第二朝一早起身就check out，之後就買左去羽田機場的旅遊車票，然後再將行李寄存在有明酒店裡，自己就去市場前睇下魚市場╴即係新豐洲市場，因為成9點先去，所以冇左凌晨賣魚睇，去到發現原來係一個有冷氣的市集，裡面有好多賣乾貨同食物的店，見到好多海產。
我買左個玉子黎食，比想像平，廿幾蚊港幣，恆安宵夜都係呢個價錢，但係份量好多，食完都等於食左一餐，涼浸浸好好味，我覺得全程最抵係買呢個黎食，因為lawson雞扒雖然好味，但係有時候賣曬，而且熱氣，呢個玉子食完好飽肚，送茶一流。市場前我行左幾圈之後就離開左，本身都想買少少乾貨零食，但係又唔想拎咁多野，同埋唔知道香港有冇得買，同埋貴唔貴，所以都係唔賣算。
之後我就搭去台場海濱公園，一開始係去aqua city睇下，一直不斷行商場，今日最主要就係參觀台場。
見到有間文具店，d文具都唔錯，不過我冇買到。
呢座就係aqua city，由於天色唔太好，所以都係行商場最好。
之後行左去自由神像睇下，天氣唔好，影到好核突，原來呢座係象徵日本同法國友好的建築。
突然間見到有間恤衫店賣衫，發現竟然990日圓！即係80蚊港幣，平過香港一半，即刻買左兩件返香港著，呢間店叫suit select，在大商場開店，品質應該唔錯，之前搭地鐵見到成車地鐵都係著恤衫，好似當恤衫係便服咁著，打扮非常斯文，所以都想買番幾件，買返去日本的手信中，應該係呢樣最抵，明顯地平過香港好多，而且又唔會撞款，唔差ga。
之前繼續行走，出返黎再去第二個商場。
來到台場Diver city，呢度最出名係門口巨型高達同埋頂樓高達博物館。
但去到商場食下野先，聽講日本吉野家好味d，於是我都買一個餐試下，食落又覺得差唔多，香港仲好似選擇多d。
上去高達展館睇睇，真係好多高達，可惜我唔係高達迷。
出番黎發覺天色竟然突然變好，同頭先一片灰濛濛差好遠，行落公園身心舒暢。
旁邊仲有一個維納斯城堡，其實係outlet黎，裡面都有幾多特別的牌子，而且設計好似西方古代建築的風格，幾正，我幾鍾意行，因為周圍都係暗暗地。
又真係有個維納斯女神噴水池
呢度就比較奇怪，應該係akb48之類的見面，見到好多人排隊，仲見到女人排隊睇，但我唔係好明白，行近望都係普通人樣，其實都冇咩特別，唔明點解咁多人排隊，見到面又有咩好傾呢？
商場裡面仲有一個汽車博物館，裡面有勁多車，都幾得意，影左幾張相。
行上一層，可以睇曬地下樓層到底做緊咩。
沿路見到唔少日本學放學影相，原來佢地鍾意放學去公園影相，有趣！
見到台場摩天輪，於是立即買票，唔係玻璃底即係有位，我一個人上去坐，最正係佢慢慢轉，唔會好似曼谷咁，轉得極快跟住停好耐，佢可以比你慢慢睇清楚身邊景物的變化，而且有人會抹乾淨每個窗，好細心。1999年開始營業時曾是世界上最高的摩天輪，可惜而家最高係Redhorse OSAKA，但都好好睇，天清氣朗，難得有段時間終於係好天。
好快天色又開始變暗，我就一個人去左台海海邊度坐，坐左個幾鐘，就係咁放空下自己，冇咩好諗，腦袋空空，行到累時最好坐下，完全唔覺得悶。
胃口都唔錯，就食多個海鮮丼，都唔錯。
見時間尚早，於是就決定搭架巴士去其他地方睇下，本身冇plan過，是但見到架巴士就上，所以我都唔知道自己上左咩巴士，打算到終點站就搭返轉頭，總之9點返到有明酒店搭巴士去機場就可以。
事後睇返，原來我搭個架巴士係台場Rainbow Bus (お台場レインボーバス)，來回品川駅至台場，可惜我一搭到去又搵唔返佢個總站響邊，頭先食海鮮丼又用鬼曬d現金，於是我嘗試查下點樣返有明，見到品62呢架巴士，但當我想睇下點行時，部電話就熄左，因為冇電。
當下我係有少少驚，但仲有時間，因為先夜晚7點，仲有兩個鐘比我返去有明，於是我走左去搭[ 品91 ] 經[品川海濱站]]往八潮公園城，搭左陣發覺好似愈搭愈遠，感覺陌生，於是我我寫左張紙比司機，寫「有明？」，佢就好激動話唔係，於是我就落左車，拎住d恤衫，有少許無助，後來決定見到巴士就上，反正電話無電。
見到品93去目黑黎緊，我就上左去，搭返去品川站，於是我去左櫃台問職員冇現金點樣返去有明，佢地叫我搭地鐵，但我地鐵已經無曬錢，唔夠錢返有明，雖然有信用卡，但冇辦海外提款，而且我又唔記得密碼，提款卡剛換新，都唔記得左密碼。
試下排的士，睇下可否用信用卡比錢，發覺勁多人排隊，最後企左響條街度，8：15pm，時間愈來愈少，有明巴士開出的時間是9：05分，只有少於一小時的時間，中間要轉兩條線，最後我同自己講，唔得就去報警，因為都冇地圖，唔知點樣行返去。
後來我發覺自己銀包有150蚊港幣，於是我即刻跑上去外匯店替換，成功換到1000日圓，於是馬上增值，然後搭地鐵返去，我估計海鷗線要25分鐘，但仲有幾個站先到新橋，其實我都預左miss班巴士，搭海鷗線個陣大約8：30鬆d，於是我諗會唔會趕到呢，周身郁，好想即刻跑出去，可惜太多個站，當列車終於到有明站，我就即刻跑出去，見到已經9：04分，跑返去都要一段起碼5分鐘的路程，好彩係紅綠燈全部都係綠燈，狂跑，跑到酒店，見到巴士關左門準備開，我攔住左，然後職員幫我stop架車同埋去酒店拎行李，最後成功上到車都要好多謝佢地，下次唔夠膽再咁玩，只要任何一個位出錯基本上都要自己搭的士去機場，而我都唔知去邊到搵到錢再搭車。
去到機場，發覺原來清酒唔可以上機，於是要搞託運， 比左400蚊，下次都係咪買清酒，或者預先辦定託運，比師兄累死左。到香港機場個gip仲要爛埋，真係慘。
無論如何成功返到香港都已經好好彩，東京之旅真係一早比一世遙遠。