由明治神宮出左黎，行行下就到左表參道，一條類似北京道廣東道的街道，好多名店，但係又好好行，唔覺得太迫，因為日本街道唔會有人一路行一路食煙。
見到呢個路口，對面係Tokyo Plaza，但我就轉彎繼續沿大道行。
不經意彎入左小街，行到半路有少少肚餓。
呢間係Luke's Lobster，好出名的龍蝦，但我冇食到，反而行到轉角一間拉麵店。俺流塩らーめん，但我返到香港先發現原來屋企附近新開左一間分店，服左自己，去完東京之後幾日屋企附近又食返同一間餐廳。
俺流塩らーめん，我叫左個¥980的叉燒拉麵，都幾好味，可能肚餓。相比之下香港我食就要＄75連加一，其實香港都係貴10蚊左右，不過兩次相次，我覺得東京好味d，因為香港個柚子拉麵太清，都係濃湯的拉麵好味一點。
食完野就繼續沿住表參道散步，真係好闊的一條路。可惜賣的衣物太貴，萬幾日圓一件衣物，幾潮都過唔到自己個關。行左一陣原宿，幾有格調的大街小巷，唔少學生放學都去行。
Dior原宿分店有活動。
可惜太貴，唔係我都行入去望望，完全冇人。
之後我就繼續行到去靖國神社，係人都知係咩黎，去到又發覺其實係一個好大的公園，靜到得幾個人行過。
巨型銅製鳥居，高約25公尺，真係好震撼，勁大座。可惜去到神社門前就關左門，只係響外面大道走過。下次都想入去睇下到底神社同博物館有咩好睇。
再一直行就會去到千鳥淵，而家夏天一片綠海，春天有櫻海先多人，而家得我一個人行，無目的地走著，由忍野返黎之後的景點都係臨時決定，反而好似比平時更多驚喜。