今朝一早起身就拎住行李去由行橋開始向下搭，目的地係由布院，大約一個鐘左右到達大分站，去到行去另一個月台，上到去月台我發覺冇一架列車寫住由布院之森，只係寫住兩個不知名地方。
奇怪，於是我落返去望指示板。
跟住上返去月台就及發現架列車開走左，我知道個兩架車，一架去唔到由布院，另一架終點係由布院之後好幾個站，原來只係普通特急，所以唔係由布院之森，直到而家我都唔知道係咪因為打風取消左由布院之森。
無論如何，去唔到由布院，當時我預約3點左右離開由布院返去小倉，所以根本冇時間去到由布院，因為搭得黎都要趕住走，於是諗左陣決定放棄，而家諗返轉頭，其實我可以回程唔搭由布院之森，搭返普通特急咪得，又唔係只係得佢一班車，再者，其實我可以由大分搭去別府睇下地獄都好。
大分車站。
結果我選擇左咩呢？我選擇左走人，就係搭返去小倉，呢個係最失敗的決定，因為冇列車到，我於月台企左一個幾鐘先有車返去小倉？點解我要去小倉呢？因為我今晚酒店安排左於小倉站前酒店。搭列車去小倉途中又遇到故障，結果列車上百無聊賴，玩下whatsapp，成兩點幾先去到小倉。
去到酒店放低行李就四周圍行下，我揀左apa，但我覺得小倉間apa唔係好就腳，距離商店街同埋大商場都有段距離，但旁邊有一座動漫商場，幾層高，係九州市最大動漫館，仲有間北九州市漫畫博物館。
小倉駅。
好多動漫睇，用黎消磨下時間一流。
跟住我就行去商店街打算搵野食，已經係下午了，市場的店都關左門，冇得買海產例如壽司刺身，所以我去左大創行街，買左唔少手信，不過返到香港發現只有少部份手信係值得買，其他都冇咩用。
之後我就去左吉仔食咖哩，我覺日式咖哩好好味，於日本我覺得定食，燒肉，和牛同咖哩係我會食的東西，其他食物例如刺身、壽司、火鍋我暫時都冇咩興趣。
順便於車站前買左個便當返酒店食，但係太凍啦，味道一般，但幾有當地風味，香港好少機會車站前可以買到個便當返去屋企食。如果咁易有便當買，我諗餐廳應該會少好多生意。
返酒店，唔知係咪太累的關係，一訓就訓左一個鐘，醒返已經係夜晚8點，我睇地圖見附近有激安之殿堂，大約行18分鐘，咁我就決定行去睇睇有咩買，結果去到間舖，好多野睇，幾層高，於是我成晚就行街，我覺得行超市或百貨令我唔記得出面發生咩事，都幾放鬆，最正係呢間野退稅唔洗排隊，一諗起上次東京排左成幾個鐘之後仲要趕最後一班地鐵就覺得好慘。
今次雖然落大雨，但其實條街仲係好乾淨，冇咩臭味，有兩三日唔洗聞到煙味真係好舒服，空氣質素比香港好好多。其實旅行旨在渡假休息，冇咩非做不可的事，即使計劃要去的地方去唔曬其實都冇咩所謂，記得第一次去京都時因為錯過左美山町個班巴士而耿耿於懷，又會因為天氣唔好覺得旅行蝕左錢，但其實可以去旅行本身已經係一種福氣，呢幾日完全自主，鍾意洗幾多由自己決定，反而懂得節制，購物以實用為主，行到頂唔順就訓下，唔洗諗咩話題同其他人講。
今晚的宵夜。
小倉係一個唔錯的城市，入夜後仲有唔少餐廳營業，燈火尚算通明，天氣清涼，冇東京咁多白領，又冇佐賀行橋咁冷清，條街多d人，有人會踩下單車。