之後搭返一個站去秋葉原，將買的東西放在locker，之後出站，發現落大雨，唯有急步行。
發覺日本地鐵站有d位真係好矮，我行過去都會撞到頭，係咪為地震用途呢？定係以前d人真係咁矮？
呢度係文化中心，即係大劇院。
雨程最好都係去博物館，響呢度我留左大半日，一開始仲比左錢拎個導賞機，但我發覺個導賞都係針對幾件展品有語音導賞，其實佢每件展品都好詳細咁講到底係咩黎，比起台灣博物館同歐洲的博物館都詳盡，又有中文，唔洗借導賞機都可以。
好多學生都黎參觀，好多佛像雕塑，都係我比較鍾意，反而對於書法同畫我就真係唔係好識欣賞。
好多唔同種類的刀。
都係雕像係比較好睇，其他畫同書法我覺得冇咩特別，不過作為國立博物館，都算係比較好行，但係冇咩特別獨特的代表作，例如英國有羅塞塔石碑，法國有名畫，日本最出名的神奈川沖浪圖就外借左，好似我上次去台北故宮，白玉菜又係借出去比台中的展覽，實在抱憾無緣。
撞到學生的參觀活動。
完左上野個面的參觀，就搭一兩個站去秋葉原，雖然我不熱衷動漫，但都想去睇下究竟個度係咩地方。
秋葉原都好多動漫的figure賣，仲有好多層公仔機，影貼紙機，卡通精品kiddy land，幾多野睇，但無咩想買，都係走馬看花為主，但見到好多香港人同埋好嘈。
價錢有d二手都係百幾蚊，貴就幾千都有。
前面呢位香港少年收獲豐富，羨慕佢。我就兩手空空。
走入內巷，有好多女僕響條街度宣傳，有部份響樓上宣傳，不過好似冇咩人理佢地，樣就麻麻，我就說咩興趣，不過香港都比較少見呢種街頭宣傳。
返地鐵站前見到akb48 cafe同埋高達cafe，同樣都冇咩興趣哈，到此一遊。
行到半死，經過秋葉原洗禮，覺得有d頭暈，街邊太多人與車，無左早兩日的寧靜，於是就想返去酒店抖下，一開門見到黃昏夜景都真係幾正，順便食埋車站買的便當，一個人靜靜地食便當都幾開心。食完就玩下手機，累就抖下，好快就訓左。
本想就此結束今日的旅程，但訓到8點半又醒左，hea左陣，覺得渾身是勁，一場黎到東京點可以浪費晚上的時間呢？於是提起精神，馬上換衫，呢個時候師兄話要幫佢買清酒，去bic camera，我根本都唔知咩黎，但去搭去銀座附近的有樂町站，之後再拿拿聲行去，因為佢好似10點就關門。
地鐵站都見到呢間百貨公司，搵到清酒，再影比師兄，最後臨關門就買咗兩支清酒，叫路上有花。
拎住兩支清酒再搭去銀座，搵到去激安之殿堂買手信。
想買少少野比細妹同埋朋友，最後埋單大約萬幾日圓，返去先睇下到底邊d手信係好，都係抱著嘗試心態，因為上次泰國曼谷手信好多都係無用，評價一般，但我又好難狂掃貨。
見到飛機杯，參覲下，可惜無朋友想要。
排隊先係地獄，由11點3開始排，排到11：45先到我可以埋單，為左平少少要等咁耐真係慘，平幾多？我就真係唔清楚，之不過諗返其實好多地方都有藥妝，我買個d又係基本款，度度都有，事後諗返響度排隊真係傻，試下購物都係一種體驗，算啦。
但最後一班火車12：30開出，我好彩12：15可以離開跑去銀座站，之後就轉車去新橋站，新橋站係關鍵，因為最後一班返去有明的火車就係海鷗線12：30由新橋開出的鐵路，問題係我去到新橋發覺個陣快將落閘，於是即刻彎低身爬進去，以為自己成功左，先知自己充值用完，唯有搵職員帶去增值，準備增的時候先知原來去錯站，因為新橋好多條線，我去個條唔係海鷗線，爽呀！
唯有爬返出去，根據職員指示跑去真正新橋站，跑到去，剛好上到最後一班車，行左無數樓梯，拎住兩支清酒同埋手信，非常辛苦，好彩趕到，否則都唔知點樣返去有明，節省左好多時間同金錢。
為左獎勵自己，去lawson買左兩個飯團，枝豆同埋日本人比較喜歡的yebisu啤酒，枝豆好似香港仲好味，飯團就差唔多味，至於啤酒好苦，但對住個海，完成一日任務，是滿足的。
