《萬象前海．同仁四季丨深圳的市菜？》

今日經深圳灣搭快線m507到桂灣地鐵站，站旁邊就是萬象前海，網上說深圳最美的商場，走了一圈覺得沒有甚麼特別，人流極少，的確有不少高級食府但沒有人光顧，這商場強調生活美學，設施幾新，但跟一般商場的分別不大，只是露天的地方比較多，我會覺得深業上城好似更加特別，不禁令人好奇究竟這麼少人流可以賺錢嗎？

之後去食同仁四季，朋友說椰子雞好吃，有人說椰子雞是深圳的市菜，雖然文昌雞及椰子都是海南的名物，兩者放在一起卻成為深圳最常見的餐廳之一。其實椰子雞不過是椰子水做湯底放進文昌雞的火鍋，雞不能煮太久，否則肉質會變粗。

事後回看，其實應該在雞熟了以後先盛一碗椰子雞湯喝，我們卻在涮完牛肉，蝦，菜，丸子所有食物後才盛一碗湯喝，雖然味道鮮甜，有各種味道，但會比較油膩，似乎一開始只有雞的時候飲湯會更好。另外原來很多人食椰子雞會叫臘味煲仔飯，見到許多桌都叫了一個，這樣我們就不用叫火鍋配料了，還不如椰子雞加煲仔飯更有風味，價格也許亦更便宜，因為火鍋配料的肉類丸子很多地方也有，還是抱著打邊爐的心態是不對的，但這樣也是好事，見識了深圳的椰子雞食法。

網上說法：現開兩個椰子，椰青+椰肉+兩片薑，鍋底就有了；椰子雞配上煲仔飯是必點CP；配菜必備竹笙、馬蹄；火鍋蘸料也是點睛之筆 ，一定得有沙薑、青桔、辣椒、醬油。 緊接著點完菜，等到椰青水沸騰，雞肉便可以與它相遇。 先別急著將點的火鍋配菜加入，這時候喝湯才是第一要義，清澈鮮甜的椰子雞湯，絕對是靈魂。價錢比較貴，409蚊人民幣，下次大可不必再去，性價比不是十分高，亦不是十分特別的菜式。

旅行消費分析及檢討 (2023年10月)

兩日的東京旅遊消費比例，住宿佔27.8%，交通費用估23.7%，手信費用佔5.6%，餐飲費用佔11%，機票佔25.2%，觀光費用佔6.7%。

縱觀這次旅行，最大的問題恐怕在於伊豆長岡的溫泉旅館沒有熱水供應，我想或許大部人都會選擇溫泉洗澡，但不代表房間沒熱水不是一個問題，酒店沒有提供換房選擇，只是道歉然後離開，白白浪費了酒店的開支，還是APA酒店質素最穩定。

在飲食方面的開支必須要提高，可惜我們覺得日本的飲食比較單一，可能因為我們不愛吃特別的海鮮，亦不喜歡拉麵，所以會覺得日本的飲食變化不多，只有丼飯及西餐，交通開支方面我發現自駕的費用其實跟搭乖鐵路差不多，但多了很多樂趣，值得以後再試。

另外就是沒有帶信用卡，發覺很多地方都沒有手機支付功能，加上電話卡沒有通話的組合，所以在酒店借電話亦花了一筆無謂的費用，最後就是找不到油蓋，只能交給酒店方面入油，比普通自助漲價了20%，另外通宵溫泉沒有太多東西可以吃，也許在外面買點東西進去吃比較好。

另外經過今次檢討，下次旅行要預備充足以下的物品及其他注意事項:
1. 點煙器，方便充電
2. 國際插頭加兩條以上的充電線
3. 帶一個尿袋以備不時之需
4. 買兩張具有上網及通話功能的電話卡
5. 將汽車保險升級至最高
6. 帶西瓜卡搭乘交通工具
7. 檢查內衣是否破爛
8. 盡早同一時間辦理登機手續
9. 車子轉彎要預留多點空間
10. 帶一個大的環保袋存放物品
11. 帶一個大的背包

《鳴謝女友丨女朋友旅行期間發揮的關鍵作用要覽!!》

1. 男朋友唔帶現金，全程有帶現金買車票

2. APA酒店搵到點樣係房度開冷氣

3. 竟然搵到另一條條熱海公路可以睇曬成個相模灣免費觀光

4. 搵左間好好睇好好行既動物園

5. 成功在電話沒電前找到新八景園酒店的門口泊車

6. 竟然可以搵到免費公路縣道12號由東伊豆去西伊豆

7. 諗到去酒店大堂借電話通知緊急事故中心及報警處理交通意外

8. 趁警察黎到前上去拎齊曬所有文件報案，所以報案非常順利，沒有文件遺漏，基本上我咩都冇拎完全交託曬比佢

9. 電話無電既情況之下都可以記得條路由警局渣返去酒店

10. 趁我上去浸溫泉既時候將所有行李都執拾好，一上返黎就可以即刻出發

11. 帶去河口湖既路竟然比佢搵到個無車泊既停車場對正富士山

12. 急尿之際竟然識得帶我去遊戲機店去洗手間

13. 東京市路況複雜，勁在搵到路返去新宿既油站再落返去交車位置

14. 幫手PACK到行李由兩袋變一袋再唔洗託運就上到機

《最容易上手的東京自駕遊？》

東京自駕比想像中簡單，我地選擇左係西新宿的orix拎車，租車費用1000蚊港幣兩日，聽職員講解之後就落去商場地庫停車場拎車，非常方便，拎車前需要先檢查車子外型有冇花。

呢架車子好新，只係行左7000公里，我兜左一個圈望左兩望就拎車走，其實應該細心睇下會比較好，但好想快d到達目的地，所以都冇細心的檢查。

出左停車場之後就向伊豆半島出發，道路上的標示都好清晰，開頭唔係好識用導航系統，慢慢都熟習了，冇帶點煙器轉插，冇得充電，後來我地發現原來車子櫃桶入面有條線可以充電，幸好冇買點煙器，車上一早已經裝左車cam，所以都十分方便，睇路既手機支架是多餘的，因為女朋友就是最好的導航系統。

由新宿出發往伊豆半島自駕遊

東京自駕跟香港自駕最大的分別是東京沒有迴旋處，香港則有許多迴旋處，另外日本人不愛切線，比較禮讓，同時亦不會督油，但兩個地方都普遍不跟限速牌駕駛，例如日本道路限速40時，大部份的車子都以時速70以上行駛，當時速80時又會以100以上行駛。

道路上沒有快相機，即使超速，在交還車輛時亦沒有任何違法的告票。在高速即使行錯路，轉一個圈很快又可以回到高速，不像香港一走錯街口或道路要很久才可以回到正途，不過東京近郊地方的高速公路塞車情況都比較嚴重，因為道路大多只有兩線，相比香港三線或四線的主幹線來的狹窄。

無論在那裡停車都不用支付停車費，兩天自駕遊都沒有付過停車場費用，計返交通費用，其實都係比列車多幾百蚊，但去到的地方卻多更多，而且不用等車搵鐵路站，旅遊地點不用局限在車站附近的景點，更加善用到旅程的時間，絕對係省錢省力的最好選擇。

呢架車子係本田既fit，同我自己架車唔同，佢係油電混合，所以行起上黎比較靜，極度慳油，大部份時間都係用電池既電，加上紅綠燈唔記得開車佢會提你，跟車太貼都會響，加埋電子手制，非常方便，我自己架車就好落後，仲係用手既手制，冇任何警報提示的一架純汽油車子，但操控感方面我都係比較鍾意自己的車子，可能渣慣左。

《P牌買車駕駛心得》

渣左車1年多，作為一名假日司機，許多事情都要自己去試同摸索，我發覺好多人話香港渣車貴，可能我幻想中係好貴，到自己渣既時候又覺得還可以，唔係話費用好平，而係可以豐儉由人。你可以選擇買30萬既電動車上會慢慢供，或者好似我咁買架5萬蚊既6年二手車仔假日代步，同平日搭交通工具既體驗好唔同，世界視野廣闊左好多。

香港渣車最貴係停車場租，價錢大約3000幾蚊，其次就係入油，渣車開初入esso同shell，之後轉用中石油，發覺分別不大，但價錢平好多，因為好多人都會覺得入中石油傷車，油質素比較差，我自己用落又覺得冇咩明顯分別，加上直減好方便，唔洗儲分揀日子，偶然仲可以用到油劵。

另一樣P牌比較在意可能係切線或者搵路，切線呢樣好多謝我女朋友，佢唔係一般乘客，每次都會幫手搵路，到多車要切線時候會預先開窗伸手出去，突然收慢或者要泊位時候又會打定死火燈，避免左其他車睇唔到，其他車都會讓我，冇佢我諗我好難渣足成年都冇意外發生，令我覺得係香港駕駛只要唔好渣太快同小心其實都幾安全，入紅隧同高速公路切線都十分簡單輕鬆，享受到駕駛的樂趣。

好多人都會覺得一架1196cc既車子應該好慢唔夠快，事實上香港即使行高速公路低cc車子其實都好夠，個分別可能係加速既時間，但我覺得低cc既車反而安全，因為冇能力同人地鬥快加速，所以唔會出現大家搶住切線既情況，緩緩加速感覺幾好，十幾秒之後都可以同其他車一樣以時速100公里行駛，我對於車子的性能都十分滿意。

至於好多人驚入迴旋處，其實只要了解迴旋處用法問題不大，唔會出現有時唔知點轉既問題，加上睇實鏡後面有冇車，其他線有車就收慢比佢過先，可以大大減低意外的機會。渣車之後最大感受係網上好多分享其實都誇張左，最好都係自己親身去試下先知真定假，例如易通行之後，假日入隧道的確順暢好多，冇其他網上評論講到咁好似更加擠塞。 

《P牌買車子的簡單經驗分享丨二手車維修》

去年人生中第一次買車，咩都唔識，而家甩左P，有少許經驗可以總結下。

第一次去試車既時候地點是在火炭，當時剛考到車牌，其實未正式渣過車，驚試車撞花人地部車，所以就搵左老豆去試，佢好頹，兜左兩個圈話冇野，之後講下價平幾千蚊，就簽左個簡單的臨時買賣合約。

注意事項一：試車

事後睇返，簽臨約之前其實有幾樣係應該要做的。

1. 上架驗車

驗車分兩種，一種係叫人親身去車主度驗，另一種係電腦驗車，電腦驗車會詳細好多，而真人驗車基本上會睇到架車有冇撞過，車軚有冇甩曬d紋，同埋有冇漏油既痕跡。我個人認為腳車黎講普通驗車都夠，大約1300蚊。我係簽完約先驗車，變相驗到有問題都好難退訂，加上少左個講價的理由，因為師父話有輕微撞過後面既痕跡但問題不大，再問車主先知係停車場倒車撞到後面，已更換撞毀部份，以我自己泊車經驗，撞到後面其實能力都麻麻，因為有車倒後攝錄機，咁都撞到好打有限。因此，最好先驗車再落訂。

2. 留意有冇花痕
車子有少量痕跡是正常的，但最好認真留意，然後每個角度都仔細影下相，方便交收既時候可以對返究竟試車之後有冇再刮花的痕跡。

3. 自動怠速系統
這個是我買車後發現的問題，就是自動怠速系統會失靈導致車子死火，我也不知道是車子電腦問題還是零件問題，但問題亦不大，我亦冇打算整，只要每次開車都熄掉就可以，因為不少人都很討厭這個系統，香港燈口距離太近加上遇上塞車的機會不小，這個系統環保的功能有限，不用經常著車熄車。

4. 留意簽臨約的人是否車主本人
這個問題是我簽約後回家發現的，買車當時只顧講價沒有留意簽約者是否車主本人，雖然問題不大，但當時也有點害怕，最好就叫車主拎牌簿去試車，方便簽臨約的時候可以核對是否車主本人，假如將來有問題也可以追討。

5. 試車燈
白天試車也需要試一下車燈是否正確，我發現買車後有一面大燈很快就燒了，需要更換，費用200蚊。

以上就是買車第一次總結的經驗，擁有自己的車子需要親力親為，假如只是駕駛家人的車子，許多事情都可以假手於人，學到的東西也未必這麼多。買車保的流程也很簡單，P牌費用大約5850蚊，第二年的保險就平了很多，只需要3200蚊，批出以後，過戶可以交給代辦公司，約1000蚊，不用親身去排隊，之後到了交車那天取回牌簿就可以了。

買車以後最好還是去車房檢查一次，由於我不知道車子有甚麼問題，所以還是交由整車師父決定，我更換了兩條車軚，更換了煞車碟，清洗了蝴蝶掩，換油隔，風隔冷氣隔，波箱油偈油，合共3720蚊，之後就可以正式在道路上行駛啦。

《港車北上元朗驗車手續非常簡單？！》

申請左大陸車牌，就去運輸署提交港車北上申請。網上支付封閉道路通行許可證每年HK$540，之後一段時間會收到通知去驗車。網上預約左驗車要記得cap返圖，我唔記得cap圖所以無法證明自己有預約，但其實都冇咩人排隊，同佢講聲都可以去櫃枱馬上辦理，但都係要網上先預約比較安全。

我選擇左中檢驗車，位置係元朗工業邨，第一次去的時候未抽到籤，所以淨係係現場裝左智易通，目的係利用無線射頻辨識（RFID）技術提升跨境私家車車牌號碼的識別率，從而加快陸路邊境管制站的清關效率，睇完都唔知究竟有用途，裝左先算。

第二次再去中檢，發覺自己係冇帶牌簿copy，原來即使有soft copy都係唔得既，一定要帶副本去，所以唯有第三次再去，驗車費用$400，再加裝口岸通關卡費用$400，合共800蚊，比完之後佢送返一張超市現金劵100蚊比我地，即係實收700蚊費用。

比完錢之後就去出面交表處交表，之後就上返車等叫車牌，坐左係車一陣傾左幾句已經聽到佢叫佢我車牌號碼，就渣架車埋去落車比佢驗，大約16分開始驗，24分已經驗完，唔洗10分鐘就驗完，內地驗車流程最主要係打開車頭蓋影下相，唔洗升起架車睇，之後職員會裝埋通關卡係車頭擋風玻璃，然後找返張比錢收據比佢吸返個印，之後就可以渣車走人，辦公室入面都可以買交強險，但係就要連埋商業險一齊購買，大約人民幣2700蚊左右，我覺得有點貴，所以都係選擇網上自己購買，於是就簡單完成左中檢驗車流程渣車離開。