返左去新宿之後我就去拎返行李，之前一個人行的時候都諗緊今晚應該去邊度訓，本身有考慮過膠囊旅館，貪佢夠平，反而聽日book左酒店，一晚半晚都冇咩所謂。
後來我發現原來膠囊旅館即晚入住都要幾百蚊，而且咩都冇，位置亦都唔係好近鐵路站，分分行到半死，所以再睇睇，發現左呢個溫泉中心，評價都好似唔錯，而且位置近海，在電信中心站，我聽日入住的酒店係有明華盛頓酒店，相差三個站，全部都係東京臨海副都心位置，發展比較新，所以我就決定去睇一睇。
一落左地鐵發覺附近都幾荒蕪，開頭我仲以為自己去錯，遠處見到類似貨櫃港，但路上一個人都冇，唯有跟住google map行，後來見到呢個「大江戶溫泉物語」。
行多幾步就見到呢座仿古建築，行到去門口比佢嚇死，突然之間有音樂又射燈，但附近只係得我一個，仲有大聲喇叭播日文，我諗應該係歡迎我吧，都幾得意，但附近漆黑一片。
行到去裡面就有好多locker，我唱左錢就將行李鎖左響locker，之後就帶斜揹包拎和服替換，裡面都仲有一個小locker，之後再入去就見到一條仿江戶時代的街道。
由於時間已經10點有多我先到，好多古店都關左門，其實都係食店，有韓國菜，日本拉麵同埋定食，仲有夾公仔機同其他野玩，但我而家只係得番一間定食拉麵同埋小型居酒屋。
入夜之後部份裝飾都會圍封，但係燈火依然通明，同埋會有日本古裝劇播放，不過只有聲冇影像，我行到半死，部電話又冇電，但唔理咁多啦，鎖左個袋就去左浸溫泉。
由於溫泉冇得影相，所以就冇相提供，佢裡面又有locker可以放毛巾，簡單沖下個身就去左浸，本身響台北浸過日勝加賀屋，慘到無倫，於是對溫泉心生恐懼，但琴晚浸過又覺得幾好，但酒店始終面積有限，好彩琴晚唔算多人。
大江戶溫泉物語的溫泉區都幾大，有好幾個泉，中間的那個溫度太高我浸唔到，但旁邊幾個都好舒服，面積又大，呢個時間基本上係我一個人浸一個池，爽到傻，右邊仲有個按摩溫泉可以訓曬成個身落去，有按摩功能射水落腳掌同腰間，舒服都唔識形容。
浸完室內就出去試下室內，發覺日本溫差都幾大，夜晚幾涼下，一出到去室外又有另一番風味，依然一人一池，但多左園林石景同埋花草樹木，黑夜之外明滅可見，溫泉蒸氣冒起，靜靜沉在水中，覺得真係遺世獨立，放假！身心都得到休息，旁邊d人講日文，唔識更好，唔洗理佢地講咩，浸左幾次，發覺d水好似比較柔軟同滑 ，消除疲勞，聽日可以繼續戰鬥。
浸完溫泉出黎就睇下有咩食，只要比手帶佢嘟就可以，唔洗比現金，真係好方便，我揀左碗簡單的叉燒拉麵同埋一杯雪糕，拉麵就好平，但雪糕就比較貴，要港幣20幾蚊。
坐響度食，感受下江戶時代氣氛，見到有日本人都會自己一個黎浸下溫泉，所以一個人完全不覺得奇怪。
夜晚晚一個人食野玩手機都幾正。
後面有尿袋可以租用，但係100圓只有20分鐘，我充左兩次先勉強充到多番一半，如果有得插線充電會更好，呢方面大陸就好好多，唔洗比錢充電，後面拉開門有一間超大房比人訓覺，係日式榻榻米，幾十張床，見到有幾個人訓緊覺，我就唔阻佢地，大房燈光調暗左方便訓覺。
一時興趣兜左個圈，見到原來後面仲有個酒吧未關門，於是我就去買左杯威士忌加冰飲下，都幾大杯下，但唔算太濃，飲曬都唔覺得暈，只有幾分醉意，舒服。
仲有夾公仔機比人玩。
飲完野就行上去睇下咩黎，上面個層原來仲有硬幣按摩椅。
之後有間大房，推門之後發現係長椅，比人睇電視同訓覺，好靜。
我都揀左個位訓，有毛巾當被，本來想睇日本電視，但節目真係好悶，都係台北酒店電視節目好睇，日本節目我真係唔識欣賞，於是熄左佢，玩左陣手機就訓覺，第一次著和服訓覺。
訓到第二朝就check out，發覺連埋住宿浸溫泉食野都只係用左港幣＄458蚊，訓過夜都係加2160圓，而且又唔洗提早book定，其實真係超平，抵過住酒店好多，不過下次可以帶個充滿電的尿袋去會更加好。