義宣蓮，「單單蓮子這個原料，我們當時至少試了50款，幾乎把市面上能夠買到的乾蓮、鮮蓮，所有的品牌、所有的品種全部都試過。」

雖然我唔算十分鍾意食糖水，但見佢吹得咁勁，覺得大陸D糖水舖都真係幾有心思係呢個市場去競爭，廣州人都幾鍾意食糖水，周街都糖水舖，呢間「入續」暫時係廣州限定，唔知遲下會唔會開分店去深圳。

唔知會唔會同大鴿飯一樣，都係先係廣州立足再向深圳擴展，如果賺到錢最後就可以衝落香港。